Yohana 15 - KITAABA WAAQA1 Anini zabibu d'ugaati, Abbaani kiyya abba oobruuti. 2 Dame na keesa jirtu ta mid'aani imbaamne ch'ufa inni imballeesa, dame mid'aani baaftu ch'ufa inni kolkoleti mid'aasa aka mid'aani haga qarale ira baaftu. 3 Isani qara la qulqullooftani, maro dubbi anini isaniti hime suniifi. 4 Na keesa taa, anileeni isani keesa taa. Akuma dameeni koba ufi mid'aani imbaamne, yo mukha zabibuti ejitu male, akasuma isanileeni woma indandeenne, yo na keesa teetani male. 5 Anini mukha zabibuti, isani damele. Nama na keesa tae anileeni keesa tau ch'allati mid'aani guddo baasa; wonti akanatiifi na male dandeetani woma intolchitani. 6 Nami na keesa inteenne, akuma dame alati gatani, gatani duuba ingoga; damele suni wolti guurani ibidati naqani gubani. 7 Yo isani na keesa teetani dubbini tiyya isani keesa teete, waan feetani ch'ufa kad'ad'a, isanii kennani. 8 Maro waan kanatifi Abbaani kiyya inguddifama, waan isani mid'aani guddo baaftaniifi; akasiini isani jara kiyya taatani. 9 Akuma Abbaani na jaalatu, anileeni isani jaalad'a; jaalala tiyya keesa taa. 10 Yo isani seera kiyya guuttani jaalala tiyya keesa teetani, akuma anini seera Abba kiyya guute jaalala isaa keesa tau. 11 Waan kana anini yayu isaniti hime aka gammadi kiyya isani keesa tae gammadi keesanileeni guutamu. 12 Seeri kiyya kana: Woljaalad'a, aka anini isani jaalad'e. 13 Nami tokoleeni jaalala hagana ira inqabu, ta nami maro jaalaani ufitiifi duu. 14 Isanileeni jaalani tiyya, yo waan anini isaniti hime guuttani. 15 Armaa achi tissele isaniini injed'u; wonti akanatiifi tisseeni waan abbaani tolchu imbeetu. Ammo anini jaalaani isaniini jed'a, waan dubbi Abba kiyya iraa d'agaye ch'ufa isaniti odeeseefi. 16 Isani na imfohanne, ammo anati isani fohate erge, aka deemtani mid'aani baaftani, mid'aani ka inhamaanne. Duuba Abbaani waan maqa kiyyaani kad'attani ch'ufa isanii kenna. 17 Waan kana duuba anini isaniti hima: woljaalad'a. Nami lafa isani jibba 18 Yo nami lafa isani jibbe, beekha aka, ato isani injibiini, na jibbani. 19 Yo isani nama lafa tanaa taatani, nami lafa tana akuma woljaalatu isanile jaalata. Ammo waan isani nama lafaa intahiiniifi ammalle waan anini lafa keesa isani fohad'eefi, nami lafaa isani jibba. 20 Dubbi anini isaniini jed'e tana qaabad'a: Tisseeni abba ufi ira injirtu. Yo nami qara na gaargalche, isanile ingaargalcha; yo nami jecha kiyya guute, keesanile inguuta. 21 Ammo waan kana ch'ufa maro maqa kiyyatiifi isani tolchani, waan nama na erge imbeenneefi. 22 Ato sila anini d'ufe worrati himu d'ibaad'e, daba inqabani; ammo ammatana waan dabaani d'ofatani inqabani. 23 Nami na jibbu Abba kiyyale injiba. 24 Ato sila anini huji nami tokoleeni jiddu worrati intolchiini tolchu d'ibaad'e, daba inqabani; taatule amma worri ya anaafi Abba kiyya arge jibbe. 25 Wonti kunini ch'ufti aka dubbini Seera worraa keesati t'aafani ta, ufumaa na jibbani jettu guutamtu. 26 Ammo yo Qarqaarsi d'ufu, ka anini gara Abba kiyyati ergu, Lubbu d'uga, ta gara Abbati baatuuti na d'ugeesa. 27 Isanileeni na d'ugeesitani, waan haguma duri na woliini jirtaniifi. |
Borana Bible © Bible Society of Kenya, 2019.
Bible Society of Kenya