Yoshua 2 - KITAABA WAAQA

¹ Jennaani Yoshuani, ilmi Nuni, nama lama lafa Shitimuti d'ossaani dooya erge waan jed'eeni, Beena, lafa Kanaani dooyaad'a, keessuma dira Yeriko qorqorad'a. Duuba worri yae, mana sharmut'iti toko ta maqaani Rahabu, bule.

² Jennaani waan hayyu Yerikotini jed'ani, jari Israeli toko ya halkani kana armaani bahe aka lafa dooyaatu.

³ Duuba hayyuuni Yeriko qonqo Rahabuti erge waan jed'eeni, worri mana kanke keesa jiru sunini lafa teenna dooyaachu d'ufe hurrisi gayaasi.

⁴ Jennaani Niitiini taani worra lamaani kaani fuute d'ossite waan jette, D'uguma worri ya mana kiyya d'ufe, ammo anini gara worri d'ufeefi imbeekhu.

⁵ Aduuni d'iinaani, ato fullo inch'ufinu baqatani; ammo anini gara worri yae imbeekhu: Hurrisa reeba, ind'aqabdani jette.

⁶ Ammo isiini qara worra kaani guurte, mana guba geesite, aala mana gubbati afteeni d'ossite.

⁷ Duuba jari hayyuuni erge kaani haga malka galaana Yordani worra reebe. Akuma reebuni worra suni dabarteeni fullo ch'ufani.

⁸ Ato worri dooya kaani gadinch'iisini Rahabuni mana iti korte.

⁹ Waan jetteeni, Anini imbeekha aka AABBO Waaqi lafa tana isanii kenne. Nami lafa tana keesa jiru ch'ufti ya isani sodaate mudame bisaani naqate waan tahu d'abe.

¹⁰ Nu ya d'ageenne aka AABBO Waaqi galaana Diima isani durati gosse, gaafa isani lafa Misiri keesa baatani kaani. Ammalle aka isani hayyoota Amori lamaani, Sihonifi Ogu, galaana Yordani gama suniti fit'ani balleesitani ya d'ageenne.

¹¹ Nu waan suni d'ageenne jennaani mudamne bisaani naqanne waan taanu wollaale maro teesanifi. AABBO Waaqi keesani Waaqa gubbafi lafale jiru.

¹² Duuba amma isani maqa AABBOOTINI nati kakhad'a aka isani worra kiyyaa naatani waan dansa tolchitani, akuma anini waan dansa isanii tolche; ammalle akheekha woi ka anini isaniini d'ugeefad'u naa kenna.

¹³ Aka aabboofi aayyoofi oboleyaani tiyyafi fiit'a teenna ch'ufa lubbu baaftani nati kakhad'a, duu nu d'owa.

¹⁴ Jennaani worri waan jed'eeni, Waaqi nu ijeesinna, yo nu waan atini feetu sii inguutini! Yo atini waan nu yaanufi kana namati inhimini, gaafa AABBO Waaqi lafa tana nuu kenne, sii naane waan dansa si tolchina.

¹⁵ Rahabuni mana naabo dirati mat'anu keesa teeti, tanaafi isiini haadani worra suni dereshani lafati gabuufte.

¹⁶ Waan jetteeni, lafa gaareeni d'aqa aka worri reebu teesani yau suni isani ingarre. Haga guyya sadii d'okhad'a, haga reebuni sunini galtuti. Duuba eegi suni kara keesani iti d'aabatani.

¹⁷ Worri waan jed'eeni, kakhu atini nu kakhachiifte inguunna.

¹⁸ Waan taatu, hojja nu lafa teesani haanu, haada diima kana deresha nuuni ga buufte kanati hid'i. Abbeeti, hateeti, oboleyaani teeti, worra abba keeti ch'ufa mana kanati wolti guuri.

¹⁹ Yo nami tokoleeni mana keesaa alati bahe, isumati duani ufi gahe dooti isaa gubba teennaniti. Ammo yo nama mana kanke keesa jiru tokole wotolchani dooti isaa gubba teenna.

²⁰ Ammo yo waan nu yaanufi kana nama tokoleti himte, kakhu atini nu kakhachiifte taani nu sii inguunnu.

²¹ Isiini ee, aki isani jettani hataatuti jette, worra gad'iifte. Worri yaanaani isiini haada diima kaani dereshati hiite.

²² Worri dooya kaani gara gaareeni yae d'okhate, worri hayyu kaani haga guyya sadi lafa suni ch'ufa keesa worra barbaade woma d'abe, Yerikoti dachae.

²³ Jari kaani lamaani gaara iraa gabue, galaana Yordani taake gara Yoshua ilma Nuni, deebia waan tahe ch'ufa iti himani.

²⁴ Waan jed'aniini, D'uguma, AABBO Waaqi lafa tana ch'ufa ya harka keennati kenne. Maro teennafi worri achi jiru ch'ufti yaa mudame, waan tahu wollaale.