Yeremia 9 - KITAABA WAAQA

¹ Ato sila mataani kiyya madda bisaani tahe, ilti tiyya laga imimaani taate akami fed'a! Sila anini dandae halkani guyya gumi tiyya ta fit'ani boha.

² Ato sila anini lafa gamooji keesa fulla bulu qaabad'e, aka anini gumi tiyya iraa fagaad'u, akami gammada! Worri ch'ufti nama d'uga gula iyyaane, ka dabse nama balleesu.

³ Worri worra afaani gorani ka arabi isaani yo ch'ufa d'ara dubbatu. Fulla d'uga d'arati lafa mohata. AABBO Waaqi waan jed'u, Gumiini tiyya guyya ch'ufa woluma gula ch'ubbu tolchite, ammalle aka anini Waaqa worraa inhereddu.

⁴ Nami ch'ufti ha jaala ufi ufira eegu, nami tokoleeni oboleesa ufi ind'ugeefatini; wonti akanatiifi oboleesi ch'ufti akuma Yakobo nama sobe, nami ch'ufti jaala ufi arabsa.

^5-6 Nami ch'ufti jaala ufi sobe, tokoleeni d'uga wolti indubbatu; worri araba ufi d'ara barsiise, ch'ubbu gula yae iraa deebiu dide. Worri waan hamtu guyya ch'ufa woluma gula tolche guyya ch'ufa woli soba. AABBO Waaqi waan jed'u, gumiini tiyya ya na didde.

⁷ Maro waan kanatifi AABBO Waaqi guddaani waan jed'u, Gumi tiyya aka sibiila basse qulqulleese ilaalad'a. Gumiini tiyya yayu waan hamtu tolchite — wonti d'ibiini anini worra tolchu maani re?

⁸ Arabi worra aka t'iya nama ijeeftu jira; hojja ch'ufa d'ara dubbata. Nami ch'ufti dubbi dansa nagaya woliini dubbata, ammo garaa ufi keesa t'urura woli kayu malata.

⁹ Anini waan kana jed'e worra ingaargalchu? Gosa akana tana haalo imbaafad'u? Nami dubbi tana jed'e ana, AABBO Waaqa.

¹⁰ Anini waan jed'e, Gaareenifi, lafa horini oolule imboha, wonti akanatiifi isiini ya gogodde, nama keesa deemule d'abde. Marra looni keesati ind'agayani, simpirreefi bineensileeni yayu keesa baqate.

¹¹ AABBO Waaqi waan jed'u, Anini Yerusalemu balleese ona sareni diidaa iti galtu tolcha; diri Yuda ch'ufti gamooji fulla nami injirre taha.

¹² Duuba anini waan jed'e, AABBO Waaqa, lafti maalifi onte gogodde lafa gamooji ta nami keesa injirre taati? Eenuti qalbi waan kanaani hubatu qaba? Atini eenuti himte. Aka inni nama d'ibi barsiisu?

¹³ AABBO Waaqi waan nani jed'e, Wonti woni kunini taateefi waan gumiini tiyya anaafi barsiisa anini worraa kenne lakifteefi. Worri naa insaalfanne, yokhaani seera kiyyale inguunne.

¹⁴ Fulla suni worri mata jabaate waan harkaani boch'ani, ka Baali jed'ani, kad'ate, barsiisa abbooti worraa gula.

¹⁵ Tanaafi duuba waan anini, AABBO Waaqi guddaani, Waaqi Israeli, tolchu ch'aqasa: Anini gumi tiyya mukha had'aa nyaachise bisaani had'ao obaasa.

¹⁶ Anini gosa worraafi abbootini worraleeni takaa ind'agayini keesati worra firfirse, duula iti kaase, lafa iraa worra hobaasa.

Aka worri Yerusalemu qarqaarsa kad'ate

¹⁷ AABBO Waaqi guddaani waan jed'e, Me, waan taha kana herega! Worra bohu gayaama, nad'eeni faaru boha d'aatu.

¹⁸ Biyyiti waan jette, Worri ha arifate d'ufe, faaru boha nuu d'auti, haga imimaani ila teenna guutani, rifeensa ilale ch'ufa jiisaniti.

¹⁹ Qonqo nama Sioni keesa bohu ch'aqasa, ta teete nu ya banne! Ya guddo nu ch'eersani! Nu lafa teenna keesa godaanu male, maneeni teenna ya ch'ach'absani jettu.

²⁰ Duuba anini waan jed'e, Isani nad'eeni, dubbi AABBO Waaqa ch'aqasa, waan inni jed'u ch'ufa d'agaya! Dubra teesani faaru boha barsiisa, jaalaani teesanile sirba namaani awaalani d'aafi.

²¹ Dooti yayu deresha manatini nuti seente maneeni teenna jajabdu duudde; isiini yayu ijoolle kara keesa teteetufi kaima gabaya keesa jirule qabate fit'e.

²² Reefi worraa ka fulla ch'ufa ch'iisu kosi oobruti naqani fakaata. Yokhaani mid'aani murani lafati d'abbani fakaata, ka nami wolti guuru injirre. Tuni ch'ufti waan AABBOONI Waaqi jed'i naani jed'e.

²³ AABBO Waaqi waan jed'u, Qarooni qarooma ufitini kooru himmalle, jabaaleeni jabeenna ufitini kooru himmalle, dureesileeni durooma ufitini kooru himmalle.

²⁴ Nami kooru fed'u ch'ufti ha waan na beekhe na hubatufi kooruti; anini d'ugaafi qaajeeluma tolcha. Woni na gammachiisa kana. Nami dubbi tana jed'e ana, AABBO Waaqa.

^25-26 AABBO Waaqi waan jed'u, Guyyaani ind'ufa, ka anini worra gosa Misiritiifi ka Yudatifi ka Edomutifi ka Amonitifi ka Moabutifi worra lafa gamooji ka mata ufi gababse ch'iratu gaargalchu. Worri kunini ch'ufti aada gula qabanqaba qabata, ammo waan aadaani suni malteefi inguunne. Worra kanafi worri Israeli tokoleeni wold'aqisa kiyya injabeesine.