1 Samuel 18 - Papiamentu Bible 2013

Yonatan i David ta bira amigu

¹ Despues di e kòmbersashon di David ku Saul, Yonatan a bira amigu íntimo di David i el a stim'é manera e tabata stima su mes.

² E mes dia ei Saul a tuma David den su servisio i e no a lag'é bai kas di su tata bèk.

³ Yonatan a hura David amistat eterno, pasobra e tabata stima David mes tantu ku e tabata stima su mes.

⁴ Yonatan a kita e mantel i e korasa ku e tabatin bistí i a duna David nan; el a dun'é su spada, su bog i su faha tambe.

⁵ David a sa di gana tur bataya ku Saul a mand'é bai bringa. P'esei Saul a dun'é un rango altu den ehérsito, loke a kai na agrado di henter e pueblo i tambe na agrado di e ofisialnan den servisio di Saul.

Saul ta envidiá David

⁶ Ora David a bini bèk despues di a mata e filisteo, muhé di tur siudat den Israel a sali bin kontra rei Saul. Nan tabata kanta, balia, grita di alegria i toka triangel ku tamburein.

⁷ Miéntras nan tabata balia, nan tabata kanta den kor: ‘Saul a mata míles di hòmber, pero David a mata míles i míles.’

⁸ Saul a keda mashá malkontentu; e no a gusta e palabranan akí i el a pensa: ‘Nan ta bisa ku David a mata míles i míles di hòmber pero ku ami a mata míles so. Awor falta solamente pa nan hasié rei!’

⁹ For di e momento ei Saul a kuminsá mira David ku deskonfiansa.

¹⁰ E siguiente dia e mal spiritu, ku Dios a manda, a poderá di Saul i el a kana ras manera hende loko den su palasio. David tabata toka arpa manera kustumber. Saul tabatin su lansa den man.

¹¹ Diripiente Saul a tira e lansa ku intenshon di klaba David na muraya, pero David a bula un banda pone Saul hera dos bia.

¹² Saul a kuminsá haña miedu di David pasobra SEÑOR tabata yuda David miéntras El a bandoná Saul.

¹³ P'esei Saul a kita David for di su kaminda i el a dun'é mando riba 1000 hòmber. Na kabes di e 1000 hòmbernan akí David tabata bai guera i bini bèk.

¹⁴ Komo ku SEÑOR tabata ku David, e tabatin éksito den tur loke e tabata hasi.

¹⁵ Saul a haña di bèrdè miedu di David, ora el a mira ku tur loke David tabata hasi tabatin bon resultado.

¹⁶ Pero henter Israel i Huda tabata stima David, pasobra ta e tabata bai guera ku nan i bini bèk.

Matrimonio di David

¹⁷ Un dia Saul a bisa David: ‘Ata mi yu muhé mayó Merab. Lo mi hasié bo esposa basta bo sirbi mi manera un hòmber balente i bringa bataya di SEÑOR.’ Saul a pensa: ‘Asina mi mes no tin mester di mata David, mi ta laga esei pa e filisteonan.’

¹⁸ David a kontestá: ‘Ken mi ta i kiko mi famia ta nifiká den Israel pa mi bira suegu di rei?’

¹⁹ Pero ora ku e dia a yega ku Saul mester a duna David su yu muhé Merab komo esposa, el a entregá e mucha muhé na Adriel di Mehola.

²⁰ Mikal, e otro yu muhé di Saul, a namorá di David. Ora Saul a tende esaki, el a gosa e kos,

²¹ pasobra el a pensa di duna David Mikal komo esposa pa asina Mikal bira e trampa pa David kai den man di e filisteonan. E ora ei Saul a bisa David: ‘Awor bo ta bolbe haña un chèns di bira mi suegu.’

²² Saul a ordená su sirbidónan: ‘Papia den sekreto ku David, i bis'é ku rei ker e mashá bon, ku tur rei su sirbidónan ta apresi'é mashá i p'esei mihó e tuma e chèns di bira suegu di rei.’

²³ E sirbidónan di rei a bai konta David tur e kosnan ei, pero David a kontestá nan: ‘Boso ta kere ku ta fásil pa un hòmber pober i insignifikante manera mi bira suegu di rei?’

²⁴ E sirbidónan a bai bèk serka Saul i nan a kont'é loke David a bisa.

²⁵ Saul, ku intenshon di laga David muri na man di e filisteonan, a bisa su sirbidónan: ‘Bisa David pa na lugá di duna rei e dote, e hiba prepusio di 100 filisteo p'e pa di e manera ei e tuma vengansa riba su enemigunan.’

²⁶ E sirbidónan a pone David na altura di loke Saul a bisa i David a aseptá e proposishon pa bira suegu di rei. Promé ku e tempu fihá a pasa,

²⁷ David a sali ku su sòldánan bai bringa, el a mata 200 filisteo i a trese nan prepusio; el a entregá e kantidat stipulá na rei pa asina e por a bira suegu di rei. E ora ei Saul a duna David su yu muhé Mikal komo esposa.

²⁸ Ora Saul a mira i komprondé ku SEÑOR tabata semper ku David i ku su yu muhé Mikal tabata stima David,

²⁹ Saul a haña ainda mas miedu di David i el a bira su enemigu pa restu di su bida.

³⁰ Tur bia ku e hefenan filisteo a bin bringa, David tabatin mas éksito ku tur e otro ofisialnan di Saul. P'esei el a haña hopi fama.