1 Huan 3 - Papiamentu Bible 2013

Yunan di Dios

¹ Mira kuantu Dios Tata ta stima nos: E ta pèrmití nos karga e nòmber ‘yu di Dios’! Anto enberdat esei nos ta tambe! Ta p'esei mes esnan ku ta sigui mundu no sa ken nos ta, pasobra nan no a siña konosé Dios.

² Keridonan, awor akí nos ta yu di Dios i ounke te ainda no ta revelá loke nos lo bira, nos sa ku ora Kristu bini nos lo ta manera E, pasobra nos lo mir'É manera E ta en realidat.

³ Anto esun ku ta karga e speransa akí den Kristu, ta mantené su mes puru, meskos ku Kristu mes tambe ta puru!

⁴ Ken ku sigui den piká ta promové anarkia, pasobra piká ta rebeldia kontra Dios.

⁵ I boso sa ku ta pa kita piká Kristu a bini i ku den djE no tin piká.

⁶ P'esei es ku keda den djE, no ta sigui den piká. Ma ken ku sigui hasi piká no a konos'É ni sa ken E ta.

⁷ Mi yunan stimá, no laga niun hende pone boso desviá. Ta e hende ku hasi loke ta agradabel den Dios su bista ta hustu, meskos ku Kristu ta hustu.

⁸ Esun ku sigui den piká ta pertenesé na diabel, pasobra ta for di kuminsamentu di mundu kaba diabel a bini ta peka. Anto ta pa destruí diabel su obranan mes Hesus a bini.

⁹ Es ku a bira yu di Dios no ta sigui den piká, pasobra e poder dibino ku ta duna bida ta biba den dje, i komo Dios ta su Tata, e no por sigui den piká.

¹⁰ Na esaki nos ta rekonosé ken ta yu di Dios i ken ta yu di diabel: esun ku no ta hasi loke ta hustu den bista di Dios, no ta pertenesé na Dios, i spesialmente esun ku no ta stima su ruman.

Stima otro

¹¹ Ta e mensahe akí mes boso a tende for di kuminsamentu: ku nos mester stima otro.

¹² Nos no mester hasi manera Kain, ku tabata pertenesé na e malbado i a asesiná su mes ruman Abel! Anto pakiko el a asesin'é? Pasobra Kain mes tabata hasi maldat, ma su ruman sí tabata hasi loke ta hustu.

¹³ Ke men anto, rumannan, no keda sorprendí ku mundu ta odia boso.

¹⁴ Pasobra nos ta stima nos rumannan, nos sa ku nos sí a pasa di morto pa bida. Esun ku no ta stima, ta sigui den gara di morto.

¹⁵ Ken ku odia su ruman ta igual na un asesino i nos sa ku un asesino no por keda ku bida eterno den dje.

¹⁶ Ata kon Hesus a siña nos kiko ta amor: El a entregá su bida pa nos. Asina nos tambe ta obligá di entregá nos bida pa nos rumannan.

¹⁷ Un hende ku ta poseé hopi kos di mundu i ta sera su kurason pa su ruman ku e ta mira den nesesidat, kon un hende asina por tin amor di Dios den dje?

¹⁸ Mi yunan stimá, no laga nos stima ku boka i palabra so, ma laga nos stima di bèrdè mes, ku echo!

Konfiansa dilanti di Dios

¹⁹ Ta asin'ei nos lo haña sa si nos ta pertenesé na e Dios berdadero i tambe si nos por keda ku un kurason trankil dilanti di Dios,

²⁰ ki ora ku nos kurason ta kondená nos. Pasobra nos sa ku Dios ta mas grandi ku nos mes kurason, i E sa tur kos.

²¹ Keridonan, si nos kurason no kondená nos, esei ta nifiká ku nos por bai serka Dios ku konfiansa,

²² i nos ta haña tur kos ku nos pidiÉ, pasobra nos ta obedesé su mandamentunan i ta hasi loke ta agrad'É.

²³ Anto Dios su mandamentu ta: kere den e persona di su Yu Hesu-Kristu i stima otro manera El a manda nos.

²⁴ Esun ku obedesé Dios su mandamentunan ta keda den Dios i Dios ta keda den dje. Anto ku E ta keda den Dios, nos sa pasobra nos tin e Spiritu ku El a duna nos.