1 Krónikanan 23 - Papiamentu Bible 2013

Repartishon di tarea di levitanan

¹ Ora David a bira bieu i su dianan tabata kontá, el a nombra su yu Salomon komo rei di Israel.

² E ora ei el a laga tur lider di Israel, saserdote i levita bini huntu.

³ El a laga konta tur levita hòmber di trinta aña p'ariba. Nan a konta un kantidat di 38.000 hende.

⁴ Di e hòmbernan akí David a nombra 24.000 pa sirbishi di tèmpel, 6000 komo atministradó i hues,

⁵ 4000 pa bira guardia na entradanan di tèmpel i 4000 komo músiko. Nan mester a alabá SEÑOR dor di toka e instrumèntnan ku David a laga traha ku e meta ei.

⁶ David a parti nan den grupo segun nan desendensia di Guershon, Kehat i Merari, yunan di Levi.

⁷ Na famia Guershon tabata pertenesé: Ladan i Shimi.

⁸ Yehiel, Zetam i Yoel tabata desendiente di Ladan. Yehiel tabata esun mas importante.

⁹ Ademas tabatin Shelomit, Haziel i Haran; nan tres tabata yu di un otro Shimi. Tur e hòmbernan akí tabata kabes di famia Ladan.

¹⁰ Yahat, Ziza, Yeus i Berías tabata desendiente di e promé Shimi.

¹¹ Yahat tabata esun mas importante, siguí pa Ziza; pero Yeus i Berías no tabatin hopi desendiente, p'esei a forma ún grupo di nan famianan.

¹² Kehat tabatin kuater yu hòmber: Amram, Yishar, Gebron i Uziel.

¹³ Amram tabata tata di Aaron i Moises. Aaron i su yu hòmbernan a haña un tarea spesial. Nan mester a dediká nan mes pa semper na sirbishi den e lugá santísimo. Riba altá nan mester a kima ofrendanan hasí na SEÑOR, pa sirbiÉ i nan mester a bendishoná pueblo den su nòmber.

¹⁴ Enkuanto e desendientenan di Moises, hòmber di Dios, nan tabata kontá den tribu di Levi.

¹⁵ E yunan di Moises tabata Guershom i Eliezer.

¹⁶ E desendiente mas importante di Guershom tabata Shebuel.

¹⁷ Eliezer tabatin un yu so, yamá Rehabías. Pero Rehabías tabatin mashá hopi desendiente.

¹⁸ Yishar, di dos yu di Kehat, tabata tata di Shelomit, kabes di famia.

¹⁹ Gebron, di tres yu di Kehat, tabatin kuater yu hòmber: Yeriahu, esun di mas importante, Amarías, Yahaziel i Yekamam.

²⁰ Uziel, e di kuater yu di Kehat, tabatin dos yu hòmber: Mikas, esun mas importante, i Yishías.

²¹ Merari tabatin dos yu hòmber: Magli i Mushi. Magli tabata tata di Elazar i Kish.

²² Elazar a muri sin yu hòmber, e tabatin yu muhé so. Nan a kasa ku nan primunan, yunan di Kish.

²³ Mushi tabatin tres yu hòmber: Magli, Edèr i Yeremot.

^24-27 E kabesnan di famia akí di e desendientenan di Levi a haña tarea pa, huntu ku nan famia, perkurá pa sirbishi di tèmpel. A konta esnan di binti aña p'ariba i a inskribí kada un den registro di nòmbernan. Na último ora David mes a regla e asuntu akí. El a bisa: ‘SEÑOR, Dios di Israel, a duna su pueblo trankilidat. E ke biba semper na Herusalèm, ya e levitanan no tin nodi di transportá e tènt sagrado ni e ophetonan di uso ora di sirbishi.

²⁸ Na lugá di esei, nan mester yuda e saserdotenan, desendiente di Aaron, ora di sirbishi den tèmpel. Nan ta responsabel pa kuido di e plenchi i kambernan. Nan mester perkurá pa e ophetonan sagrado ta limpi. Tambe nan ta responsabel pa tur otro trabou ora di sirbishi den tèmpel.

²⁹ Nan ta perkurá pa pan konsagrá, pa hariña fini pa ofrenda vegetal, pa kuki plat, trahá sin zürdeg, pa e kasuela pa traha pan ariba, pa e mansa i pa tur e peso- i midínan.

³⁰ Ademas tur mainta i tur anochi nan mester para kla pa honra SEÑOR ku kantika di alabansa i gratitut.

³¹ Kada be ku ofresé SEÑOR sakrifisionan di kandela, esta riba dia di sabat, luna nobo i fiestanan grandi, nan mester presentá dilanti di SEÑOR den e kantidat fihá.

³² E levitanan tin ku perkurá tambe pa e tènt di enkuentro i e santuario pasobra nan mester yuda nan famianan, desendientenan di Aaron, ora di sirbishi den tèmpel.’