1 Krónikanan 16 - Papiamentu Bible 2013

¹ Ora nan a hiba e arka di Dios den Siudat di David, nan a pon'é meimei di e tènt ku David a laga arma pa e arka. Despues nan a ofresé sakrifisionan di kandela i sakrifisionan di pas na Dios.

² Ora David a kaba di ofresé e sakrifisionan ei, el a bendishoná e pueblo den nòmber di SEÑOR,

³ i a duna henter pueblo di Israel, hòmber i muhé, kada un un pan, un bola di dadel i un bola di rasenchi.

⁴ David a nombra algun levita pa tene sirbishi dilanti di e arka di SEÑOR; nan mester a invoká, gradisí i alabá SEÑOR, Dios di Israel.

⁵ Asaf tabata e kabes i Zekarías tabata remplas'é. Ademas el a nombra Yeiel, Shemiramot, Yehiel, Matitías, Eliab, Benayahu, Obed-Edom i Yeiel pa nan toka arpa i siter i Asaf mester a toka e platíonan.

⁶ E saserdotenan Benayahu i Yahaziel tabatin ku toka tròmpèt regularmente dilanti di e arka di aliansa di Dios.

Kanto di alabansa

⁷ T'e dia ei, pa di promé bia, David a ordená Asaf i su kompañeronan kanta SEÑOR su alabansa na e siguiente manera:

⁸ Alabá SEÑOR, invoká su Nòmber, laga pueblonan tende di su obranan grandi!

⁹ Boso kanta p'E, toka arpa na su honor i konta di tur obra milagroso di su man.

¹⁰ Sinti boso orguyoso di su Nòmber santu, laga esnan ku ta buska SEÑOR ta kontentu!

¹¹ Puntra pa SEÑOR, akudí na su poder, buska su kara tur ora bai!

¹² Rekordá e kosnan milagroso k'El a hasi, su señalnan, e òrdunan ku ta sali fo'i su boka,

¹³ boso, famia di Abraham, Dios su sirbidó, yunan di Yakob, ku El a elegí.

¹⁴ T'E ta SEÑOR, nos Dios, su òrdunan ta konta pa henter mundu.

¹⁵ E ta kòrda su aliansa eternamente, su promesa na mil generashon,

¹⁶ e pakto, será ku Abraham, e huramentu hasí na Isak,

¹⁷ konfirmá komo lei pa Yakob, un aliansa eterno ku Israel:

¹⁸ ‘Mi ta duna boso tera di Kanaan; Mi ta lag'é pa boso komo herensia pa tur generashon.’

¹⁹ Tempu nan tabata poko ainda, — kasi nada — i strañero den tera

²⁰ i tabata dualu di pueblo pa pueblo, di un reino pa un otro nashon,

²¹ E no a laga ningun hende oprimí nan; reinan El a skual pa nan motibu:

²² ‘No mishi ku nan, nan ta sagrado, no hasi mi profetanan daño!’

²³ Kanta pa SEÑOR, mundu henter! Proklamá su salbashon tur dia bai.

²⁴ Konta tur pueblo di su gloria, tur nashon di su gran maravianan,

²⁵ pasobra SEÑOR ta grandi, mashá famoso, mas temibel ku tur otro dios.

²⁶ Tur dios di otro pueblo — falsu! E, SEÑOR, ta Kreador di firmamentu.

²⁷ Den su presensia tin gloria i mahestat, kaminda E ta biba poder i alegria.

²⁸ Duna SEÑOR, famia di pueblonan, duna SEÑOR su gloria i poder.

²⁹ Duna su Nòmber e gloria debí, presentá su dilanti ku regalo. Ador'É ku realse dibino;

³⁰ tembla p'E henter mundu. Sí, mundu ta duru pará, inmovibel.

³¹ Laga shelu ta kontentu, tera kanta, bisa tur nashon: ‘SEÑOR ta rei!’

³² Laga laman ronka ku loke tin den dje, kunuku i tur su matanan fiesta,

³³ palunan di mondi hubilá pa SEÑOR, pasobra E ta bini pa husga mundu.

³⁴ Alabá SEÑOR komo E ta bon; pasobra su amor ta eterno!

³⁵ PidiÉ: ‘Libra nos, o Dios, Bo ta nos Salbador, bolbe trese nos huntu, libra nos for di meimei di pueblonan, pa nos gradisí bo Nòmber santu i ku orguyo proklamá bo alabansa.

³⁶ Bendishoná sea SEÑOR, Dios di Israel, pa semper te den tur eternidat!’ Henter pueblo a bisa: ‘Amèn!’, i ‘Alabá SEÑOR!’

Kulto religioso na Herusalèm i Guibeon

³⁷ Asina David a laga Asaf i su kompañeronan dilanti di arka di aliansa di SEÑOR pa nan tene sirbishi kada dia segun tabata preskribí pa e dia ei.

³⁸ Obed-Edom, su 68 koleganan i un otro Obed-Edom, yu di Yedutun, i Hosa tabata guardia na entradanan.

³⁹ Saserdote Sadok i e otro saserdotenan tabata enkargá ku sirbishi riba e seritu di sakrifisio na Guibeon kaminda e tènt sagrado tabata.

⁴⁰ Tur mainta i tur anochi nan mester a ofresé sakrifisio na SEÑOR riba e altá di sakrifisio di kandela. Nan mester a atené nan na tur e reglanan ku SEÑOR a preskribí den su lei pa Israel.

⁴¹ Heman i Yedutun tabata huntu ku nan. Nan i algun hòmber mas, ku nan nòmber ta menshoná kaba, tabata skohí pa kanta na SEÑOR: ‘Su amor ta eterno!’

⁴² Heman i Yedutun a perkurá pa e tròmpèt-, platío- i otro instrumèntnan. Nan tabata toka riba nan ora tabata kanta kantika na honor di Dios. Miembronan di e grupo di Yedutun tambe tabata guardia na e entradanan.

⁴³ E ora ei tur hende a bai kas bèk. David tambe a bai kas pa kumindá su famia.