Zekaria 6 - KITAABA WAAQA

¹ Anini ammalle olmillad'e, maro tana gaari afuri, ka jiddu gaara sibiila daalacha lama gabahu, arge.

² Gaari qara fardoole dadaamati hirkisa, ka lameeso guguraatiti hirkisa,

³ ka sadeeso bororati hirkisa, ka afreeso dadaamititi hirkisa.

⁴ Jennaani anini malaikaani, Aabbo, wonti kunini maani? jed'e gaafad'e.

⁵ Isiini waan naani jette, Kunini qilleensa afuri, ka ammumatana abba lafa ch'ufa iraa d'ufe.

⁶ Gaariini fardooleeni guguraatiini hirkiftu mirga qajeele, ka fardo borora ila galchu qajeele, ka fardo daamicha bita qajeele.

⁷ Fardooleeni daamooti akuma gabaateeni, hurifte lafa keesa yaate sot'e. Malaikaani waan jetteeni, Beena, lafa keesa yaa, soqa, wo barbaada. Duuba worri iti d'aabate.

⁸ Jennaani malaikaani iyyite waan naani jette, Fardi mirga qajeele yayu dallansu AABBO Waaqaa qabaneese.

Aka ruufa hayyumaa Yoshua ira kayani

⁹ AABBO Waaqi na yaame waan naani jed'e,

¹⁰ Waan Heldaifi Tobiafi Yedayaani worri boojiani baasu fud'ad'u, kai, hojuma suni deemi, mana Yosia, ka ilma Sefania, d'aqi. Worri kuni ch'ufti lafa boojiani iti geesani ta Babiloniti dachae.

¹¹ Qarsifi worqi worri d'ufeeni sunini ruufa mid'aasi, mata qaallicha gudda Yoshua, ilma Yehosadaki jed'ani ira kayi.

¹² Duuba waan jettuuni, AABBO Waaqi Guddaani waan jed'u, Namichi Dame jed'ani sunini aka dansaa fulla jiru suniiti late bahe Mana AABBO Waaqaa jaara.

¹³ Nami Mana Waaqaa jaare guddinna hayyu argate gosa ufii fidu isuma. Qaallichi toko barch'uma isaa ka hayyu d'aatu eje, wold'agayani woliini taani.

¹⁴ Duuba ruufti suni Heldaifi Tobiafi Yedayafi Yosiaa qaabacha taati, Mana AABBO Waaqaa keesa.

¹⁵ Nami lafa fagooti d'ufe ijaarsa Mana Waaqaa qarqaara. Eegi jaarani, aka AABBO Waaqi Guddaani na erge beetani. Yo isani seera AABBO Waaqa keesani aka dansaa guuttani, wonti kuni ch'ufti intaati.