Yohana 3 - KITAABA WAAQA

¹ Nama tokoti jira, ka Farisayo, maqaani isaa Nikodemo, gudda Yahudi.

² Inni Yesoti halkaniini d'ufe waan jed'eeni, Rabbi, nu imbeenna aka atini qaallu gara Waaqati d'ufe; wonti akanatiifi nami tokoleeni akheekha atini tolchitu kana dandae intolchu, yo Waaqi isa woliini jiraate male.

³ Yesoni waan jed'eeni, D'uguma, waan anini siini jed'u, Yo nami maro lameeso d'alate male, dandae Finna Waaqa inargu.

⁴ Nikodemoni waan jed'eeni, Nami akami dandae d'alata, eegi jaare? Dandae maro lameeso garaa haad'ati deebie ind'alata?

⁵ Yesoni waan jed'eeni, D'uguma, waan anini siini jed'u, Yo nami bisaanifi Lubbuuni d'alate male, dandae Finna Waaqa inargatu.

⁶ Nafi nafa d'ala, Lubbuuni lubbu d'alti.

⁷ Waan anini, Maro lameeso d'alachu maltani siini jed'eefi himmamiini.

⁸ Bubbeeni fulla ufi feetu deemti; atini shawisa isii d'ageeta male, fulla isiini baatuufi yokhaani gara isiini deemtu imbeetu. Nami Lubbuuni d'alatu ch'ufti akasuma jira.

⁹ Nikodemoni waan jed'eeni, Wonti kuni akami dandeete taati?

¹⁰ Yesoni waan jed'eeni, Atini qaallu Israeliti, ammalle waan kana imid'aafanne?

¹¹ D'uguma, waan anini siini jed'u, Nu waan beennu jenna, waan argine d'ugeesina, ammo isani dubbi teenna d'ugefachu diddani.

¹² Yo waan lafa, ka anini isaniti odeese ind'ugefatiini, akami dandeetani d'ugefattani, yo anini waan gubba isaniti odeesu?

¹³ Nami tokoleeni ka takuma gubba d'aqe injiru, Ilma Nama tokocha, ka gubba gadi bue male.

¹⁴ Akuma Musani lafa gamoojiti bofa fannise, akasuma Ilma Nama fannisu malani,

¹⁵ aka nami isa d'ugefatu ch'ufti jireenna hegeri argatu.

¹⁶ Wonti akanatiifi Waaqi guddo lafa jaalate, tanaafi Ilma ufi tokocha namaa kenne, aka nami isa d'ugefatu tokoleeni imbanne, ammo jireenna hegeri argatu.

¹⁷ Waaqi Ilma ufi aka wollaala namati muru lafati inergine, ammo aka nama baasuufi erge.

¹⁸ Nama isa d'ugefatu wollaala iti imurani; ka ind'ugefanne iti murani, waan inni maqa Ilma Waaqa tokocha d'ugefachu dideefi.

¹⁹ Muraani sunileeni tana; ifsaani lafati d'ufe, ammo ifsaa suni ira, biyyiti dukana jaalati, waan hujiini isa hamtutiifi.

²⁰ Nami waan hamtu tolchu ch'ufti ifsa jibba, yokhaani ifsati ind'ufu, aka hujiini isaa imullanne.

²¹ Ammo nami waan d'uga tolchu ifsati baha, aka akasiini maro inni Waaqa saalfateefi hujiini isaa mullatu.

Yesofi Yohana nama batisu

²² Eegi waan kana Yesofi jari isaa lafa Yudea d'aqani. Inni achiti jara woliini tae nama batise.

²³ Gaafasi Yohanaleeni Anioni ta d'aatu Salimutiti nama batisu jira waan bisaani guddooni achi jiraniifi. Biyyiti isati d'ufte inni worra batise.

²⁴ Gaafasi Yohana Mana hid'aansa keesati inhiinne.

²⁵ Jara Yohanatiifi namichi Yahudi toko waan aada qulqullefacha wolmormani.

²⁶ Duuba worri gara Yohana d'ufe waan jed'eeni, Aabbo, namichi gama Yordani si woliini jiru kaani, ka atini waan isaa dubbate, me ilaali, kuno, innileeni nama batisa ammalle nami ch'ufti gara isaa yau jira.

²⁷ Yohanani waan jed'eeni, Nami dandae woma inargatu, waan Waaqi kenne male.

²⁸ Isanileeni d'uga tiyya aka anini, Anini Kristoniti, ammo isa dura na ergani ufiini jed'e.

²⁹ Intalti fuud'ani tami abba fuud'uuti; ammo nami fuud'a gula d'aqe bira eje ch'aqasa, yo qonqo isaa d'agaye ingammada. Tanaafi gammadi kiyya kunini la ammatana qit'ae.

³⁰ Inni guddate, anini diqaachu male.

Nama gubba gadi d'ufu

³¹ Nami gubba gadi d'ufu nama ch'ufa ira jira; ka lafa keesa tau ka lafaati, ammalle waan lafa hasaa. Ka gubba gadi d'ufu nama ch'ufa ira gudda.

³² Inni waan arge d'agaye d'ugeesa, ammo nami tokoleeni ka dubbi isaa d'ugefatu injiru.

³³ Nami dubbi isaa d'ugefatu, aka Waaqi d'uga dubbatu tanaani beesisa.

³⁴ Nami Waaqi erge suni dubbuma Waaqa ch'alla dubbata, waan Waaqi Lubbu ufi ch'ufa isaa kennuufi.

³⁵ Abbaani Ilma jaalate waan ch'ufa harka isati kenne.

³⁶ Nami Ilma d'ugefatu jireenna hegeri qaba; nami Ilma d'ugefachu didu haguma jiru jireennale jireenna inargatu, ammo Waaqi haga jiru jireenna isati dallana.