1 Samuel 27 - Papiamentu Bible 2013

David riba teritorio filisteo

¹ Sinembargo David tabata pensa: ‘Tardi òf trempan Saul lo mata mi. E mihó kos ku mi por hasi ta hui bai pais di e filisteonan ya e ora ei Saul por laga mi na pas i e no ta sigui buska mi den henter teritorio di Israel. Asina lo mi skapa for di su man.’

² David i e 600 hòmbernan ku tabata kompañ'é a kohe kaminda pa nan djòin Akish, yu hòmber di Maok i rei di Gat.

³ David a bai biba na Gat serka Akish, e otro hòmbernan tambe kada un ku su famia; David a bai ku su dos kasánan, Ahinoam di Yizreel i Abigail di Karmel, biuda di Nabal.

⁴ Ora Saul a haña sa ku David a hui bai Gat, el a stòp di persiguié.

⁵ David a bisa Akish: ‘Si su mahestat ke mi bon, laga mi bai un di e siudatnan den kunuku pa keda biba aya. No ta bon pa e sirbidó akí keda biba serka su mahestat den e siudat real.’

⁶ E dia ei mes Akish a duna David e siudat Siklag. P'esei te dia di awe Siklag ta pertenesé na e reinan di Huda.

⁷ David a biba un aña i kuater luna riba teritorio filisteo.

⁸ E tabata sali ku su kompañeronan bai sakia e gueshuritanan, guirzitanan i amalekitanan. Eseinan tabata e pueblonan ku desde hopi tempu ta biba den e region ku ta yega te na Shur i tera di Egipto.

⁹ Ora e tabata ataká den e region ei e no tabata laga ni un hende hòmber ni muhé keda na bida i e tabata bai ku e karné-, baka-, buriku- i kamelnan. Asta nan pañanan e tabata bai kuné. Despues e tabata bai mèldu serka Akish.

¹⁰ Semper ora Akish puntr'é: ‘Unda bo a bai ataká awe?’ David tabata kontest'é: ‘Den e parti di Neguèb kaminda tribu di Huda ta biba,’ òf ‘den e parti di Neguèb kaminda famia di Yeragmeel ta biba,’ òf ‘den e parti kaminda e kenitanan ta biba’.

¹¹ David no tabata laga nan hiba ni un hende hòmber ni un hende muhé bibu Gat, pa evitá ku nan por a bai bisa na Gat kiko e tabata hasi. Asina el a hasi tur e tempu ku el a biba riba teritorio filisteo.

¹² Akish tabata konfia David i e tabata pensa: ‘David a daña pa su mes serka su pueblo Israel; lo e ta mi sirbidó pa semper.’