1 Reinan 10 - Papiamentu Bible 2013

Reina di Sheba ta bishitá Salomon

¹ Reina di Sheba a tende di e fama ku Salomon a haña pa gloria di SEÑOR. El a bai Herusalèm pa hasi Salomon pregunta difísil pa asina pon'é na prueba.

² E reina a yega ku gran kantidat di kamel, kargá ku perfume, mashá hopi oro i piedra presioso. Ora el a yega serka Salomon, el a bis'é tur loke e tabatin na kurason.

³ Salomon tabatin kontesta riba tur su preguntanan. No tabatin un pregunta ku tabata difísil di mas pa e kontestá.

⁴ Ora reina di Sheba a weta e sabiduria di Salomon, e kas ku el a traha,

⁵ e kumindanan na su mesa, e funshonarionan di korte ku tabata kome huntu kuné, e sirbidónan ku tabata kana rònt, e pañanan ku nan tabatin bistí, e bibidanan ku nan tabata sirbi i e sakrifisionan di kandela ku Salomon tabata ofresé den tèmpel di SEÑOR, el a pèrdè abla.

⁶ Despues el a bisa rei: ‘Ta bèrdat anto, loke mi a tende na mi tera di bo logronan i bo sabiduria.

⁷ Pero mi no por a kere, ku no ta te ora mi a yega i mi a mira ku mi mes wowo. Echo ta ku nan no a konta mi ni mitar di loke ta bèrdat, pasobra bo sabiduria i bo prosperidat a surpasá tur loke mi a tende.

⁸ Felis bo kasánan i felis e funshonarionan akí ku tur ora ta huntu ku bo i ta tende bo sabiduria!

⁹ Alabá sea SEÑOR, bo Dios; bo a kai asina tantu na su agrado, ku El a pone bo riba trono di Israel! Pasobra SEÑOR semper a stima Israel, El a hasi bo rei pa bo mantené derecho i hustisia.’

¹⁰ E reina a duna Salomon 3600 kilo di oro, gran kantidat di perfume i piedra presioso. Nunka mas no a yega Israel asina un kantidat di perfume manera e reina di Sheba a regalá rei Salomon.

¹¹ Ademas e barkunan di Hiram, ku a trese oro for di Ofir, tambe a trese palu di sándalo na gran kantidat i piedranan presioso.

¹² Di e palu di sándalo rei a laga traha muebel pa kas di SEÑOR i pa palasio real, tambe siter i arpa pa músikonan. Nunka mas te dia djawe nan no a importá ni a mira tantu palu di sándalo asina na Israel.

¹³ Salomon a kumpli ku tur deseo di reina di Sheba, sin konta tur e regalonan ku el a dun'é manera rei Salomon so por a duna. Despues e reina a kohe kaminda pa regresá su tera, kompañá pa e hendenan den su servisio.

Fama i rikesa di Salomon

¹⁴ E oro ku rei Salomon tabata risibí pa aña tabata pisa 20.000 kilo,

¹⁵ sin konta e loke ku e tabata kobra na impuesto di e komersiantenan i e negosiantenan, di tur e reinan di Arabia i di e gobernadornan di e pais.

¹⁶ Rei Salomon a traha 200 eskudo grandi di oro batí. Pa kada unu el a usa seis kilo di oro.

¹⁷ Tambe el a traha 300 eskudo mas chikitu di oro batí. Pa kada un el a usa un kilo i mei di oro. Despues el a pone nan den palasio ‘Boske di Libanon’.

¹⁸ Tambe rei a traha un trono grandi furá ku ivor i oro puru.

¹⁹ E trono tabatin seis tret, un lomba rondó ariba, i un man na kada banda. Banda di e mannan tabatin dos leon pará;

²⁰ tabatin diesdos leon pará riba e seis tretnan, un na kada banda di un tret. Den ningun otro reino nan no a yega di traha algu asina.

²¹ Tur e bekernan di rei Salomon tabata di oro, tur loke tabata usa na mesa den palasio ‘Boske di Libanon’ tabata di oro fini. No tabatin nada di plata. Tempu di Salomon plata no tabatin balor.

²² Rei tabatin barkunan komersial na laman huntu ku e flota di Hiram, ku un be den tres aña tabata drenta, kargá ku oro, plata, ivor, makaku i pòwis.

²³ Den rikesa i sabiduria rei Salomon a surpasá tur rei di mundu.

²⁴ Henter mundu tabata deseá di mira Salomon pa tende e sabiduria ku Dios a dun'é.

²⁵ Aña aden aña afó kada bishitante tabata trese regalo, kosnan di oro i plata, paña, arma, perfume, kabai i mula.

²⁶ Tambe Salomon a duna su sòldánan di kabayeria garoshi di guera. E tabatin 1400 garoshi i un kabayeria di 12.000 hende. El a stashoná un parti na e siudatnan ku el a traha ku e meta ei i un otro parti a keda Herusalèm na su mes disposishon.

²⁷ Rei a hasi ku na Herusalèm tabatin plata manera tabatin piedra i ku tabatin palu di seder manera figo shimaron ta krese den Sabana di Shefela.

²⁸ E kabainan destiná pa Salomon tabata bini for di Egipto i for di Silisia. E komersiantenan di rei tabata kumpra nan aya p'e.

²⁹ Nan tabata importá e garoshinan tambe for di Egipto. Un garoshi tabata kosta seis kilo di plata i un kabai un kilo i mei. Tambe e komersiantenan di rei tabata eksportá nan pa tur e reinan hetita i pa e reinan di Aram.