1 Krónikanan 24 - Papiamentu Bible 2013

Diferente grupo di saserdote

¹ E saserdotenan, desendiente di Aaron, tambe tabata partí den diferente grupo. Aaron tabata tin kuater yu hòmber: Nadab, Abihu, Eleazar i Itamar.

² Nadab i Abihu a muri promé ku nan tata. Nan no tabatin yu, p'esei Eleazar i Itamar a keda ehersé e funshon di saserdote.

³ Ku yudansa di Sadok, desendiente di Eleazar, i Ahimelèk, desendiente di Itamar, David a parti e saserdotenan den gruponan di sirbishi.

⁴ Awor a resultá, ku e kantidat di hende hòmber den e desendientenan di Eleazar tabata mas grandi ku den e desendientenan di Itamar. P'esei a parti nan di tal manera ku e kabesnan di famia Eleazar ku nan famianan tabata forma diesseis grupo di sirbishi i esnan di famia Itamar ocho so!

⁵ A tira lòt pa disidí sekuensia di e gruponan, pasobra den tur dos famia, tantu den esun di Eleazar komo den esun di Itamar tabatin gerente di santuario, yamá tambe ‘Gerente den sirbishi di Dios’.

⁶ Sekretario Shemaías, yu di Netanel, un levita, a inskribí tur e nòmbernan. Na e okashon akí tabata presente, rei, e lidernan di pueblo, saserdote Sadok, Ahimelèk, yu di Abyatar, kabesnan di famia di e saserdotenan i di e levitanan. Tabata tira lòt pa saka esun ku ta na turno: dos lòt pa e desendientenan di Eleazar i un pa esnan di Itamar.

⁷ Bintikuater lòt a kai konsekutivamente riba: Yoyarib Yedaías

⁸ Harim Seorim

⁹ Malkías Miamin

¹⁰ Hakos Abías

¹¹ Yeshua Shekanías

¹² Elyashib Yakim

¹³ Hupa Yeshèbab

¹⁴ Bilga Imer

¹⁵ Hezir Hapises

¹⁶ Petaías Yehèzkel

¹⁷ Yakin Gamul

¹⁸ Delaías Maazías.

¹⁹ Di akuerdo ku e gruponan di sirbishi akí, e saserdotenan mester a bai tèmpel i tene sirbishi segun e reglanan ku nan antepasado Aaron a duna, riba òrdu di SEÑOR, Dios di Israel.

Lista adishonal di levita

²⁰ Tabatin mas kabes di famia levita, esta: Yègdeyahu, ku pa parti di Shubael tabata desendiente di Amram;

²¹ Yishías, desendiente di Rehabías;

²² Yahat, ku pa parti di Yishar tabata desendiente di Shelomit;

²³ Yeriahu, Amarías, Yahaziel i Yekamam, kuater yu hòmber di Gebron, segun nan edat;

²⁴ Shamir, ku pa parti di Mikas tabata desendiente di Uziel;

²⁵ Zekarías, ku tabata desendiente di Yishías, ruman hòmber di Mikas;

²⁶ Magli i Mushi, desendiente di Yaaziahu, yu hòmber di Merari,

²⁷ ademas Shoham, Zakur i Ibri tambe tabata yu di Yaaziahu,

²⁸ e dos yu hòmbernan di Magli tabata Elazar i Kish. Elazar no tabatin yu,

²⁹ Kish tabatin un yu hòmber, Yeragmeel.

³⁰ Magli, Edèr i Yerimot tabata desendiente di Mushi. Esaki tabata e famianan levita.

³¹ Meskos ku e saserdotenan, desendiente di Aaron, ku tabata nan famia, nan a tira lòt pa e sekuensia pa tene sirbishi. A trata e famia di e ruman mayó meskos ku esun di e di mas chikí. Na e akto akí tabata presente, rei David, Sadok, Ahimelèk i e kabesnan di famia di saserdotenan i di levitanan.