Zekaria 9 - KITAABA WAAQA

¹ Tunini dubbi AABBO Waaqi biyyati hime: Waaqi lafa Hadrakitiifi dira Damaski ya gaargala iti mure. Gosa Israeli ch'allaniti, ammo diri guddaani ka Sirialeeni kama AABBO Waaqaati.

² Hamathileeni ka Hadrakiti aanu kama isaati. diri Tirotiifi ka Sidoni hoguma worraleeni woliini kama isaati.

³ Tironi yayu ufi jabeese maneeni jajabdu jaarate, qarsifi worqi tume, aka biyye lafa ira dabarse!

⁴ Ammo Waaqi waan diri suni qabu ch'ufa iraa fuud'e, hori isaani baariini keesa buuse, dira suni ibidaani gube balleesa.

⁵ Diri Ashkeloni waan kana arge sodaata, diri Gazaleeni arge iraa laalefata. Ekronileeni akasuma laalefate, abdiini isaa baddi. Gazaani hayyu ufii d'abe, Ashkelonileeni ona taha.

⁶ Nama gosa lama keesaa baheti dira Ashdodi keesa taa. AABBO Waaqi waan jed'u, Anini kiyyiba worra Filisti kana imballeesa.

⁷ Worri deebie fooni d'iiga keesaa imbahini inyaatu, yokhaani waan nami nyaachu himmalliini innyaatu. Nami hafuleeni gosa tiyyati darame balbala gosa Yuda taha. Ammalle Ekroni gosa tiyyati daramti, akuma gosa Yebusi.

⁸ Anini lafa tiyya tisse, duula ke bahu d'owa. Anini nama gudda gumi tiyya dabsu iti illakisu; wonti akanatiifi anini aka gumi tiyya gaargalchani ya arge.

Hayyu hegeri d'ufu

⁹ Gammada, qilit'ama, worra Sioni! Gammada, lalaba, worra Yerusalemu! Laala, hayyuuni keesani isaniti d'ufuu jira! Inni ka waan ch'ufa dabsate irre guddo qabuti d'ufa, ammo inni ufi insaadu, harre yaabata — bukhura harreeni d'altuni d'alte gubba taa.

¹⁰ AABBO Waaqi waan jed'u, Anini gaari lolaa, ka fardi hirkisu, Israeli keesaa balleese, fardoole Yerusalemu iraa fuud'a; ammalle guube lolaa ch'ufa imballeesani. Hayyuuni keesani gosa ch'ufa nagaya tolche, baariini toko fuud'e baariini d'ibii d'aabe, Galaana Efratiiti fuud'e muumme lafale ch'ufati d'aabe lafa ch'ufa fida.

Aka gumi Waaqaa deebisani

¹¹ AABBO Waaqi waan jed'u, Maro d'iiga sorio wold'aqisa ta nu woliini tolfannefi, anini gumi teesani boola bisaani inqamne keesaa baasa.

¹² Isani worri boojiani, ka amma abdi qabu, lafa teesani ta soda womatu inqamneti deebia. Anini ammatana isaniti hima, gaargala isani gaargaltani, eebaani maro lama isaniti deebisa.

¹³ Anini Yuda aka guube qonyisa, Israelile aka t'iya tolcha. Anini worra Sioni goraade tolche, worra Grikitiini had'a.

¹⁴ AABBO Waaqi gumi ufii gubbati mullate, t'iya ufii aka angaasu billisa. AABBO Waaqi Guddaani magalata d'ae, bubbe bitaa d'uftu keesa deema.

¹⁵ AABBO Waaqi guddaani gumi ufii qorqorate, worrileeni nyaapa ufii balleesa. Worri aka nama farso d'uge machae lola keesati iyye, d'iiga nyaapa ufii jissa; d'iigi suni aka d'iiga sorio, ka qori keesa, fulla sorio irati baasaniti jigu, jiga.

¹⁶ Hojja guyyaani suni d'ufu, AABBO Waaqi gumi ufii baasa, akuma tissituuni ree ufii bineensa duraa baaftu. Worri aka faaya worqi, ka sure hayyicha keesaa billiqu, lafa keesaa billiqa.

¹⁷ Lafti sunini akami midaad'u dansa! Nami kaima mid'aanifi daad'i isiitiini jabaate irre baasa.