1 Huan 5 - Papiamentu Bible 2013

Fe ta duna viktoria riba mundu malbado

¹ Ken ku kere ku Hesus ta e Mesias, a nase di Dios. I esun ku ta stima un tata, ta stima e tata ei su yunan tambe.

² E prueba ku nos ta stima Dios su yunan ta: nos ta stima Dios i ta hasi loke E manda!

³ Pasobra stima Dios ke men kumpli ku su mandamentunan. Anto su mandamentunan no ta un peso pa nos,

⁴ pasobra e echo ku un hende a nase di Dios ta loke ta vense mundu i ta nos fe den Kristu a duna nos e viktoria ku a vense mundu.

⁵ Ken por vense mundu si no ta esun ku ta kere ku Hesus ta Yu di Dios?

Testimonio na fabor di Kristu

⁶ E mesun persona ku a pasa den awa di boutismo a drama su sanger tambe, esta Hesu-Kristu. No ta awa so, sino awa i sanger. Spiritu di Dios mes ta testiguá ku esei ta bèrdat, pasobra e Spiritu ta e bèrdat.

⁷ Sí, tin tres testigu:

⁸ Spiritu, awa i sanger; nan tur tres ta duna e mesun testimonio.

⁹ Ku testimonio di hende mes nos ta aseptá, kuantu mas nos lo no aseptá testimonio di Dios, ku tin muchu mas balor? Pasobra e testimonio ku Dios a duna nos ta tokante su Yu.

¹⁰ Esun ku kere den Yu di Dios, tin testimonio di Dios den su kurason; ma esun ku no kere Dios, ta hasi Dios un gañadó, pasobra e no a kere e testimonio ku Dios a duna tokante su Yu.

¹¹ I esaki ta e testimonio: Dios a duna nos bida eterno, i e bida ei ta bini pa medio di su Yu.

¹² Esun ku tin e Yu, tin bida; esun ku no tin e Yu di Dios, no tin bida!

Siguransa di bida eterno

¹³ Mi ta skibi boso e kosnan akí, pa boso sa sigur ku boso tin bida eterno, boso ku a pone boso konfiansa den e Yu di Dios.

¹⁴ Anto e konfiansa ku nos tin den Dios ta, ku ora nos pidiÉ algu ku ta di akuerdo ku su boluntat, E ta skucha nos.

¹⁵ I si nos sa ku E ta skucha tur nos petishonnan, nos sa tambe ku nos ta haña loke nos a pidiÉ.

¹⁶ Si un hende mira su ruman hasi un piká ku no ta hiba na morto, e mester resa p'e na Dios i Dios lo dun'é bida. Esaki ta konta solamente pa esnan ku no a hasi piká ku ta hiba na morto. Tin piká ku ta hiba na morto; mi no ta bisa ku mester resa pa esnan ku a hasi un piká asina!

¹⁷ Tur maldat ta piká, pero tin piká ku no ta hiba na morto.

¹⁸ Nos sa ku esun ku a nase di Dios no ta sigui den piká, pasobra Yu di Dios ta kuid'é i e malbado no por mishi kuné.

¹⁹ Nos sa ku nos ta pertenesé na Dios i ku tur otro hende na mundu ta den gara di e malbado.

²⁰ Pero nos sa ku Yu di Dios a bini i ku El a duna nos komprondementu pa nos konosé Esun berdadero. Nos ta biba den komunion ku Esun berdadero, pasobra nos ta den komunion ku su Yu, Hesu-Kristu. E ta e Dios berdadero i E ta bida eterno.

²¹ Mi yunan, keda leu fo'i tur kos ku ke tuma e Dios akí su lugá!