1 Krónikanan 21 - Papiamentu Bible 2013

David ta tene un senso

¹ Un dia Satanas a disidí di hasi Israel daño dor di hinka David den tentashon pa tene un senso na Israel.

² E ora ei David a ordená Yoab i e hefenan di ehérsito: ‘Boso bai konta kuantu israelita tin for di Dan den nort te Beer-Shèba den zùit; trese e resultado pa mi, pa mi sa ta kuantu hende tin na Israel.’

³ Yoab a bisa rei: ‘Mare SEÑOR por hasi su pueblo shen bia mas tantu ku e ta awor akí! N' ta nan tur ta sirbidó di su mahestat? Pakiko rei ta eksigí un kos asina? Pakiko hinka Israel den piká?’

⁴ Sinembargo Yoab mester a tuma aden pa kumpli ku e òrdu di rei. Asina Yoab a kohe kaminda pa pasa dor di henter Israel. Despues di esei el a bini Herusalèm bèk.

⁵ El a partisipá David resultado di e senso. Den henter Israel tabatin 1.100.000 sòldá ku por a bringa den guera i den Huda 470.000.

⁶ E tribunan di Levi i Benhamin, Yoab no a konta aden, pasobra e tabata detestá e òrdu di rei.

Dios ta kastigá David

⁷ Dios tambe tabata mashá disgustá ku e òrdu i a kastigá Israel.

⁸ David a bisa Dios: ‘Ta un piká grandi mi a hasi. Mi ta roga Bo, kita e fayo akí for di bo sirbidó, mi a aktua manera un hende sin sintí.’

⁹ Un vidente den servisio di David, e profeta Gad, a risibí un mensahe di SEÑOR:

¹⁰ ‘Bai partisipá David lo siguiente: “SEÑOR ta bisa: Mi ta proponé bo tres kos. Skohe un di nan i esei Mi ta laga pasa ku bo.” ’

¹¹ Despues Gad a bai serka David i bis'é: ‘Ata un palabra di SEÑOR: Skohe kua bo ke,

¹² sea tres aña di hamber grandi; òf hui tres luna pa bo enemigunan ku ta buska bo pa mata; òf pèster, e spada di SEÑOR, ta suta e pais tres dia largu i angel di SEÑOR ta mata hopi hende den henter Israel. Disidí kiko mi mester kontestá Esun ku a manda mi.’

¹³ David a kontestá Gad: ‘Mi ta haña mi den un pèrtá grandi. Mihó mi kai den man di SEÑOR, pasobra su mizerikòrdia ta mashá grandi, pero no laga mi kai den man di hende.’

¹⁴ Asina a sosodé ku SEÑOR a manda pèster riba Israel; 70.000 israelita a muri.

¹⁵ Dios a manda su angel Herusalèm tambe pa destruí e siudat, pero ora el a kuminsá hasié, SEÑOR a haña duele di e daño ku El a okashoná. P'esei El a bisa e angel di destrukshon: ‘Basta! Baha bo man!’ E momento ei e angel di SEÑOR tabata pará banda di e plenchi di bati trigo di Ornan, e yebusita.

¹⁶ Ora David a hisa su kara, el a mira e angel pará meimei di shelu i tera. Den su man e tabatin un spada, e tabata ten'é na altu riba Herusalèm. David i e ansianonan di pueblo tur bistí na paña di rou, a tira nan kurpa plat abou na suela.

¹⁷ E ora ei David a bisa Dios: ‘Pero no t'ami a duna òrdu pa konta e hendenan? T'ami a peka, t'ami a hasi mashá malu. E pober karnénan akí, kiko nan a hasi? Laga bo kastigu kai riba ami ku mi famia, SEÑOR, mi Dios, pero no mishi ku bo pueblo!’

David ta traha un altá

¹⁸ E angel a manda Gad bisa David e ora ei ku e mester subi seru bai e plenchi di bati trigo di Ornan, e yebusita, i ku e mester lanta un altá aya pa SEÑOR.

¹⁹ David a bai hasi loke Gad a bis'é na nòmber di SEÑOR.

²⁰ Nèt Ornan tabata bati trigo huntu ku su kuater yu hòmbernan. Na un dado momento el a drei mira e angel. Su yunan a kore bai skonde.

²¹ Ora Ornan a hisa kara, el a weta David ta bini serka dje. El a kana bai for di e plenchi di bati maishi i a bùig te na suela pa demostrá David rèspèt.

²² David a bisa Ornan: ‘Bo por bende mi e pida tereno kaminda bo plenchi di bati maishi ta? Mi ke traha un altá pa SEÑOR ei ya asina e pèster por laga e pueblo. Mi ta paga bo loke e ta bal.’

²³ Ma Ornan a kontestá David: ‘Tum'é numa; mi shon rei por hasi kiko mi shon ke. Mi ta duna e bakanan ku mi ta usa awor akí, pa kima riba altá, e garoshi ku nan ta hala por sirbi pa palu di kandela i e trigo pa un ofrenda vegetal. Mi ta duna rei tur kos pòrnada.’

²⁴ Pero rei a bisa Ornan: ‘Nò, en todo kaso mi ke kumpr'é pa loke e ta bal. Mi no ke kita bo propiedat for di bo pa duna SEÑOR ni mi no ke ofresé SEÑOR sakrifisionan di kandela ku no a kosta mi nada.’

²⁵ E ora ei David a paga Ornan 600 moneda di oro.

²⁶ El a lanta un altá pa SEÑOR einan, a ofresé sakrifisio di kandela i sakrifisio di pas i a resa na SEÑOR. SEÑOR a kontestá dor di laga un kandela kai for di shelu riba e altá i kima e sakrifisio.

²⁷ E ora ei SEÑOR a ordená e angel pa hinka su spada den baliña.

²⁸ Na momento ku David a mira ku SEÑOR a kontest'é riba e plenchi di bati maishi di Ornan, e yebusita, David a ofresé SEÑOR un sakrifisio ei.

²⁹ E tempu ei e tènt sagrado ku Moises a traha den desierto i e altá di sakrifisio di kandela tabata riba e seritu di sakrifisio na Guibeon.

³⁰ Pero David no por a bai aya pa konsultá SEÑOR, pasobra e tabata yen di miedu di e spada di e angel di SEÑOR.