Yoshua 23 - KITAABA WAAQA

¹ Eegi guyya heddu AABBO Waaqi gosa Israeli nyaapa worra ka d'aatu jiru ch'ufa jala baase hafuura baaseefi gaafa suni Yoshuani ya jaare fulla gahe.

² Duuba inni worra Israeli ch'ufa, jaarolee worra gugurda, Makalootafi jaallaboota worraa wolti yaame waan jed'eeni, Anini amma ya jaare fulla gahe:

³ Isani waan AABBO Waaqi keesani gosa tana ch'ufa maro teesanifi tolche ya agartani, aka inni isanii jed'e worra had'e balleese.

⁴ Ammalle lafa gosa d'ibi ta hafteefi lafa gosa anini qara dabsad'e, ta haga galaana Yordani ka ilaboru, haga Baariini Gudda ka ila aduu anini yayu gosa teesanii kenne aka worri d'aalu.

⁵ AABBO Waaqi keesani worra isani duraa d'iibe fuula keesani dura gussa. Akuma AABBO Waaqi keesani isanii kakhate, lafa worra d'aaltani.

⁶ Tanaafi waan kitaaba Seera Musa keesati t'aafani ch'ufa jabeesa, tolcha, guuta: Diqole mirgaafi bitaa iraa ingorina,

⁷ aka isani gosa isani keesati hafte taani wolti imakhamne, yokhaani, maqa waaqa worra ind'oomne yokhaani inkakhanneni yokhaani durati jilbifattani inkad'anne.

⁸ Ammo fulla suni AABBO Waaqaani taka taha, akuma isani haga arrale tolchitani kaani.

⁹ Wonti akanatiifi AABBO Waaqi ya gosa guddo jabdu, irre qabdu, isani duraa gusse; nami tokoleeni haga arrale ya isani dura ejachu dad'abe.

¹⁰ Waan AABBO Waaqi keesani, akuma inni kakhate gama keesani jiruufi, nama keesani toko dandae nama kuma toko dabsata.

¹¹ Tanaafi jabaad'a, AABBO Waaqa keesani aka dansa jaalad'a.

¹² Yo isani garagaltani gosa isani keesati hafte tanaani wold'at'ani wolfuutani,

¹³ beekha AABBO Waaqi keesani itumani deebie gosa tana isani duraa ingussu. Ammo worri hegeri, aka t'urura isani qabe, aka licho dirra isani gube, yokhaani aka qoraati ila isani woraana, haga isani lafa dansa AABBO Waaqa isanii kenne tana iraa d'umattaniti.

¹⁴ Amma guyyaani kiyya ya gabaabate. Isani ch'ufti garaafi qalbi teesani imbeetani, waan dansa AABBO Waaqi keesani isanii kakhate isanii kenne wonti inni isani kakhate ch'ufti ya guutamte, tokole ta intahini injirtu.

¹⁵ Ammo akuma inni waan dansa ch'ufa ka isanii kakhate guute akasuma AABBO Waaqi waan hamtu isanitini d'ufa, haga lafa dansa inni isanii kenne tana keesaa isani balleesuti.

¹⁶ Yo isani wold'aqisa AABBO Waaqi keesani guuta jed'e d'aamate guutu diddani, waaqa d'ibi durati jilbifatani kad'atani AABBO Waaqi isaniti dallana. Duuba isani yoosu lafa dansa tana, ta inni isanii kenne iraa hobaatani.