1 Korintionan 16 - Papiamentu Bible 2013

Kontribushon pa e iglesia na Herusalèm

¹ Ban pasa awor pa e tópiko tokante kolekshon di sèn pa esnan na Hudea ku ta pertenesé na e pueblo santu. Hasi esei segun e instrukshonnan ku mi a duna e iglesianan na provinsia di Galasia.

² Riba djadumingu kada un di boso mester pone algu un banda segun boso forsa i ward'é pa ora mi yega, boso no tin nodi di kolektá sèn.

³ I ora mi yega, lo mi laga algun hende ku boso aprobá, hiba e sèn Herusalèm ku un karta di rekomendashon.

⁴ Si ta bale la pena pa mi mes bai, nan por biaha huntu ku mi.

Plan di biahe

⁵ Lo mi bini serka boso ora mi a pasa dor di provinsia di Masedonia, pasobra mi tin ku biaha dor di Masedonia.

⁶ Por ta ku mi keda un tempu serka boso òf asta pasa wenter einan! E ora ei boso por yuda mi sigui ku mi biahe.

⁷ Pasobra mi no ke pasa purá purá serka boso; mi ta spera, si Dios ke, di keda un tempu serka boso.

⁸ Pero mi ta keda Éfese te dia di Pentekòster,

⁹ pasobra, ounke mi tin hopi enemigu, un porta pa hasi un gran trabou a habri hanchu hanchu pa mi.

¹⁰ Ora Timoteo bini, sòru pa e sintié na kas serka boso; pasobra meskos ku mi, e tambe ta traha pa Señor.

¹¹ P'esei mira pa niun hende no menospresi'é, sino yud'é sigui su biahe na pas, pa e por bini bèk serka mi. Ami ku e otro rumannan ta sper'é.

¹² Pa loke ta trata nos ruman Apolo, mi a rog'é mashá pa e bai bishitá boso huntu ku e rumannan. Pero el a nenga redondamente di bini awor akí; lo e hasié, ora e haña oportunidat.

E último konsehonan i kumindamentu

¹³ Sea alerta i para firme den fe, tene kurashi i sea fuerte.

¹⁴ Hasi tur kos den amor.

¹⁵ Mi ke pidi boso algu, rumannan: boso sa ku Stefanas i su hendenan di kas tabata e promé kreyentenan den region di Gresia i ku nan a dediká nan mes na sirbi Dios su pueblo.

¹⁶ Someté boso na liderazgo di hende asina i tur otro ku ta kompartí nan trabou i esfuerso.

¹⁷ Mi ta kontentu ku Stefanas, Fortunato i Akaiko a bini; nan a yena e bashí ku boso ousensia a trese.

¹⁸ Nan a trese alivio, tantu pa ami komo pa boso. Honra hende manera nan.

¹⁹ E iglesianan na provinsia di Asia ta manda kumindamentu. Akila i Priska i e iglesia ku ta reuní na nan kas ta manda mashá kumindamentu kristian.

²⁰ Tur ruman ta manda kumindamentu pa boso. Kuminda otro ku un sunchi santu.

²¹ Awor ta mi mes ta skibi e pida ku ta sigui akí: Kumindamentu di Pablo!

²² Maldishoná ta esun ku no ta stima Señor. Maranata — bini, nos Señor!

²³ Grasia di Señor Hesus sea ku boso.

²⁴ Mi amor keda ku boso tur den Kristu-Hesus.