1 Reinan 5 - Papiamentu Bible 2013

Pakto di Salomon ku Hiram, rei di Tiro

¹ Ora Hiram, rei di Tiro, a tende ku nan a konsagrá Salomon rei na lugá di su tata David, el a manda su embahadornan serka Salomon, pasobra semper e tabata mashá amigu di David.

² E ora ei Salomon a manda bisa Hiram:

³ ‘Bo sa ku pa motibu di e gueranan ku el a hañ'é aden di tur banda David, mi tata, no por a traha un tèmpel na honor di SEÑOR, su Dios, te ora SEÑOR a someté su enemigunan n'e.

⁴ Awor SEÑOR, mi Dios, a duna mi trankilidat riba tur tereno, no tin ni atversario ni ningun peliger mas.

⁵ P'esei mi ta pensa awor di traha un tèmpel na honor di SEÑOR, mi Dios. Pasobra SEÑOR a primintí mi tata David: “E yu ku lo Mi pone riba trono na bo lugá, e yu ei lo traha e tèmpel na mi honor.”

⁶ P'esei laga kap sedernan di Libanon pa mi. Mi trahadónan lo yuda esnan di bo. Mi ta paga bo e suèldu ku bo pidi pa bo trahadónan, pasobra bo mes sa ku ningun di nos aki banda no por kap palu bon manera e hendenan di Sidon.’

⁷ Ora Hiram a haña e rospondi di Salomon, el a bira mashá kontentu i bisa: ‘Bendishoná sea SEÑOR awe, komo El a duna David un yu asina sabí pa goberná e nashon grandi akí!’

⁸ Hiram a manda bisa Salomon: ‘Mi a haña bo rospondi, lo mi duna bo kuantu palu di seder i di siprès ku bo ke.

⁹ Mi trahadónan lo baha e palunan di Libanon te na laman, ei mi mes lo laga traha vlòt ku nan i transportá nan te na e lugá ku bo indiká. Na e lugá ei ta lòs nan for di otro i bo por rekohé nan. Pa loke ta toka abo, kumpli ku mi deseo i manda provishon na mi palasio.’

¹⁰ Asina Hiram a duna Salomon kuantu palu di seder i di siprès ku e tabata ke,

¹¹ i Salomon tabata sòru pa provishon na palasio di Hiram. Aña aden, aña afó Salomon tabata entregá Hiram: 4.400.000 kana di trigo i 4400 liter di zeta di oleifi puru.

¹² SEÑOR a duna Salomon sabiduria manera El a primintí. Ademas Hiram i Salomon a sera un kombenio, i tabata reina pas entre nan.

¹³ Rei Salomon a laga yama hende di tur parti di Israel pa trabou obligatorio. Nan tabata 30.000 hòmber.

¹⁴ Tur luna e tabata manda un grupo di 10.000 di e hendenan akí Libanon i nan tabata pasa un luna na Libanon i dos luna na kas. Adoniram tabata enkargá ku e trabounan obligatorio.

¹⁵ Ademas Salomon tabatin 70.000 hende pa karga kos i 80.000 kapdó di piedra den seru,

¹⁶ sin konta e 3300 kapatas pa dirigí e trabounan.

¹⁷ Rei a laga kap piedra grandi i kostoso for di den seru pa despues kap nan na midí i traha fundeshi di tèmpel riba nan.

¹⁸ Trahadónan di Salomon i di Hiram i hendenan di fishi di Guebal a kòrta i drecha e balkinan i e piedranan pa konstrukshon di e tèmpel.