1 Pedro 4 - Papiamentu Bible 2013

Bida kambiá

¹ Ya ku Kristu a sufri físikamente, boso tambe mester kana ku e pensamentu, ku esun ku sufri físikamente no ta envolví den piká mas:

² restu di su bida, e mester biba konforme boluntat di Dios i no konforme deseo humano.

³ Den pasado boso a biba hopi tempu kaba den kos ku pagano ta gusta hasi. Boso bida tabata dominá pa inmoralidat, pashon, buracheria, bakanal, paranda i adorashon baho di e diosnan falsu!

⁴ Pero awor e paganonan ta keda mashá asombrá, ora nan mira ku boso no ta kompañá nan mas den e eksesonan ei i p'esei mes nan ta papia malu di boso!

⁵ Sinembargo nan mester duna kuenta na Esun ku ta prepará kaba pa husga bibu i morto.

⁶ P'esei mes a prediká e bon notisia na esnan ku awor akí ta morto, pa asina, ounke komo hende nan tabata sentensiá na muri físikamente, tòg nan biba pa medio di Spiritu Santu manera Dios ta biba.

⁷ Fin di tur kos ta serka! P'esei boso mester ta prudente i alerta pa boso por dediká boso na orashon.

⁸ Prinsipalmente, stima otro sinseramente, pasobra amor ta tapa un multitut di piká.

⁹ Demostrá otro hospitalidat, sin keha!

¹⁰ Komo bon manehadó di e diferente donnan di Dios, nos kada un mester sirbi e otronan ku e don spesial ku Dios a duna nos.

¹¹ Si un hende a risibí e don di prediká, mester por tende Dios mes papia pa medio di dje. Si un hende a risibí e don di sirbi den iglesia, e mester sirbi ku e forsa ku Dios ta dun'é. Asina Dios ta haña gloria den tur kos pa medio di Hesu-Kristu. Na Dios ta pertenesé gloria i poder pa semper! Amèn.

Sufrimentu komo kristian

¹² Rumannan stimá, no keda sorprendí ku boso ta pasa den kandela di prueba duru, i hasi komo si fuera ta algu apnormal.

¹³ Sino sea kontentu ku boso por tuma parti na sufrimentu di Kristu. Ya boso lo ta yen di goso dia ku Kristu bini bèk den su gloria.

¹⁴ Felis boso ta si insultá boso pasobra boso ta siguidó di Kristu; esei ta mustra ku e Spiritu glorioso di Dios ta kontinuamente riba boso.

¹⁵ Si kualke di boso ta sufri, no laga ta pasobra e ta un matadó, ladron, malechor òf un hende ku ta mete den otro hende su asuntu.

¹⁶ Sinembargo, si e ta sufri pasobra e ta kristian, e no mester tin bèrgwensa, pero e mester alabá Dios komo un hende ku ta karga Kristu su nòmber.

¹⁷ Tempu pa huisio a yega i Dios ta husga su mes kas promé. Si e huisio ta kuminsá ku nos, ta kon e final lo ta ora husga esnan ku no ta obedesé e bon notisia di Dios?

¹⁸ Manera Skritura ta bisa: ‘Si ta difísil pa hende hustu keda salbá, kiko ta para pa hende pekadó i malbado?’

¹⁹ Ke men antó ku esnan ku ta sufri di akuerdo ku Dios su boluntat, mester entregá nan bida na nan Kreador ku ta di konfia, i sigui hasi bon obra.