1 Krónikanan 17 - Papiamentu Bible 2013

Dios ta primintí di bendishoná David

¹ Ora David ya tabata biba den su palasio, un dia el a bisa profeta Natan: ‘Manera bo por mira, mi ta biba den un palasio trahá di palu di seder, miéntras e arka di aliansa di SEÑOR ta pará den un tènt.’

² Natan a kontestá David: ‘Hasi loke bo kurason bisa bo, pasobra Dios ta ku bo.’

³ Pero e anochi ei mes SEÑOR a papia ku Natan i bis'é:

⁴ ‘Bai i bisa mi sirbidó David ku Ami, SEÑOR, ta bisa: “N' t'abo lo traha un kas pa Mi biba aden,

⁵ pasobra fo'i dia ku Mi a saka e israelitanan for di Egipto te awor akí Mi no a biba den un kas. Semper ta den tènt so Mi a biba i Mi tabata biaha di un lugá pa otro.

⁶ Miéntras Mi tabata biaha ku tur e israelitanan, nunka Mi a pidi traha un kas pa Mi? Nunka Mi a yega di puntra un di e huesnan ku Mi a enkargá ku kuido di mi pueblo: Pakiko boso no ta traha un kas di palu di seder pa Mi?”

⁷ Awèl, bisa mi sirbidó David lo siguiente: “SEÑOR soberano ta bisa asin'akí: Mi a saka bo for di tras di e karnénan den kunuku pa bo ta hefe di mi pueblo Israel;

⁸ i unda ku bo a bai Mi a bai ku bo. Mi a kaba ku tur bo enemigunan. Mi a hasi bo nòmber mes famoso ku di esnan importante di mundu.

⁹ Mi a prepará un lugá pa mi pueblo, Israel, kaminda e por keda biba, ya mi pueblo por biba na su mes lugá. Lo e no tembla mas i malechornan lo no oprimié mas manera ántes,

¹⁰ tempu Mi a pone huesnan goberná mi pueblo Israel. Mi ta someté tur bo enemigunan na bo. Awor Ami, SEÑOR, ta anunsiá bo ku ta Ami lo traha bo kas pa bo.

¹¹ Dia bo bida yega na su fin i bo bai sosegá serka bo antepasadonan, e dia ei lo Mi laga un di bo desendientenan, un di bo mes yunan, sigui bo i lo Mi sòru pa su reinado keda firme pa semper.

¹² T'e lo traha un kas pa Mi i Ami lo sòru pa su trono para firme pa semper.

¹³ Ami lo ta un tata p'e i lo e ta un yu pa Mi. Lo Mi no laga di ta fiel n'e, manera Mi a hasi ku Saul, bo predesesor.

¹⁴ Lo Mi dun'é un lugá fiho den mi kas i mi reino i pa semper su trono lo para firme.” ’

¹⁵ Natan a konta David tur e kosnan akí presis manera el a mira i a tende nan den e vishon.

Orashon di David

¹⁶ E ora ei David a drenta e tènt kaminda e arka tabata, el a kai sinta dilanti di SEÑOR i bisa: ‘SEÑOR, mi Dios, ken mi ta, kiko mi famia ta ku Bo a laga mi yega asina leu?

¹⁷ I komo si fuera esaki no ta basta den bo bista, mi Dios, Bo a papia tokante futuro di e dinastia di bo sirbidó. Bo ta trata mi komo un hende di alta kategoria, SEÑOR Dios.

¹⁸ Kiko mas mi por bisa Bo? Bo a demostrá mi un honor grandi. Bo konosé bo sirbidó.

¹⁹ Ta pa motibu ku bo ta stima mi i ku Bo ta aktua segun bo plan, Bo a hasi tur e kosnan grandi akí i anunsiá nan na bo sirbidó.

²⁰ Manera nos a tende semper, no tin manera Bo ni no ta eksistí niun otro dios ku no ta Abo.

²¹ I loke ta trata Israel, bo pueblo, no tin manera e; e ta e úniko nashon riba mundu, ku Abo, Dios, a sali bai kumpra liber pa ta bo pueblo i pa asina Bo haña fama. Bo a hasi kosnan grandi i spantoso, ora Bo a kore ku e otro nashonnan pa bo pueblo, ku Bo a saka for di Egipto.

²² Asina Bo a hasi Israel bo pueblo pa semper, i Abo SEÑOR, a bira su Dios.

²³ Laga awor antó, SEÑOR, loke Bo a primintí bo sirbidó i su kas real sosodé, kumpli ku bo promesa.

²⁴ E ora ei por konfia den bo Nòmber ku lo ta grandi pa semper i nan lo bisa: “SEÑOR Soberano, e Dios di Israel, ta berdaderamente un Dios pa Israel.” I e kas real di David lo keda para firme bou di bo protekshon.

²⁵ Abo mes, mi Dios, a revelá mi ku Bo ta traha un kas pa mi. P'esei bo sirbidó ta tribi hasi e orashon akí na Bo.

²⁶ Abo, SEÑOR, Bo ta Dios, Bo a primintí bo sirbidó e felisidat akí.

²⁷ Sea asina bon di bendishoná mi kas real pa e keda para semper firme bou di bo protekshon. Pasobra loke Abo, SEÑOR, bendishoná ta bendishoná pa semper.’