1 Krónikanan 27 - Papiamentu Bible 2013

Organisashon di ehérsito

¹ Aki ta sigui lista di e israelitanan ku tabata den sirbishi di rei: kabesnan di famia, òfisirnan di alto rango i di rango mas abou, i atministradónan. Nan funshon tabatin di aber ku e divishonnan di ehérsito ku bùrt pa bùrt mester a subi warda pa un luna, miéntras ku un otro tabata baha. Kada divishon tabata konsistí di 24.000 hòmber.

² Yashobeam, yu di Zabdiel, di famia Pèrèsh, tabata komandante di e promé divishon di 24.000 hòmber ku mester a presentá den e promé luna.

³ E tabata na kabes di tur e komandantenan di ehérsito.

⁴ Dodai, di famia Ahoag, tabata komandante di e di dos divishon di 24.000 hòmber ku mester a presentá den e di dos luna. Miklot tabata e òfisir di rango mas altu den divishon di Dodai.

⁵ Benayahu, yu di saserdote Yoyada, tabata komandante di e di tres divishon di 24.000 hòmber ku mester a presentá den e di tres luna.

⁶ Benayahu tabata un di e trinta balentenan; tempu el a bira kabes di e grupo su yu Amizabad a tuma mando di su divishon over.

⁷ Asael, ruman di Yoab, tabata komandante di e di kuater divishon di 24.000 hòmber, ku mester a presentá den e di kuater luna. Despues su yu Zebadías a bira komandante na su lugá.

⁸ Shamhut, desendiente di Yisrag, tabata komandante di e di sinku divishon di 24.000 hòmber ku mester a presentá den e di sinku luna.

⁹ Ira, yu di Ikesh di Tekoa, tabata komandante di e di seis divishon di 24.000 hòmber ku mester a presentá den e di seis luna.

¹⁰ Hèlès di Bet-Pèlèt, di tribu di Efraim, tabata komandante di e di shete divishon di 24.000 hòmber ku mester a presentá den e di shete luna.

¹¹ Sibkai di Husha, di famia Zèrag, tabata komandante di e di ocho divishon di 24.000 hòmber ku mester a presentá den e di ocho luna.

¹² Abiezèr di Anatot den region di Benhamin, tabata komandante di e di nuebe divishon di 24.000 hòmber ku mester a presentá den e di nuebe luna.

¹³ Marai di Netofa, di famia Zèrag, tabata komandante di e di dies divishon di 24.000 hòmber ku mester a presentá den e di dies luna.

¹⁴ Benayahu di Piraton den region di Efraim, tabata komandante di e di diesun divishon di 24.000 hòmber ku mester a presentá den e di diesun luna.

¹⁵ Hèldai di Netofa i un desendiente di Otniel, tabata komandante di e di diesdos divishon di 24.000 hòmber ku mester a presentá den e di diesdos luna.

Kabesnan di tribu

¹⁶ Na kabes di Israel tabata: di tribu di Ruben: Eliezer, yu di Zikri; di Simeon: Shefatías, yu di Maaka;

¹⁷ di Levi: Hashabías, yu di Kemuel; di Aaron: Sadok;

¹⁸ di Huda: Elihu, un ruman di David; di Isakar: Omri, yu di Mikael;

¹⁹ di Zebulon: Yishmaías, yu di Obadías; di Naftali: Yerimot, yu di Azriel;

²⁰ di Efraim: Hosea, yu di Azaziahu; di Manase, parti wèst: Yoel, yu di Pedaías;

²¹ di Manase, parti ost: Yido, yu di Zekarías; di Benhamin: Yaasiel, yu di Abner;

²² di Dan: Azarel, yu di Yeroham. Nan tabata lider di e tribunan di Israel.

²³ David no a laga konta e hòmbernan di binti aña òf mas hóben, pasobra SEÑOR a primintí ku lo E hasi pueblo di Israel mes tantu ku strea na shelu.

²⁴ Sí t'asina ku Yoab, yu di Seruya, a kuminsá ku un senso, pero e no a kaba, pasobra SEÑOR a bira furioso riba e asuntu ei i a kastigá Israel. P'esei no a nota e kantidat ei den lista di krónika di rei David.

Wardadónan di propiedat real

²⁵ Azmawèt, yu di Adiel, tabatin e depósitonan real na Herusalèm na su enkargo; Yonatan, yu di Uzías, tabatin e depósitonan den kunuku, den siudatnan, den pueblonan i den e torennan di defensa na su enkargo.

²⁶ Ezri, yu di Kelub, tabata na kabes di e trahadónan den kunuku.

²⁷ Shimi di Rama tabatin e kunukunan di wendrùif na su enkargo. Zabdi di Shefam tabatin e depósitonan di biña pa yena boko na su enkargo.

²⁸ Baal-Hanan di Guèdèr tabatin e palunan di oleifi i e figonan shimaron den Sabana di Shefela na su enkargo. Yoash tabatin e depósitonan di warda zeta di oleifi na su enkargo.

²⁹ Shitrai di Sharon tabatin e bestianan di kria na Sharon na su enkargo. Shafat, yu di Adlai, tabatin e bestianan di kria den e vayenan na su enkargo.

³⁰ Obil di Ismael tabatin e kamelnan na su enkargo. Yègdeyahu di Meronot tabatin e burikunan muhé na su enkargo.

³¹ Yaziz di tribu di Hagar tabatin e karnénan i e kabritunan na su enkargo. Tur e personanan akí tabata enkargá ku kuido di propiedat real.

E hendenan mas yegá di David

³² Yonatan, tio di David, tabata un konsehero inteligente, e tabata sekretario tambe; Yehiel, yu di Hakmoni, tabata enkargá ku enseñansa di e prínsipenan.

³³ Ahitofèl tambe tabata konsehero di rei. E arkita Hushai tabata amigu i hende di konfiansa di rei.

³⁴ Despues di morto di Ahitofèl, Yoyada, yu di Benayahu, i Abyatar, a remplas'é. Yoab tabata komandante di ehérsito.