Yohana 6 - KITAABA WAAQA

¹ Eegi suni Yesoni kae gama galaana Galilaya (yokhaani Tiberia) d'aqe.

² Gumiini guddooni isa gula yaate, waan akheekha inni namaani fayyise argiteefi.

³ Yesoni gaara toko kore, jara ufi woliini achi tae.

⁴ Jilti Yahudi ta Pasaka jed'ani ya d'iaatte.

⁵ Duuba Yesoni olmillate, gumi guddo isati d'uftu arge waan Filiponi jed'e, Sagale eesaa binna, aka jari kuni nyaatu?

⁶ Inni waan kana aka Filipo ilaalatuufi jed'e; ufi isaati waan tolchu imbeekha.

⁷ Filiponi waan jed'eeni, Sagaleeni shilingi d'ibba afurileeni worra kana ingeetu, ato diqeesani qoodanile.

⁸ Jari isaa nami toko Andareani, oboleesa Simoni Petro waan jed'eeni,

⁹ Gurba tokoti arma jira, ka qit'a garbu shanifi qurt'umi lama qabu. Ammo tunini maani baati nama hagana gahu kana?

¹⁰ Yesoni waan jed'eeni, Biyya teteesisa. Fulla suni buuyo dansa jira. Tanaafi nami ch'ufti tatae. Nami d'iira ch'allaani kunki shani taha.

¹¹ Jennaani Yesoni qit'a shanaani kaani guure, eebise, biyya teteetuti kenne, akasuma qurt'umile haga fed'ani worra kenne.

¹² Biyyiti quufte jennaani, inni waan jara isaatiini jed'e, hamba suni wolti guura aka tokoleeni imbanne.

¹³ Tanaafi hamba qit'a garbu shanaani, ka biyyiti nyaatte hambifte, wolti guurani, dadu kud'ani lama guutani.

¹⁴ Biyyiti akheekha inni tolche suni arginaani waan jette, Kunini d'uguma raaga ka sila lafati d'ufu male!

¹⁵ Jennaani Yesoni aka worri isa qabe, irreeni hayyu tolchu fed'u beennaani, worra biraa kae gara gaara koba ufi deeme.

Yesoni bisaani gubbaa deema

¹⁶ Lafti galgaloomnaani, jari isaa fulla galaana d'aqe,

¹⁷ Hobolo duude Kapernaumuti dachaae. Eegi lafti dukanooftele Yesoni worra ind'aqamne.

¹⁸ D'awaani galaana d'ufte, bubbeeni guddo bubbifte.

¹⁹ Worri haga maili sadi afuri hobolo deemsimnaani, Yeso galaana gubbaa deemu arge. Inni hoboloti d'iaannaani, worri guddo sodaate.

²⁰ Ammo inni waan worraani jed'e, Insodaatiina, Ana!

²¹ Jennaani worri gammadaani isa hobolo yabachiise; hojuma suni hobolooni lafa worri iti yau geete.

Biyyiti Yeso barbaaddi

²² Boriyya, gumiini guddooni ta gama galaanati hafte, aka hobolooni toko ch'allaani achiti hafte argite. Aka Yesoni jara ufi woliini hobolo inseeniini, ammo aka worri isa biraa yae hubatani.

²³ Taatule hobolooni d'ibiini Tiberia baate, fulla worri qit'a Aabbooni eebise iti nyaate d'ufte.

²⁴ Gumiini aka Yesofi jari isaa achi injirre arginaani, hobolo duude Kapernaumu d'at'e Yeso barbaadani.

Yesoni qit'a jireenna

²⁵ Gama galaana kaanti isa argani waan jed'aniini, Aabbo, yoomi armaani baate?

²⁶ Yesoni waan worraani jed'e, D'uguma, waan anini isaniini jed'u, wonti na barbaaddaniifi waan akheekha argitaniniti, ammo maro qit'a nyaattani quuftaniifi.

²⁷ Sagale d'umattu inhojatiina, ammo sagale haga jireenna hegeri teetu ta Ilmi Nama isanii kennu hojad'a, wonti akanatiifi Waaqi Abbaani yayu beesisa ufi isa ira keyate.

²⁸ Duuba worri waan isaani jed'e, Maani taana re, aka huji Waaqa hojannu?

²⁹ Yesoni waan jed'eeni, Hujiini Waaqa tana, aka nama inni erge d'ugefattani.

³⁰ Worri duuba waan jed'eeni, Atini akheekha kami tolchita, aka nu agarre si d'ugefannu? Atini maani tolchita?

³¹ Ababooti teenna sagale ta Manna jed'ani lafa gamooji keesati nyaatte, akuma t'aafiini jettu, Inni qit'a gubbaa worraa kenne.

³² Jennaani Yesoni waan jed'eeni, D'uguma, waan anini isaniini jed'u, Nami qit'a gubbaa isani kenne Musaniti, ammo Abba kiyya ka gubba jiruti kenne.

³³ Qit'aani Waaqi namaa kennu namicha gubbaa gadi d'ufe jireenna lafaa kennu.

³⁴ Worri waan jed'eeni, Aabbo, qit'a kana guyya ch'ufa nuu kenni.

³⁵ Yesoni waan jed'eeni, Qit'aani jireenna ana. Nami gara kiyya d'ufu imbeelau, ammalle nami naa d'ugefatu diqole ind'eebotu.

³⁶ Ammo anini qara waan isaniini jed'e, Isani na agartani, ammo na ind'ugefattani.

³⁷ Nami Aabbooni naa kenne ch'ufti gara kiyya d'ufa, anileeni diqole indidu.

³⁸ Wonti anini gubbaa gadi d'ufeefi aka fed'i tiyya guutuuniti, ammo aka fed'i nama na erge guutu.

³⁹ Fed'iini nama na erge tana, aka nama inni naa kenne tokole imballeesine, ammo guyya muumme kaasu.

⁴⁰ Wonti Aabbooni fed'u tana: aka worri Ilma arge d'ugefatu ch'ufti jireenna hegeri argatu; duuba anini guyya muumme duisa keesaa kaasa.

⁴¹ Jennaani Yahudiini waan isaa gungumte, waan inni, Anini qit'a ka gubbaa gadi d'ufe ufiini jed'eefi.

⁴² Worri waan jed'e, Namichi kunini Yeso, ilma Yusufu, ka nu abbaafi haad'a isaa beennuuniti? Inni akami ammatana, Anini gubbaa gadi d'ufe ufiini jed'a?

⁴³ Yesoni waan jed'eeni, Ufi keesati ingungumiina.

⁴⁴ Nami tokoleeni dandae nati ind'ufu, yo Abbaani na erge nati hirkise male; anini guyya muumme duisa keesaa kaasa.

⁴⁵ T'aafi raaga keesa waan jed'ani, Nama ch'ufa Waaqi imbarsiisa. Nami dubbi Abba d'agaye barate ch'ufti gara kiyya d'ufa.

⁴⁶ Nami Abba arge injiru, ka gara Waaqaati d'ufe male, isuma ch'allati Abba arge.

⁴⁷ D'uguma, waan anini isaniini jed'u, Nami d'ugefatu jireenna hegeri qaba.

⁴⁸ Anini qit'a jireennaati.

⁴⁹ Ababooti teesani ta sagale manna jed'ani lafa gamooji keesati nyaate, amma ya raawatte.

⁵⁰ Kunini qit'a ka gubbaa gadi d'ufe, ka nami nyaate indoone.

⁵¹ Anini qit'a jireenna ka gubbaa gadi d'ufe. Yo nami qit'a suni nyaate haga hegeri jiraata. Ee, qit'aani anini maro jireenna lafatiifi kennu sunini fooni kiyya.

⁵² Duuba Yahudiini wolmormite waan woliini jette, Isii, nami kuni akami dandae fooni ufi nuu kenna aka nyaannu?

⁵³ Jennaani Yesoni waan jed'eeni, D'uguma, waan anini isaniini jed'u, Yo isani fooni Ilma Nama nyaattani d'iiga isaa d'ugu baattani, jireenni isani keesa injiru.

⁵⁴ Nami fooni kiyya nyaate d'iiga kiyya d'ugu jireenna hegeri qaba, anini guyya muumme duisa keesaa kaasa.

⁵⁵ Wonti akanatiifi fooni kiyya sagale d'ugaati, ammalle d'iigi kiyyaleeni liqimsaa d'uga.

⁵⁶ Nami fooni kiyya nyaate d'iiga kiyya d'ugu na keesa taa, anileeni isa keesa taa.

⁵⁷ Akuma Abbaani kiyya ka jireenna qabu na erge, anileeni maro isatiifi jiraad'u, akasuma nami nafa kiyya nyaatuleeni maro kiyyafi jiraata.

⁵⁸ Kunini qit'a gubbaa gadi d'ufe, ka aka ababooti teesani nyaatte dooteetiiniti. Nami qit'a kana nyaatu haga hegerile induu.

⁵⁹ Dubbi tana Yesoni mana Waaqa iti kad'atani keesati jed'e, ato Kapernaumu keesati barsiisu.

Dubbi jireenna Hegeri

⁶⁰ Jari isaa hedduuni akasi d'ageennaani waan jed'e, Jechi kuni jaba, eentu dandae hubata?

⁶¹ Ammo Yesoni aka jari isaa waan kana gungumu akanumati beennaani waan worraani jed'e, Dubbini tuni isani rifachiifti?

⁶² Yo isani Ilma Nama ka fulla qara jiruti deebiu argitani maani taatani?

⁶³ Wonti nama jiraachisa Lubbu Waaqaa; fooni woma imbahani. Dubbini anini isaniti hime Lubbufi jireenna.

⁶⁴ Ammo isani nami gari ind'ugefattani. Wonti akanatiifi haguma qara Yesoni nama isa ind'ugefanneefi ka isa gurguru imbeekha.

⁶⁵ Inni ammalle waan jed'e, Maro waan kanatifi anini ya isaniti hime, nami tokoleeni dandae gara kiyya ind'ufu, yo Abbaani tolcheefi male.

⁶⁶ Maro waan kanatifi nami hedduuni jara isaa keesa isa lakise gula yau dide.

⁶⁷ Duuba Yesoni waan jara isaa ka kud'ani lamatiini jed'e, Isanileeni yau feetani?

⁶⁸ Simoni Petroni waan jed'eeni, Aabbo, eennuti yaana? Atini dubbi jireenna hegeri qabda.

⁶⁹ Nu la d'ugefanne, ammalle imbeenna aka atini Qulqullo Waaqa.

⁷⁰ Yesoni waan worraani jed'e, Anini isani kud'ani lama imfohanne? Ammo isani keesa Sheet'ana tokoti jira.

⁷¹ Inni Yuda ka Simoni Iskariote baane. Wonti akanatiifi nami isa gurguru Yuda, jara kud'ani lamaani suni keesa.