Zekaria 11 - KITAABA WAAQA

¹ Balbala tante ch'ufa bani, Lebanoni, aka ibidi hind'eesa kanke gube balleesu!

² Mukha haru, lalefad'a boha — hind'eesi ch'ufti ya qaqarie; mukha dadansa suni ya balleesani! Gadda Bashani, boha, ooa — badda guddo ya ch'irani balleesani!

³ Iyyanna tissitu d'agaya, guddinna worraa ya iraa balleesani! Itansu nyeench'aa ch'aqasa; danqara Yordani, ka inni iti galu, ya balleesani.

Tissitu lamaani

⁴ AABBO, Waaqi kiyya, waan naani jed'e, Tissitu hooliye qalmaa geesani ufi tolchi.

⁵ Worri hooliye suni bite qaqale, ka gaargala inarganne kae yaa. Ammalle fooni suni gurguratani waan jed'ani, AABBO Waaqaa faarsa, ya duroomne! Tissituuni worraleeni naasu inqabduufi.

⁶ (AABBO Waaqi waan jed'e, Anini deebie nama lafa keesa jiruu innahu. Anumati nama ch'ufa harka nama worra fiduti kenna. Worri fidu sunini lafa balleesa, anileeni worra iraa ind'owu.)

⁷ Nami hooliye suni bite gurgurate huji na qorate, anini tissitu hooliye qalmaa geesani taani tahe. anini ule lama fuud'e, tokooni Eeba jed'e, taanini Takooma jed'e. Ammalle anini hooliye suni tisse.

⁸ Anini jara tissitu sadeeni na jibbu kaani obsu dad'abe, jia toko keesati ufira balleese.

⁹ Jennaani anini waan hooliyeeni jed'e, Anini deebie nama isani tissu intahu. Nami duu ha duuti, ka balleesanileeni ha baduti. Worri hafuleeni woli balleesa.

¹⁰ Jennaani anini ule Eeba jed'ani taani fuud'e, aka wold'aqisa AABBO Waaqi gosa ch'ufaani tolfate ka ch'abe garsiisu ch'abse.

¹¹ Duuba akanaani wold'aqisa guyya suni ch'absani. Worri hooliye bite gurgure kaani na laaluu jira. Worri imbeekha aka waan kana anini dubbi Waaqaa gula hojad'e.

¹² Jennaani anini waan worraani jed'e, Yo feetani, beese tiyya naa keenna, ammo yo imfeene ufira yalabaha. Jennaani worri qarsi sodoma, ta anini argachu male, naa kenne.

¹³ AABBO Waaqi waan naani jed'e, Beese suni fulla beese Mana Waaqaa iti olkayaniti olkayi. Jennaani anini qarsi sodoma taani fuud'e — beese woma keesa injirre, ta ufiiftu worri waan isiini na bitu sehe tana — fulla beese Mana Waaqaa iti olkayani taaniti olkaye.

¹⁴ Jennaani anini ule lameeso ta Takooma jed'ani taani fuud'e ch'abse, takuma Yudafi Israeli ch'absani.

¹⁵ Jennaani AABBO Waaqi waan naani jed'e, Maro d'ibi ammalle tissitu woma keesa injirre ufi tolchi.

¹⁶ Anini yayu hooliye tiyya tissitu iti tolche, ammo inni hooliye badi yaatu ind'owu, yokhaani ta baddele imbarbaadu, yokhaani ta fayya d'abdele iwolaanuuni, yokhaani ta haftele intissu.

¹⁷ Gaargala isaati, tissitu woma keesa injirre, ka hooliye tissu lafati lakise biraa deemu! Harka isaatiifi ila isaa mirgiti goraadeeni ha iraa kututi! Harki isaa ha rifate, ilti isaa mirgitileeni ha duuduti!