1 Reinan 16 - Papiamentu Bible 2013

¹ Yehu, yu hòmber di Hanani, a haña un mensahe di SEÑOR tokante Basha:

² ‘Mi a saka bo for di lodo i hasi bo rei riba mi pueblo Israel, pero bo a sigui ehèmpel di Yerobeam. Bo a pone mi pueblo Israel peka i lanta mi rabia ku e pikánan ku bo a pone nan hasi.

³ P'esei Mi ta bai kaba ku bo i ku bo famia; Mi ta bai hasi ku bo famia real meskos ku Mi a hasi ku famia real di Yerobeam, yu di Nebat.

⁴ Kachó lo kome e famianan di Basha ku muri den siudat, para di shelu lo kome esnan ku muri den kunuku.’

⁵ Sobrá historia di Basha, loke el a hasi i su hazañanan, tur ta skibí den buki di krónika di reinan di Israel.

⁶ Basha a bai sosegá serka su antepasadonan i a der'é na e siudat Tirsa. Su yu hòmber Ela a siguié komo rei.

⁷ E mensahe ku SEÑOR a duna profeta Yehu, yu di Hanani, tabata pa Basha i pa su famia tambe. Di un banda pa motibu di tur e kosnan malu ku el a hasi den bista di SEÑOR — e tabata provoká SEÑOR ku su mal echonan te ku el a bira meskos ku famia di Yerobeam —, di otro banda pasobra el a mata Yerobeam ku henter su famia.

Ela, rei di Israel

⁸ Ela, yu di Basha, a bira rei di Israel den e di bintiseis aña ku Asa tabata rei na Huda. E tabatin su residensia na Tirsa i el a goberná dos aña.

⁹ Su sirbidó Zimri, un di su ofisialnan ku tabata komandante riba mitar di e garoshinan di guera, a traha un kòmplòt kontra dje. Un dia rei Ela a bebe burachi na kas di Arsa, mayordomo di palasio,

¹⁰ Zimri a drenta dal e mata. Esaki a sosodé den e di bintishete aña ku Asa tabata rei na Huda. Zimri a bira rei na lugá di Ela.

¹¹ E no a kaba di bira rei subi trono, ku el a mata tur miembro di famia di Basha. E no a laga ningun miembro di e famia keda na bida. Tambe el a mata e famianan mas yegá i e amigunan di Basha.

¹² Asina Zimri a kaba ku henter famia real di Basha, di akuerdo ku e palabra ku SEÑOR a papia pa boka di profeta Yehu

¹³ enkuanto e pikánan ku e i su yu Ela a kometé i ku el a pone e israelitanan tambe hasi. Ku nan diosnan falsu sin balor nan a provoká SEÑOR, Dios di Israel.

¹⁴ Sobrá historia di Ela i tur loke el a hasi, ta skibí den buki di krónika di reinan di Israel.

Zimri, rei di Israel

¹⁵ Den e di bintishete aña ku Asa tabata rei na Huda, Zimri a bira rei na Tirsa pa shete dia. Mientrastantu e ehérsito tabatin su kampamentu banda di Guibton, un siudat filisteo.

¹⁶ Ora e sòldánan den e kampamentu a tende ku Zimri a traha un kòmplòt i ku el a mata rei, unánimemente nan a proklamá Omri, komandante di ehérsito, aya mes rei di Israel.

¹⁷ Omri i henter Israel a sali for di Guibton bai sitia Tirsa.

¹⁸ Ora Zimri a mira ku nan a kapturá e siudat, el a bai den e toren fortifiká di palasio real, pega e palasio na kandela i a muri eiden.

¹⁹ Su morto tabata resultado di e pikánan ku el a kometé; hasiendo malu den bista di SEÑOR. El a sigui ehèmpel di Yerobeam i a kometé e mesun pikánan ku esei a hasi i a pone Israel tambe hasi.

²⁰ Sobrá historia di Zimri i di e kòmplòt ku el a traha ta skibí den buki di krónika di reinan di Israel.

Omri, rei di Israel

²¹ Despues di esei pueblo di Israel a parti na dos; un parti a sigui Tibni, yu hòmber di Guinat, pa hasié rei, i e otro parti a sigui Omri.

²² Pero e hendenan ku a sigui Omri a gana tereno riba esnan ku a sigui Tibni, yu di Guinat. Despues ku Tibni a muri, Omri a bira rei.

²³ El a bira rei di Israel, den e di trintiun aña ku Asa tabata rei na Huda. El a goberná diesdos aña, di kua seis aña na Tirsa.

²⁴ El a kumpra seru Samaria pa 60 kilo di plata serka Shèmèr i a traha un siudat riba dje. Omri a yama e siudat Samaria, pasobra doño di e seru tabata yama Shèmèr.

²⁵ Omri a hasi loke ta malu den bista di SEÑOR, el a hasi pió ku tur e reinan promé kuné.

²⁶ Den tur kos el a sigui ehèmpel di Yerobeam, yu di Nebat; el a sigui hasi mesun piká ku Yerobeam a pone Israel hasi. Ku nan diosnan falsu sin balor, nan a provoká SEÑOR, Dios di Israel.

²⁷ Sobrá historia di Omri, loke el a hasi i su hazañanan ta skibí den buki di krónika di reinan di Israel.

²⁸ Omri a bai sosegá serka su antepasadonan i a der'é na Samaria; su yu hòmber Ahab a siguié komo rei.

Ahab ta bira rei di Israel

²⁹ Ahab, yu hòmber di Omri, a bira rei di Israel den e di trintiocho aña ku Asa tabata rei na Huda. Ahab, yu di Omri, a goberná 22 aña. E tabatin su residensia na Samaria.

³⁰ Ahab, yu di Omri, a hasi loke ta malu den bista di SEÑOR, el a hasi pió ku tur e reinan promé kuné.

³¹ Komo si fuera no tabata basta ku e tabata sigui mal ehèmpel di Yerobeam, yu di Nebat, pa kolmo el a kasa ku Izebel, yu muhé di Etbaal, rei di Sidon, i a kuminsá sirbi i adorá Baal.

³² El a lanta un altá pa Baal den e tèmpel ku el a traha p'e na Samaria.

³³ Tambe el a lanta un pilá di palu sagrado i a hasi mas kos ku a provoká SEÑOR, Dios di Israel, pió ku tur e reinan ku Israel tabatin promé kuné.

³⁴ Den e tempu ei Hiel di Betel a rekonstruí Yériko. Ponementu di fundeshi di Yériko a kosta bida di Abiram, yu hòmber mayó di Hiel, i ponementu di portanan di siudat a kosta bida di su yu hòmber di mas chikí Segub. Tur esaki a sosodé konforme e palabra ku SEÑOR a papia pa boka di Yozue, yu di Nun.