1 Reinan 7 - Papiamentu Bible 2013

E palasio di Salomon

¹ Salomon a traha su mes palasio tambe; den diestres aña esei a keda kompletamente kla.

² El a traha e palasio yamá ‘Boske di Libanon’: sinkuenta meter largu, bintisinku meter hanchu i diessinku meter altu, ku kuater rei di pilá di palu di seder. Riba e pilánan a pone balki di seder.

³ E pilánan tabata sostené un plafòn di seder ku a pone riba e kuarentisinku balkinan, diessinku balki den kada rei.

⁴ Den e dos murayanan na banda tabatin tres rei di bentana di palu riba otro, kada be tres bentana nèt dilanti di otro.

⁵ Den e murayanan dilanti i patras tabatin kada be tres porta nèt dilanti di otro. E kozeinnan tabatin kuater dèk di palu, ku tabata bira kada be mas kòrtiku.

⁶ Salomon a traha tambe e ‘Sala di Pilá’ ku tabata bintisinku meter largu i diessinku meter hanchu. Aki dilanti el a traha un adrei ku pilá ku un dak ku ta sali un poko.

⁷ Ademas el a traha e sala kaminda e trono tabata i e Sala di Korte kaminda e tabata tene rat. El a fura e Sala di Korte djariba te abou ku palu di seder.

⁸ E residensia kaminda Salomon mes tabata biba, tabata situá na un otro plenchi tras di e Sala di Korte; e tabatin e mesun estilo. E palasio ku el a traha pa su kasá, e yu di fárao, tambe tabata manera e Sala di Korte.

⁹ Tur e edifisionan akí, for di fundeshi te na paira i for di kaya te na e plenchi grandi, tabata trahá di blòki di piedra kostoso, izag na midí patras i dilanti.

¹⁰ E fundeshinan tambe tabata di piedra kostoso grandi, algun di sinku i otro di kuater meter.

¹¹ E parti ariba tambe tabata di piedra kostoso kòrtá na midí, i di palu di seder.

¹² E plenchi grandi tabata será ku tres kareda di piedra kòrta na midí i un kareda di balki di palu di seder, meskos ku e plenchi sentral di tèmpel di SEÑOR i e portal.

E ophetonan di metal pa uso den tèmpel

¹³ Rei Salomon a manda yama un tal Huram di Tiro.

¹⁴ Huram tabata yu di un biuda di tribu di Naftali i di un tata nasé na Tiro, un eksperto den trahamentu ku bròns. Huram tabata mashá ábil, e tabata sa tur téknika pa traha kualke trabou di bròns. El a bai traha serka rei Salomon i a hasi tur trabou ku rei a dun'é.

¹⁵ El a basha dos pilá di bròns. Kada pilá tabata nuebe meter altu; tabatin mester di un sinta di seis meter pa pasa rònt di kada.

¹⁶ Tambe el a traha dos kapitel, bashá di bròns, pa sosegá riba e pilánan. Tur dos kapitel tabata dos meter i mei altu.

¹⁷ Kaba el a traha trali iflèktu den forma di slenger di kadena pa tur e dos kapitelnan riba e pilánan, shete pa kada kapitel.

¹⁸ Pa sera e kapitelnan el a traha rònt di tur e dos tralinan iflèktu dos krans di granatapel.

¹⁹ E kapitelnan riba e pilánan na e portal tabatin un parti trahá den forma di un leli di dos meter altu,

²⁰ e tabata sali riba e bola ku su trali iflèktu rondó di dje. Rònt di kada kapitel tabatin un krans di 200 granatapel kologá.

²¹ Huram a pone e dos pilánan akí na portal di tèmpel. El a yama esun na man drechi Yakin i esun na man robes Boaz.

²² Despues ku a pone e parti den forma di leli riba e pilánan, e trabou ei a keda kla.

Muebelnan di tèmpel

²³ Despues Huram a traha ‘Laman’, esta un pila mashá grandi di bròns bashá, pa pone awa. E tabata rondó i tabata midi sinku meter di un banda pa e otro. E tabata dos meter i mei altu, tabatin mester di un sinta di diessinku meter pa pasa rònt di dje.

²⁴ Tur rònt bou di e rant tabatin pampuna, dies kada sinkuenta sèntimeter. Nan tabata trahá den dos kareda formando un solo pida ku e pila.

²⁵ E pila tabata pará riba diesdos toro, tres toro ku kara pa nort, tres ku kara pa zùit, tres ku kara pa ost i tres ku kara pa wèst. Nan parti patras di kurpa tabata topa otro.

²⁶ E bandanan di e pila tabatin hanchura di un man; e rant tabata trahá manera un beker, den forma di un kèlki di leli. E por a karga 44.000 liter di awa.

²⁷ Tambe el a traha dies garoshi di bròns, kada un dos meter largu, dos meter hanchu i un meter i mei altu.

²⁸ Un garoshi tabatin e forma akí: un erante di pipa tapá ku plachi.

²⁹ Riba e plachinan pegá meimei di e pipanan tabatin figura di leon, baka i kerubin i riba e pipanan tambe. Riba e leonnan i e bakanan tabatin krans den e bròns i bou di nan tambe.

³⁰ Kada garoshi tabatin kuater wil di bròns ku nan as di bròns. Na e kuater skinanan tabatin pia pa karga e baki di awa, kada pia tabata bashá den forma di krans.

³¹ Den kada garoshi tabatin un banki ku tabata sali 50 sèntimeter riba e garoshi mes. E banki tabata rondó i e tabata 75 sèntimeter altu; anto den dje e pila di awa tabata. Tambe tabatin figura grabá na rant di e banki. E plachinan di e garoshi no tabata rondó, ma firkant.

³² E kuater wilnan tabata bou di e plachinan i nan tabata pegá ku klèm na e garoshi. Kada wil tabata 72 sèntimeter altu.

³³ Nan tabata manera wil di garoshi gewon, pero nan klèmnan, rim, spak i hòp, tur tabata di bròns bashá.

³⁴ Kada garoshi tabatin un man na kada skina.

³⁵ Na e parti ariba di e garoshi tabatin un rant rondó di bintisinku sèntimeter altu i e mannan ku e plachinan tabata forma un solo pida ku e parti ariba.

³⁶ Riba e banda plat di e mannan i e plachinan, segun tabatin lugá, el a graba figura di kerubin, leon, i palma; rondó di nan el a graba krans.

³⁷ Asin'akí el a traha e dies garoshinan tur bashá di e mesun manera, di e mesun tamaño i di e mesun modelo.

³⁸ El a traha tambe dies baki di awa di bròns, kada un di dos meter hanchu, ku kapasidat pa karga 880 liter.

³⁹ El a pone kada baki riba un di e dies garoshinan, sinku na man drechi i sinku na man robes di tèmpel. E pila grandi, yamá ‘Laman’, el a pone na man drechi, zùitost di e edifisio.

⁴⁰ Tambe Huram a traha palangana i skèp i kòmchi pa sprengu awa di bròns. Asina el a kaba tur e trabounan ku e mester a hasi pa Salomon den tèmpel di SEÑOR:

⁴¹ e dos pilánan, e dos kapitelnan den forma di bola riba e pilánan; e dos tralinan pa kubri e bolanan;

⁴² kuatershen granatapel pa e dos tralinan, dos kareda di granatapel pa kada trali, ku tabata kubri e bolanan riba e pilánan;

⁴³ e dies garoshinan ku e dies bakinan di awa riba nan;

⁴⁴ e pila grandi ‘Laman’ — un so tabatin — i e diesdos toronan ku tabata karg'é;

⁴⁵ ademas palangana, skèp i kòmchi pa sprengu awa. Tur e artíkulonan akí ku Salomon a laga Huram traha pa tèmpel di SEÑOR, tabata di bròns lombrá.

⁴⁶ Rei tabata laga basha nan den malchi di klei den region di Yordan entre Sukot i Sartan.

⁴⁷ Salomon a keda sin pisa tur e artíkulonan akí; nan tabata asina hopi ku no a kalkulá e peso di e bròns.

⁴⁸ Tambe Salomon a laga traha tur e otro ophetonan di uso den tèmpel di SEÑOR: e altá di oro, e mesa di oro, pa pone pan konsagrá,

⁴⁹ e kandelarnan di oro puru, dilanti di e sala patras, sinku na man drechi i sinku na man robes, adorno di oro den figura di flor, e lampinan di oro i e snùiternan di oro pa paga lampi,

⁵⁰ e skalchinan, e kuchúnan i e kòmchinan pa sprengu awa, e panchinan i e fogonnan tur di oro puru, e skarnirnan di e portanan di tèmpel ku tabata duna pa e lugá santísimo, i esnan di e portanan di e sala grandi, tur di oro.

⁵¹ Ora tur trabou ku rei Salomon a laga hasi pa tèmpel di SEÑOR a kaba, el a trese tur loke su tata David a dediká na SEÑOR, esta plata, oro i artíkulonan di uso, i a depositá nan den e kambernan di tesoro di tèmpel di SEÑOR.