1 Korintionan 9 - Papiamentu Bible 2013

Derecho di un apòstel

¹ Mi no ta un hòmber liber? Mi no ta apòstel? Mi no a mira Hesus, nos Señor? Akaso boso no ta fruta di mi trabou pa Señor?

² Maske otro hende no aseptá mi komo apòstel, boso sí mester aseptá mi! Pasobra e echo ku boso ta biba den union ku Señor, ta proba ku mi ta un apòstel.

³ Di e siguiente manera mi ta defendé mi kurpa kontra esnan ku ta kritiká mi:

⁴ Nos no tin derecho di haña algu di kome i bebe?

⁵ Nos no tin derecho di biaha ku un kasá kristian manera e otro apòstelnan, e rumannan di Señor i Kefas ta hasi?

⁶ Òf t'ami ku Barnabas so no tin derecho di keda sin traha?

⁷ Kua sòldá den ehérsito ta paga su mes suèldu? Kua kunukero ta planta un hòfi di wendrùif i keda sin kome di e frutanan? Kua wardadó di karné nunka no ta usa lechi di su mes karnénan?

⁸ Loke mi ta bisa no ta fo'i un punto di bista netamente humano. Akaso Lei di Moises no ta bisa meskos?

⁹ Den dje tin skibí: ‘No bisti un bue bosal, ora boso ta us'é pa trabou di bati trigo.’ Esei ke men ku Dios ta preokupá pa e buenan

¹⁰ òf ta tokante nos esaki ta trata? Ta bon kla ku ta pa nos tin skibí ku e hòmber ku plug òf esun ku kosechá mester hasi su trabou ku speransa di haña un parti di e kosecha.

¹¹ Nos a sembra un simia spiritual meimei di boso. Ta di mas ku nos ta spera di kosechá benefisio material fo'i boso?

¹² Si otro por reklamá boso e derecho ei, nos derecho no ta muchu mas grandi? Pero nos no a hasi uso di e derecho ei. Nos a preferá di sufri tur sorto di kos pa no stroba predikamentu di e bon notisia di Kristu-Hesus.

¹³ Boso no sa ku esnan ku ta traha den tèmpel ta haña nan kuminda ei? Un parti di loke ta sakrifiká den tèmpel ta bai pa esnan ku ta ofresé sakrifisio pa e pueblo den tèmpel.

¹⁴ Meskos asina Señor a duna òrdu pa esnan ku ta prediká e bon notisia biba di e trabou ei.

¹⁵ Ma mi no a hasi uso di ningun di e derechonan ei ni mi no ta skibi esaki pa reklamá e derechonan ei pa mi mes. Ai, mi ta preferá di muri promé! Niun hende lo no bai kita e motibu ku mi tin pa broma fo'i mi!

¹⁶ Pasobra no ta e echo ku mi ta proklamá e bon notisia ta motibu pa broma. Mi ta prediká, pasobra mi mester hasié! Ai di mi, si mi no prediká e bon notisia!

¹⁷ Awor si mi ta prediká pasobra mi mes a disidí, lo mi tabatin derecho riba un rekompensa; pero no ta asina, ta un tarea ku Dios a konfia na mi.

¹⁸ Kiko ta mi rekompensa antó? Wèl, e privilegio di prediká e bon notisia sin kobra i hasi uso di e derechonan ku mi tin komo predikador.

¹⁹ Ounke mi ta liber i mi no ta katibu di niun hende, mi a hasi mi mes katibu di tur hende pa gana mas tantu hende posibel pa Kristu.

²⁰ Tempu mi tabata traha bou di e hudiunan, mi tabata biba manera hudiu pa asina mi gana nan. Ounke mi mes no ta kai bou di lei di Moises, mi tabata biba komo si fuera mi tabata kai bou di lei, pa asin'ei mi por gana esnan ku ta bou di lei.

²¹ Di e manera ei mi tabata biba manera no hudiu, ora mi tabata traha bou di e no hudiunan pa mi gana nan pa Kristu. Esei no ke men ku mi no tabata obedesé lei di Dios mas, sino mi ta obedesé lei di Kristu!

²² Mi a bira débil pa esnan ku ta débil, pa asina gana nan pa Kristu. Mi a tuma estilo di bida di tur sorto di hende, pa di e manera ei mi por salba algun di nan.

²³ Mi ta hasi tur kos pa kousa di e bon notisia, ya mi por tuma parti den su bendishonnan.

²⁴ Boso sa ku di tur e atletanan ku ta kore den un kareda, ta ún so ta bai ku e premio. Wèl, kore di moda ku boso ta gana e premio!

²⁵ Tur atleta ku ta kompetí ta pone un disiplina fuerte riba nan kurpa. Anto nan ta hasié pa un korona ku no ta dura; nos ta hasié pa un korona duradero.

²⁶ Ta p'esei mi ta kore stret den direkshon di e meta final; mi no ta manera un bòksdó ku ta tira moketa pa loko.

²⁷ Al kontrario, mi ta kohe mi kurpa ku sla pa e bira duru i keda disipliná, ya mi mes no ta keda deskualifiká despues di a prediká pa otro hende.