1 Korintionan 10 - Papiamentu Bible 2013

No adorá dios falsu

¹ Mi rumannan, mi no ke pa boso lubidá loke a sosodé ku nos antepasadonan ku tabata sigui Moises. Nan tur tabata bou di protekshon di e nubia i tur a krusa Laman Kòrá.

² Pa medio di nan union ku Moises, nan tur a risibí boutismo den e nubia i den e laman.

³ Nan tur a kome e mesun kuminda sobrenatural

⁴ i a bebe e mesun awa sobrenatural, pasobra nan a bebe di e baranka spiritual ku a kompañá nan, esta Kristu.

⁵ Ma Dios no a keda satisfecho ku mayoria di nan, pasobra El a laga nan muri den desierto.

⁶ E kosnan akí a sosodé komo ehèmpel pa nos, pa atvertí nos pa no deseá kos malu, manera nos antepasadonan.

⁷ No adorá dios falsu manera algun di nan a hasi. Skritura ta bisa: ‘E pueblo a kai sinta pa kome i bebe; nan tabata fiesta pa nan kuenta.’

⁸ Nos no mester kometé akto inmoral manera algun di nan a hasi: riba ún dia 23.000 a dal abou muri!

⁹ Nos no mester pone Kristu na prueba manera algun di nan a hasi; kolebra a morde nan mata.

¹⁰ Anto boso tampoko no mester murmurá, manera algun di nan; e angel di destrukshon a kaba ku nan.

¹¹ E kosnan akí a sosodé ku nan komo ehèmpel pa otro hende i a skibi e kosnan akí komo atvertensia pa nos, ku ta biba serka fin di mundu.

¹² P'esei esun ku ta kere ku e ta pará firme, mester ta kouteloso pa e mes no kai!

¹³ Ningun prueba ku boso a pasa aden mes no ta algu nobo pa hende. Boso por konfia den Dios; lo E no pèrmití pa boso pasa dor di prueba ku ta surpasá boso forsa. I ora boso pasa dor di prueba lo E sòru pa un salida, di moda ku boso por soportá e prueba.

¹⁴ P'esei anto, mi keridonan, hui pa adorashon di dios falsu.

¹⁵ Mi ta papia ku boso manera ta papia ku hende sensato; husga pa boso mes si loke mi ta bisa ta korekto!

¹⁶ Ora nos bebe for di e kopa di bendishon pa kua nos ta yama Dios danki, nos no ta partisipá na e sanger ku Kristu a drama pa nos? Ora nos kome e pan ku nos kibra, no ta nos tur ta partisipá huntu na kurpa di Kristu?

¹⁷ Ta un pan so tin; p'esei ounke nos ta hopi, nos ta ún kurpa, pasobra nos ta partisipá na e mesun pan.

¹⁸ Wak bon serka pueblo di Israel: esnan ku ta kome di e animalnan ofresé komo sakrifisio, ta partisipá konhuntamente na e sakrifisio ku ofresé riba altá.

¹⁹ Kiko mi ke men ku esei? Akaso kuminda ofresé na dios falsu ta mas ku kuminda normal? Òf un imágen di un dios falsu ta mas ku un imágen komun i koriente?

²⁰ Al kontrario, loke mi ke men t'esaki: ora e paganonan ofresé sakrifisio na dios falsu, ta na demoño nan ta ofres'é i no na Dios. Anto ami no ke pa boso tin niun tipo di relashon ku demoño.

²¹ Boso no por bebe for di e kopa di Señor i tambe for di e kopa di demoño; boso no por partisipá na sena di Señor i tambe na sena di demoño.

²² Òf ta provoká nos ke provoká Señor? Akaso nos ta mas fuerte kunÉ?

Hasi tur kos na honor i gloria di Dios

²³ Tin ta bisa: ‘Tur kos ta pèrmití!’ Sí, ma no ke men ku tur kos ta bon pa hasi. Tur kos ta pèrmití, ma no ta tur kos ta yuda hende krese.

²⁴ Niun hende no mester buska su mes probecho, sino interes di e otro.

²⁵ Boso ta liber pa kome tur loke ta bende na marshe di karni, sin hasi averiguashon pa motibu di konsenshi.

²⁶ Pasobra, manera Skritura ta bisa: ‘Henter mundu i tur loke ta den dje ta di Señor.’

²⁷ Si un hende ku no ta kreyente invitá boso bin kome i boso disidí di bai, kome tur loke e duna boso sin hasi averiguashon pa motibu di konsenshi.

²⁸ Awor si ken ku ta bisa boso: ‘E karni akí ta karni ofresé na un dios’, e ora ei no kom'é, pa motibu di e persona ei i un konsenshi limpi!

²⁹ Mi ke men: su konsenshi, no di boso. Mi no mester laga konsenshi di otro hende limitá mi libertat.

³⁰ Si mi ta yama Dios danki pa loke mi ta kome, mi no mester laga hende papia malu di loke mi ta gradisí Dios p'e.

³¹ En todo kaso, sea ku boso ta kome òf bebe, hasi tur kos na honor di Dios.

³² No hasi nada ku ta pone otro hende kai den piká, sea ku ta hudiu, no hudiu òf esnan ku ta pertenesé na iglesia di Dios.

³³ Hasi meskos ku mi: mi ta purba di agradá tur hende den tur loke mi ta hasi; mi no ta buska bon pa mi, sino bon pa otro hende, ya nan por haña salbashon.