Yona 2 - KITAABA WAAQA

¹ Duuba Yonaani, ka garaa qurt'umi taani keesa jiru, AABBO Waaqa ufii kad'ate waan jed'e:

² Ee AABBO Waaqa, anini garaa qurt'umi keesa si yaamannaani atini na jalaa owaatte; anini ka boola Ekhera keesa jiru, siti bohe jennaani atini na d'ageete.

³ Atini d'immu baariini qile keesa na buufte, ka bisaani gama ch'ufa na marsani, fach'aafi d'aawaani bisaani na gubbaa baate.

⁴ Jennaani anini waan jed'e, Yayu fuula kanke duraa na balleesani, anini amma akami dandae deebie mana kanke qulqullo ilaani arga?

⁵ Bisaani nati baafatani, diquma na illiqimsiini; buuyooni bisaani keesati baatuleeni matati na mamarati.

⁶ Anini hidda gaareeni, fulla lafa balbalti isii haga jiru jireenna imbanamneeni bahe. Ammo, ee AABBO Waaqa kiyya, atini d'immu suni keesaa na fuute, lubbu na baafte.

⁷ Anini ufi jibbaad'e aka duu ufi arginaani, ee AABBO Waaqa, si qaabad'e, si yaamad'e; jennaani atinileeni mana kanke qulqullo keesaa na d'ageete.

⁸ Worri waan harkaani boch'ani, ka woma keesa injirre, kad'atuleeni, yayu si lakise si gula deemu dide.

⁹ Ammo anini si faarse, sorio sii baase, waan siti kakhad'e ch'ufa guuta. Ka nama baasu AABBO Waaqa ch'alla!

¹⁰ Jennaani AABBO Waaqi qurt'umi taanini, Yona ufi keesaa diddisi jed'e, duuba isiini lafa goddu irati isa ufi keesaa diddisite.