Yona 1 - KITAABA WAAQA

Aka Yonaani dubbi Waaqaa d'agayau dide

¹ Guyya toko AABBO Waaqi Yona, ilma Amitai, yaame waan jed'eeni,

² Kai, Ninawi dira gudda suni d'aqi, hameenna worri tolchu diideesi iti himi; wonti akanatiifi anini daba worri tolchu ya arge.

³ Ammo Yonaani kae, aka AABBO Waaqa duraa lafa Tarshishiti baqatu, dira Yafa d'aqe, hobolo guddo toko ta Tarshishi deemtu, arge beese baase yaabate, aka akasiini Tarshishi d'aqe AABBO Waaqa duraa bahu.

⁴ Ammo AABBO Waaqi bubbe jabdu baariiniti buuse, bubbeeni sunini aka male jabaatte, hobolo suni gargari ch'absu geete.

⁵ Duuba worri hobolo suni keesa hojatu ch'ufti nahe, namu waaqa ufii yaamate. Jennaani worri miha hobolo keesa jiru ch'ufa, aka hobolooni sablattu, baariiniti jisse. Ammo Yonaani qarayu garaa hobolo suni keesa seene gach'iise aka male rafe.

⁶ Jennaani namichi huji hobolo suni ch'ufa harkaa qabu d'ufe, artiti isa arge waan jed'eeni, Isii abbo, atini maafi ufumaa rafta? Kai, waaqa kanke yaamad'i, hegeri inni nuu nahe lubbu nu baasa.

⁷ Duuba worri hobolo suni keesa hojatu kaani waan woliini jed'e, Koota, hit'a buufanne, nama wollaala tolche waan hamtu kana nutiini d'ufe laalla. Worri hit'a buufate jennaani hit'aani sunini Yonaa bue.

⁸ Duuba worri waan jed'eeni, Nuti himi, wonti hamtuuni kunini maal gula nuti d'ufte? Hujiini tante maani? Eesaa baate? Lafa tamiti d'alatte? Gochiti tante maani?

⁹ Inni waan jed'eeni, Anini nama gosa Ebrania; ammalle anini AABBO Waaqa gubbaa, ka lafafi baariinile uume sodaad'a.

¹⁰ Jennaani worri kaani haga qarale ira nahe waan jed'eeni, Atini waan hamtu akana kana maafi taate? Wonti akanatiifi worri imbeekha, aka inni AABBO Waaqa duraa baqatu, waan inni qara worrati himeefi.

¹¹ Bubbeeni haga qara ira jabaatte jennaani worri waan isani jed'e, Maal si tolchina, aka bisaani baariini rorau lakisani?

¹² Inni waan jed'eeni, Anini imbeekha, maro wollaala kiyyatiifi bubbeeni hamtuuni tunini isani qabatte. Fuud'a, baariini keesa na buusa, duuba bubbeeni tunini bubbisu lakifti.

¹³ Duuba worri kaani aka hobolo lafa godduti deebisu iti game, ammo taatule waan bubbeeni haga qarale ira bubbiftefi dad'abe.

¹⁴ Tanaafi worri AABBO Waaqati bohe waan jed'eeni, Ee AABBO Waaqa, nu si kad'anna, nama kanaa jette nu imballeesini; d'iiga nama woma iyyakiini kana nura inkayini. Ee AABBO Waaqa, nami waan kana ch'ufa tolchu siuma; wonti kunini ch'ufti woma atini tolchite.

¹⁵ Duuba worri Yona fuud'e baariini keesa buuse; jennaani hojuma suni baariinini rorau lakise.

¹⁶ Duuba worri kaani guddo AABBO Waaqa sodaate sorio baaseefi, ammalle aka isa kad'atu iti kakhate.

¹⁷ Jennaani AABBO Waaqi qurt'umi guddo toko Yonati erge, isiini isa liqimsite, inni garaa isii keesa guyya sadi oole halkani sadi bule.