Yohana 1 - KITAABA WAAQA

Dubbi jireenna

¹ Duri qara fiit'e, ato lafti inuumamiini, dubbi jira. Dubbini suni Waaqa woliini jirti, dubbini suni Waaqa.

² Inni qara Waaqa woliini jira.

³ Waan ch'ufa Waaqi isaani uume, wonti tokoleeni ta isa male uumamte injirtu.

⁴ Isa keesa jireenna jira, jireenni suni ifsa namaati.

⁵ Ifsaani dukana keesa ifsa, dukanti taka ind'aamfine.

⁶ Waaqi nama toko ka Yohana jed'ani erge.

⁷ Inni waan d'uga himu d'ufe, aka ifsa suni d'ugeese nami ch'ufti dubbi isaa gula d'ugefatu.

⁸ Inni ufii ifsaaniti, ammo ifsa suni d'ugeesu d'ufe.

⁹ Ifsaani d'uga, ka nama ch'ufaa ifsu, lafati d'ufu jira.

¹⁰ Inni qara lafa jira. Lafti isaani uumamte, ammo lafti fuula isaa imbaranne.

¹¹ Inni lafa ufiti d'ufe, ammo gochi isaa isa dide.

¹² Ammo nama isa fud'ate maqa isaa d'ugefate ch'ufa inni jabeenna kenne, aka ijoolle Waaqaa tahani.

¹³ Worri suni fed'i nama gula ind'alanne, yokhaani nami worra ind'alle, ammo Waaqati worra d'ale.

¹⁴ Dubbini nama taate, jiddu teenna teete, nu guddinna isaa agarre, akuma guddinna Ilma tokocha ka gara Abbati bahe, ka eebafi d'ugaani guutame.

¹⁵ Yohanani isa d'ugeese, qonqo olfud'ate waan jed'e, Kunini ka anini waan isaa dubbad'e waan jed'e, Inni faana tiyya d'ufa, ammo nara gudda; ato anini ind'alatiini inni duru jira.

¹⁶ Eebiti isaa qit'e, hojja ch'ufa guddo nu eebisa.

¹⁷ Waaqi Seera ufii Musani namaa kenne, ammo eebafi d'ugaani kara Yeso Kristotiini d'ufte.

¹⁸ Nami tokoleeni taka Waaqa ingarre, Ilma tokocha, ka Abbaani takaa, ka d'aatu Abbaa tau male, isati Waaqa nama beesise.

Barsiisa Yohana nama batisu

¹⁹ Jennaani jari gugurdaani Yahudi ka Yerusalemu, qaaloleefi worra Lawi Yohanati erge, atini eennu kana? jed'e gaafate.

²⁰ Inni diideese iti hime waan jed'e, Anini Kristoniti.

²¹ Jennaani, Ati eennu re? jed'ani isa gaafatani. Atini Eliya? Inni waan worraani jed'e, Anini isaaniti. Atini raaga kaani re? Inni waan jed'eeni, Hiyyo!

²² Duuba, Atini eennu re? Worra nu ergeti himu malle. Ati eennu ufiini jetta? jed'ani isa gaafatani.

²³ Inni waan jed'e, Anini qonqo nama lafa alooti iyu, ta kara Aabbo qajeelcha jettu. Aka raagi Isayani duri jed'e.

²⁴ Jara kana Farisayooti erge.

²⁵ Duuba Yohana gaafatani, waan jed'ani, Atini maafi aada batiso namaa kennita re, yo Kristofi Eliya yokhaani raaga kaani intahiini?

²⁶ Yohanani waan jed'eeni, Anini bisaaniini nama batisa, ammo jiddu teesani keesa nama isani imbeenneti jira.

²⁷ Inni eegi tiyya d'ufa, ammo anini seemsa kope isa iti d'iaad'e hiikhu himmalle.

²⁸ Waan kana Bethania keesati tolchani galaana Yordani gama fulla Yohanani nama iti batise.

D'ugeesa Yohana Yeso irati

²⁹ Boriyya Yohanani Yeso gara isa d'ufu jiru arginaani waan jed'e, ilaala, ilme hoola Waaqa, ta daba nama lafa ch'ufa fud'attu.

³⁰ Kunini ka anini, Inni faana tiyya d'ufa, ammo nara gudda, ato anini ind'alatiini inni duru jira jed'e kaani.

³¹ Anini qara isa imbeekhu, ammo anini aka inni Israeliti mullatuufi bisaaniini nama batisu d'ufe.

³² Ammalle Yohanani d'ugeese waan jed'e, Anini Lubbu ta aka sabaliisa jirtu, ta gubba gadi buute isa gubba teetu arge.

³³ Anini isa imbeekhu, ammo Waaqi ka aka anini bisaaniini nama batisu na erge waan naani jed'e, Atini Lubbu gubba gadi buute nama gubbaa teetu agarta; nami suni ka Lubbu Qulqullooni nama batisu.

³⁴ Anini yayu arge d'ugeese aka kunini Ilma Waaqa.

Jara qara Yesoni fohate

³⁵ Boriyya ato Yohanani jara ufi nama lama woliini jiru;

³⁶ Yeso deemu jiru millate waan inni jed'e, Ilaala ilme Hoola Waaqa!

³⁷ Jari lamaani kaani waan inni jed'e d'ageennaani Yeso gula yae.

³⁸ Yesoni garagale, worra isa gula yau arginaani waan jed'eeni, Maani barbaaddani? Worri waan jed'eeni, Rabbi, worri kanke eesa? (Rabbi jechaani Barsiiftu jecha.)

³⁹ Inni waan jed'eeni, Koota, inargitani. Worri yae fulla inni bulu arge, galgala suni isa woliini hasaani. Hojjaani suni saa kud'anifa.

⁴⁰ Jari lamaani suni ka waan Yohanani jed'e, d'agaye Yeso gula yae, toko Andarea, oboleesa Simoni Petro.

⁴¹ Inni oboleesa ufi Simoni barbaade waan jed'eeni, Nu Masihi ya agarre (Masihi jechaani Kristo jecha).

⁴² Jennaani gara Yesotiini d'ufe. Yesoni isa ilaale waan jed'eeni, Atini Simoni, ilma Yona, ammo armaa achi Kefa siini jed'ani (Kefa jechaani Petro yokhaani d'akha jecha).

Yesoni Filipofi Nathanieli yaama

⁴³ Boriyya Yesoni kae, Galilaya d'aqu fed'e. Filipo arginaani, Na gula kooti jed'eeni.

⁴⁴ Filipofi Andareafi Petroni nama dira takaa, ka dira worraa maqaani Bethsaida.

⁴⁵ Filiponi Nathanieli arge waan jed'eeni, Nu namicha Musani waan isaa kitaaba Seera keesati t'aafe, ka ammalle raagootileeni kitaaba ufi keesati t'aafte ya agarre. Yeso ilma Yusufu nama Nazareti.

⁴⁶ Nathanielini waan jed'eeni, Wonti dansaani dandeete Nazareti keesaa imbaati? Filiponi waan jed'eeni, Kooti, ilaali.

⁴⁷ Yesoni Nathanieli gara isaa d'ufu arginaani, waan isaa dubbate waan jed'e, Me ilaala, nama Israeli ka d'ugaafi, d'arti tokoleeni isa keesa injirre.

⁴⁸ Nathanielini waan inni jed'eeni, Akamiini na beeta? Yesoni waan jed'eeni, Ato Filiponi si iyaamini sii oda jala teetu si arge.

⁴⁹ Nathanielini waan jed'e, Rabbi, atini Ilma Waaqa, atini Hayyu Israeli!

⁵⁰ Yesoni waan jed'eeni, Waan anini, Ato atini oda jala teetu si arge jed'eefi d'ugefatta? Waan guddo ta tana ira jirtu agarta.

⁵¹ Jennaani waan jed'eeni, D'uguma, waan anini isaniini jed'u, Armaa achi gubba banamte, malaika Waaqa ta oli gadi yaate Ilma Nama ira buutu agartani.