Yona 3 - KITAABA WAAQA

¹ AABBO Waaqi maro lameeso Yona yaame waan jed'eeni,

² Kai, dira Ninawi, dira gudda suni, d'aqi, dubbi anini siti himu tana diideesi nama ch'ufati odeesi.

³ Jennaani Yonaani akuma AABBO Waaqi jed'eeni kaani kae dira Ninawi d'aqe. Diri sunini aka male gudda, ballinni isaa deema guyya sadi fud'ata.

⁴ Yonaani deema guyya toko dira suni keesa deeme lalabe waan jed'e, Guyya afurtama keesati Ninawi imballeesani!

⁵ Jennaani worri Ninawi diqafi guddaleeni Waaqa d'ugeefate ufi agabse ch'arqi naqad'a woliini jed'e, aka akasiini wollaala iraa deebiti garsiisu.

⁶ Hayyuuni Ninawi qonqo tana d'ageennaani barch'uma isaa ka hayyuma iraa kae, woya isaa ta hayyuma baafate, ch'arqi naqate daara keesa tae.

⁷ Duuba inni qonqo tana nama ch'ufati labse waan jed'e, Tunini dubbi hayyufi jara isaa gugurda iraa d'ufte: Namafi loonifi reeleeni woma sooratte bisaanile ind'ugiini.

⁸ Ammo namafi horileeni ha ch'arqi naqate bohe Waaqa kad'ate, kara isaani hama iraa deebie, ch'ubbu worri tolche lakisuti.

⁹ Hegeri Waaqi herega ufii jijire, dallansu ufii hamtu galfate badu nu d'owa fa!

¹⁰ Waaqi waan worri tolcheefi ammalle aka worri kara isaani hama kaani iraa deebiele arginaani herega ufii jijire, worraa nahe, badi sila worra balleesu taani lakise.