1 Krónikanan 29 - Papiamentu Bible 2013

Kontribushon pa konstrukshon di tèmpel

¹ Despues David a dirigí su mes na henter e pueblo ku a bini huntu: ‘Dios a skohe mi yu Salomon, pero e ta yòn i sin eksperensia ainda i e tarea ku ta ward'é ta grandi. Pasobra e konstrukshon enorme akí no ta destiná pa un hende, sino pa SEÑOR Dios.

² P'esei mi a hasi tur loke mi tabata por pa trese tur material huntu ku mester pa tèmpel di mi Dios: oro, plata, koper, heru, palu, óniks, piedranan semipresioso, piedranan di diferente koló, tur sorto di piedra fini i alabaster blanku na gran kantidat.

³ Ademas di esei pa amor pa e tèmpel di mi Dios, mi ta duna for di oro i plata ku ta mi propiedat personal:

⁴ 90.000 kilo di oro puru di Ofir i 210.000 kilo di plata refiná pa fura muraya di e edifisionan.

⁵ Tambe e hendenan di fishi por traha opheto di oro i di plata kuné. I awor mi ta puntra boso: Ken mas ta dispuesto pa hasi un donashon boluntario pa SEÑOR awe?’

⁶ E ora ei e kabesnan di famia, kabesnan di tribunan di Israel, òfisirnan di alto rango i esnan di rango mas abou i e hefenan di trabou públiko di rei

⁷ a duna pa e trabounan di tèmpel: 150.000 kilo di oro, 10.000 moneda di oro, 300.000 kilo di plata, 540.000 kilo di koper i tres mion kilo di heru.

⁸ Esnan ku tabatin piedra presioso a entregá nan pa tesoro di tèmpel di SEÑOR, ku tabata na enkargo di Yehiel, desendiente di Guershon.

⁹ Pueblo tabata kontentu ku nan generosidat, pasobra nan a duna na SEÑOR boluntariamente i di henter nan kurason. Rei David tambe tabata hopi kontentu.

Orashon di gratitut di David

¹⁰ E ora ei David a alabá SEÑOR, dilanti di henter e pueblo ku a bini huntu. El a bisa: ‘Alabá Bo ta SEÑOR, Dios di nos antepasado Israel, den tur siglo di siglonan.

¹¹ Na Bo ta toka tur grandesa, forsa, gloria, honor i mahestat, sí, tur loke tin den shelu i na tera; ta di Bo e reino ta. Bo ta alsá riba tur kos.

¹² Tur rikesa i poder ta di Bo. Ku man firme Bo ta manda riba tur kos. Bo tin poder di hasi tur hende grandi i fuerte.

¹³ P'esei nos ta gradisí Bo i nos ta alabá bo gloria.

¹⁴ Ken mi ta, i ken mi pueblo ta? Di nos mes forsa nos lo no ta kapas di duna Bo regalo asina. Tur kos ta bini di Bo. Tur e regalonan akí Bo a duna nos promé.

¹⁵ Bo sa, SEÑOR, ku nos ta strañero, hende sin paradero, meskos ku nos antepasadonan. Nos bida aki na mundu ta manera un sombra, sin seguridat.

¹⁶ SEÑOR, nos Dios Santu, tur e rikesanan akí ku nos a reuní pa traha un tèmpel na bo honor, tur ta Bo a duna nos promé; tur kos ta di Bo.

¹⁷ Mi sa, SEÑOR, ku Bo ta weta den kurason di hende i ku sinseridat ta agradá Bo mas ku tur kos. Mi a duna Bo tur e kosnan akí boluntariamente i ku un kurason sinsero. I ku alegria mi a weta kon bo pueblo ku ta aki presente spontáneamente a trese regalo pa Bo.

¹⁸ SEÑOR, Dios di nos grandinan Abraham, Isak i Israel, laga e sintimentu akí keda semper den kurason di bo pueblo i hasi pa nan dediká henter nan bida na Bo.

¹⁹ Laga mi yu Salomon sirbi Bo di henter su kurason, pa e kumpli ku bo mandamentunan, bo preseptonan i bo leinan i traha e tèmpel ku mi a diseñá.’

Salomon ta subi trono

²⁰ Despues Salomon a bisa henter e pueblo ku a bini huntu: ‘Alabá SEÑOR, boso Dios, awor.’ E ora ei henter e pueblo reuní a alabá SEÑOR, e Dios di nan grandinan; nan a hinka rudia i a baha nan kabes te na suela pa SEÑOR i pa rei.

²¹ E dia siguiente nan a mata mil toro, mil chubat'i karné i mil karné i a ofresé nan komo sakrifisio di kandela na Dios huntu ku ofrenda di biña i otro sakrifisio na gran kantidat pa henter Israel.

²² Nan a kome i bebe e dia ei den presensia di SEÑOR i nan tabata hopi kontentu. Pa di dos bia nan a proklamá Salomon, yu di David, rei. Nan a konsagrá Salomon i Sadok, tur dos den sirbishi di SEÑOR, Salomon komo rei, Sadok komo saserdote.

²³ E ora ei Salomon a bai sinta riba trono di SEÑOR i a sigui su tata David komo rei. Kos tabata bai bon p'e di manera ku henter Israel tabata obedes'é.

²⁴ Tur e lidernan i e sòldánan mas balente i tur e yu hòmbernan di rei David tambe a primintí ku nan ta keda fiel n'e.

²⁵ Henter Israel a keda hopi impreshoná pa e grandesa ku Salomon a haña di SEÑOR. SEÑOR a dun'é poder i grandesa manera nunka ningun rei di Israel tabatin promé.

Resúmen di gobièrnu di David

²⁶ David, yu di Ishai, a goberná henter Israel.

²⁷ Na tur el a goberná kuarenta aña: shete aña na Hebron i trintitres na Herusalèm.

²⁸ Dia el a muri na edat altu, despues di un bida yen di rikesa i honor, su yu Salomon a siguié komo rei.

²⁹ Historia di rei David ta skibí for di kuminsamentu te fin den krónikanan di e vidente Samuel i di profeta Natan i den esnan di e vidente Gad.

³⁰ Nan a skibi tokante su reino, su poder, en breve tur loke e mes, Israel i tur e otro reinonan di mundu a pasa aden.