Yohana 20 - KITAABA WAAQA

¹ Guyya qara ka torbaani suni, Mariamu Magdalene, ato lafti imbariini, ganamaani gara awaala d'at'e, d'akha awaala ira gangalchani argite.

² Jennaani isiini utaalte, gara Simoni Petrofi namicha Yesoni jaalate kaani d'at'e waan jetteeni, Aabbo ya awaala keesaa fuud'ani, ammalle fulla kayani nu imbeennu jette.

³ Jennaani Petrofi namichi kaani gara awaala d'aqani.

⁴ Worri lachu woliini orie, ammo namichi kaani Petro qolche, durati awaala gahe.

⁵ Gajed'e, keesa ilaale, woya boofta ta lafa teetu arge, ammo awaala keesa inseenne.

⁶ Jennaani Simoni Petroni isa gula d'ufe, awaala keesa seene, woya boofta ta achi teetufi.

⁷ Surele ta qara matati marani arge. Sureni suni woya boofta woliini injirtu ammo wolti dachaasani koba kayani.

⁸ Jennaani namichi kaleeni, ka durati awaala gahe, keesa seene arge d'ugefate.

⁹ Worri qara t'aafi, ta Yesoni duisa keesaa kau male jettu inhubanne.

¹⁰ Jennaani jari Yeso suni kae mana ufiti gale.

Yesoni Mariamuti mullata

¹¹ Ammo Mariamuni awaala bira ejite boote. Duuba ato bootu, isiini gajette awaala keesa millatte,

¹² malaika lama ta woya adaadi uyifatte teteetu agarte, toko gama mata, taleeni gama miila, fulla qara reefi Yeso ch'iisu.

¹³ Worri waan isiini jed'e, Intala, maafi boota? Isiini waan jetteeni, Aabbo Yeso ya armaa fuud'ani, fulla isa kayanile anini imbeekhu jette.

¹⁴ Waan kana jennaani ufira mich'iramte Yeso oleju argite; ammo aka inni Yeso inhubanne.

¹⁵ Yesoni waan isiini jed'e, Intala, maafi boota? Eennu barbaadda? Isiini nama oobru eegu isa seete waan jetteeni, Aabbo, yo atini isa armaa fuute, fulla isa keete nati himi, d'aqe isa fuud'a.

¹⁶ Yesoni, Mariamu! jed'eeni. Isiini mich'iramte, afaani Ebraniatiini, Rabboni! isaani jette. (Rabboni jechaani Aabbo jechu.)

¹⁷ Yesoni waan isiini jed'e, Naa inqabatini, anini qara gara Aabbo olindeemne. Ammo gara oboleyaani tiyya d'aqi waan jettuuni, Anini gara Abba kiyyatiifi Abba keesani, gara Waaqa kiyyatiifi gara Waaqa keesani oldeema, jed'i iti himi jed'e.

¹⁸ Mariamu Magdalene gara jara isaa d'at'e, Anini yayu Aabbo arge jetteeni, ammalle waan inni isiini jed'e worrati himte.

Yesoni jara ufiti mullata

¹⁹ Galgaluma guyya suni, guyya qara ka torbaani suni fulla jari ergattuuni Yeso jiru ka maro soda Yahuditiifi balbalti ch'ufaansa qaabdu Yesoni d'ufe, jiddu worra keesa eje waan jed'eeni galchuumi isani nagayaa?

²⁰ Akasi jennaani, inni harkafi t'iit'a ufi agarsiise. Jari isaa Aabbo arginaani guddo gammade.

²¹ Jennaani Yesoni ammalle waan jed'eeni, Nageenni isani bad'aad'a? Akuma Aabbooni na erge anileeni isani erga.

²² Akasi jennaani, inni hafuura ufi worraa kenne waan jed'eeni, Lubbu Qulqullo argad'a.

²³ Nama isani daba araaramtaniifi ch'ufa inaraaramaniifi; ka isani araaramufi diddani ch'ufti araarama inargatu.

Yesofi Tomaso

²⁴ Ammo Tomasoni ka laku jed'ani ka jara kud'ani lamaani keesa jiru gaafa Yesoni d'ufe, worra woliini injiru.

²⁵ Duuba jari kaani waan jed'eeni, Nu la Aabbo argine. Ammo inni waan worraani jed'e, Yo anini harka isaa keesa gadaanisa musumaraa arge, quba kiyya fulla musumaraani woraane ke kaye, harka kiyyale t'iit'a isaa keesa kaye male, diqo haganale ind'ugefad'u jed'e.

²⁶ Eegi torbaani toko, ka jari isaa ammalle mana keesa jiru, Tomasoleeni achi jira. Balbalti ch'ufaansa qabdi, ammo Yesoni d'ufe, jiddu worraa keesa eje waan jed'eeni, Galchuumi isani nagaya?

²⁷ Jennaani inni waan Tomasoni jed'e, Quba kanke achi asi gaqabad'u, harka kiyya ilaali; ammalle harka kanke asi gadi d'eerefad'u, t'iit'a tiyya keesa kayi. Ind'areefatiini, ammo d'ugefad'u!

²⁸ Tomasoni, Aabbo kiyyafi Waaqa kiyya! jed'eeni.

²⁹ Yesoni waan jed'eeni, Atini na arginaani d'ugefatte? Ayyaana worra ka ato inargiini d'ugefatu jed'e.

Waan kitaaba kana t'aafanifi

³⁰ Yesoni akheekha d'ibi heddu jara ufi durati tolche, ka kitaaba kana keesati int'aafini.

³¹ Ammo haga kana ya t'aafani, aka isani aka Yesoni Kristo Ilma Waaqa d'ugefattani, d'ugefannaani aka maqa isatiini jireenna argattani.