1 Korintionan 12 - Papiamentu Bible 2013

E donnan di Spiritu Santu

¹ Ban pasa awor pa e tópiko tokante e donnan spiritual. Rumannan, mi ke pa boso ta informá tokante nan.

² Boso sa ku tempu boso tabata pagano ainda, e diosnan falsu, sin bida, tabata trèk boso na un manera iresistibel.

³ P'esei mi ke pa boso sa ku niun hende ku ta papia guiá pa Spiritu di Dios, no por bisa: ‘Hesus ta maldishoná!’ Ni tampoko niun hende no por bisa: ‘Hesus ta Señor!’, si no ta Spiritu Santu ta gui'é.

⁴ Tin diferente don, pero ta e mesun Spiritu Santu ta duna nan.

⁵ Tin diferente manera di sirbi, pero ta e mesun Señor nos ta sirbi.

⁶ Tin diferente manifestashon di poder, pero ta e mesun Dios ta hasi esaki den tur hende, pa medio di su poder.

⁷ Spiritu Santu ta mustra su presensia den tur kreyente na un òf otro manera na benefisio di nan tur.

⁸ Na esun kreyente Spiritu Santu ta duna un palabra di sabiduria i e mesun Spiritu Santu ta duna un mensahe di konosementu na un otro.

⁹ E mesun Spiritu Santu ta duna fe spesial na un persona i un otro ta haña poder pa kura hende malu pa medio di e mesun Spiritu ei.

¹⁰ E ta duna esun poder pa hasi milager, e otro don pa profetisá i un otro don pa diserní kiko ta bini di Spiritu Santu i kiko nò. E ta duna esun don pa papia den lenga i e otro don pa interpretá loke a papia den lenga strañero.

¹¹ Ma tur esaki ta obra di ún i mesun Spiritu Santu ku ta duna kada hende su donnan manera E ta haña ta bon.

Un kurpa ku hopi parti

¹² Ounke kurpa di hende tin hopi parti, tòg e ta ún kurpa. Asina ta ku Kristu tambe!

¹³ Nos tur, hudiu i no hudiu, katibu i hende liber, a batisá pa asina nos bira parti di ún kurpa pa medio di e mesun Spiritu; i nos tur a haña di bebe di e mesun Spiritu.

¹⁴ Pasobra no ta ún parti so ta forma henter ún kurpa, pero ta hopi parti huntu ta forma un kurpa.

¹⁵ Si pia lanta bisa: ‘Mi no ta man, ke men mi no ta pertenesé na e kurpa’, esei no ta nifiká tòg ku e no pertenesé na e kurpa?

¹⁶ Si orea bisa: ‘Mi no ta wowo, ke men, mi no ta pertenesé na e kurpa’, esei no ta nifiká tòg ku e no ta pertenesé na e kurpa?

¹⁷ Si hende su kurpa tabata wowo so, ta kon e ta hasi tende? Si e tabata orea so, kon e ta hasi hole?

¹⁸ Pero Dios a pone kada miembro di e kurpa na e lugá ku parse É di ta mas mihó.

¹⁹ Si tur ta mesun parti, lo no tabatin un kurpa kompleto!

²⁰ Bèrdat ta ku ounke tin hopi miembro, ta ún kurpa so tin!

²¹ Wowo no por bisa man: ‘Mi no tin mester di bo!’ Òf kabes no por bisa e pianan: ‘Mi no tin mester di boso!’

²² Al kontrario, ta e partinan di kurpa ku ta parse mas suak ta esnan ku nos tin mas mester di dje.

²³ E partinan ku nos ta haña ménos honorabel, nos ta tapa ku mas kuidou. I e partinan ku nos ta haña ménos representabel nos ta trata ku mas modestia,

²⁴ miéntras no ta nesesario pa hasi esei ku e partinan mas representabel. Dios a forma kurpa di tal manera ku e partinan ménos honorabel ta haña mas honor,

²⁵ pa asina no tin desunion den e kurpa, pero pa tur miembro kuida otro.

²⁶ Si ún parti di kurpa ta sufri, tur sobrá tambe ta sufri. Si ún parti risibí honor, tur sobrá ta kompartí su legria.

²⁷ Boso ta kurpa di Kristu, boso kada un ta forma parti di dje.

²⁸ I den iglesia Dios a duna kada hende un tarea diferente: na promé lugá tin apòstel, despues tin profeta, na di tres lugá maestro, despues hende ku don di hasi milager, don di kura hende malu, don di yuda, don di dirigí òf don di papia den lenga.

²⁹ No ta tur kreyente ta apòstel, no ta tur ta profeta, no ta tur ta maestro, no ta tur ta hasi milager

³⁰ ni no ta tur tin don di kura hende malu. Tampoko no ta tur ta papia den lenga ni no ta tur ta interpretá loke ta papiá den lenga strañero.

³¹ Hasi empeño pa haña e mihó donnan. Awor mi ta bai mustra boso loke ta surpasá tur kos.