Yeremia 52 - KITAABA WAAQA

¹ Ganni Sedekia diddami toko, gaafa inni hayyu Yuda tahe, ammalle inni ganna kud'ani toko Yerusalemu keesa lafa mohate. Haad'a isaa maqaani Hamutali, isiini dubra Yeremia, ka dira Libna.

² Hayyu Sedekiani akuma hayyu Yekoniani tahe kaani, AABBO Waaqa durati ch'ubbu tolche.

³ AABBO Waaqi guddo worra Yerusalemutifi ka Yudaleti dallane ila ufi dura balleese. Sedekiani hayyu Nebukadreza, ka Babiloniti, garagale jennaani,

⁴ hayyu Nebukadrezani askarti isaa ch'ufaani d'ufe, guyya kud'anneeso, jia kud'anneeso, ganna sagaleeso ka mootuma Sedekia, Yerusalemu had'e. Worri d'aatu isiiti qubate, boola qote marseeni,

⁵ haga ganna kud'ani tokeeso ka mohacha Sedekia artuma tae had'e.

⁶ Guyya sagaleeso, ka jia afreeso, ka ganna suni, ka beelti dira suni keesati guddatte, nami sagale nyaatule d'abe,

⁷ naabo dira suni ch'absani. Halkaniini askartini fullo naabo lamaani jiddu, jirtu, ta d'aatu oobru hayyutini baqate, ato askartini Babiloni dira marsitu. Duuba worri gara bale Yordani baqate.

⁸ Ammo askartini Babiloni hayyu Sedekia reebde, diida Yerikoti d'aqabde jennaani askartini isaa ch'ufti biraa baqate.

⁹ Duuba isa qabani, hayyu Babiloni, ka Ribla lafa Hamathi jiruti geesani. Duuba achiti hayyu Nebukadrezani ijeecha iti mure.

¹⁰ Ammalle Riblati inni ilmaani Sedekia iluma isaa durati fit'e, jaarole Yudale ch'ufa artumati hobaase.

¹¹ Eegi suni isale ila keesaa guure, sansalatani hid'e Babiloniti geese. Sedekiani haga jiru ch'ufa hid'aansa keesa lafa Babiloni tae.

Aka Mana Waaqa gubani

¹² Guyya kud'anneeso, ka jia shaneeso, ganna kud'ani sagaleeso, ka hayyu Nebukadrezani lafa Babiloni mohate, Nebusaradanini, ka makala hayyuu, ka ammalle inni gudda askarti isaa, Yerusalemu seene.

¹³ Inni Mana Waaqatifi mana hayyutifi maneeni nama gugurda ka Yerusalemu ch'ufa gube,

¹⁴ askartini isaaleeni naabo diraani marsani jaarani ch'ach'absite.

¹⁵ Jennaani Nebusaradanini worra dira Yerusalemu keesati hafefi ogeeyifi worra worra isaani lakise hayyu Babiloniti harka kennate, guure Babilonitini gale.

¹⁶ Ammo inni hiyyeeyi woma inqamne lafa Yudati lakise, aka worri zabibu tisse oobrule qotu.

¹⁷ Worri Babiloni utuba sibiila diimani mid'aasanifi waan gaari fakaata ka Mana Waaqa keesa jiru ch'ufafi haro gingiti sibiila diimani mid'aasanile ch'ufa ch'abse akanaani waan sibiila diimani mid'aasani suni ch'ufa lafa Babiloni geese.

¹⁸ Ammalle worri daboolafi eele daara iti haranifi miha ifseeni qorqoratanifi qori d'iiga sorio iti naqanifi qori hit'aana iti aarsanifi miha Mana Waaqatini hojatani, ka sibiila diimani mid'aasani ch'ufa, guure itiini d'aabate.

¹⁹ Ammalle worri waan worqifi qarsiini mid'aasani ch'ufa guure itiini d'aabate: qori didiqofi daboola ch'ile ibidatini fuud'anifi qori d'iiga sorio iti naqanifi eele daara iti haranifi waan ifse ira d'ad'aabanifi eele hit'aanatifi qori daad'iini d'ibaayu baasanile.

²⁰ Miha Solomonini sibiila diimani Mana Waaqati mid'aase — utuba lamaanifi waan aka gaari kaanifi haro gingiti taanifi waan aka koromi looni ta sibiila diimani mid'aasani, ta isiini ira ejitule, dandaani ulfinna isii haga imbeekhani.

^21-22 Utubaani lamaani haguma taka: Old'eerinni isaa d'und'uma kud'ani saddeeti, ballinni mata isaa d'und'uma kud'ani lama. Utubaani sibiila mid'aasani suni lachu aka d'uyuma jira, furdinni afaani isaa haga gana harkaa. Utuba suni lachu gubbaa waan aka sure ka sibiila diimani mid'aasaniti jira, ta kamu d'eerinni isii d'und'uma shani, ammalle waan aka okhoku ka sibiila diimani mid'aasanini marsani barreesani ch'okhani. Waan kana ch'ufa sibiila diimani mid'aasani.

²³ Barru utuba suni lamaani ch'ufa irati waan aka okhoku ka d'ibba tokoti jira; nami jala eju waan suni sagaltami jaa ilaani inarga.

Aka worra Yuda Babiloni geesani

²⁴ Tana male Nebusaradanini, ka gudda askarti, qaallicha gudda Seraya jed'anifi Sefania ka isati aanufiufi ammalle jara gugurda Mana Waaqa keesa hojatu nama sadi qaqabe Babiloni geese.

²⁵ Dira keesa inni nama askarti ch'ufaa matatiifi nama torba ka makala hayyu, ka dira keesati hafefi namicha nama askartiti mataati aanu, ka waan askarti lafa suni ch'ufa t'aafufi, ammalle nama jaatama d'ibii, ka gurra qabu, ch'ufa woliini qabe geese.

²⁶ Nebusaradanini, ka gudda askarti, worra kana ch'ufa guure, hayyu Babiloni, ka dira Ribla jiruti geese.

²⁷ Achiti lafa Hamathiti, hayyichi worra gaargalche d'aane hobaase. Duuba akanaani worra Yuda lafa worra keesaa boojiani, lafa d'ibii geesani.

²⁸ Kunini henna worra Yuda ka Nebukadrezani boojie: ganna torbeeso ka mohacha isaa, inni nama kuma saditifi diddami sadi boojie;

²⁹ ganna kud'ani saddeeteeso nama d'ibba saddeettifi sodomi lama Yerusalemu keesaa boojie;

³⁰ ammalle ganna diddami sadeeso keesa, nama d'ibba torbatiifi afurtami shani Nebusaradanini boojie. Nami worri boojie ch'ufti wolti nama kuma afurtifi d'ibba jaa.

³¹ Ganna sodomi torbeeso, ka hayyu Yekonia boojiani guyya diddami shaneeso, ka jia kud'ani lameeso Evil-Merodakini hayyu Babiloni tahe, duuba inni Yekonia hayyu Yudati nahe, hid'aansa keesaa baase.

³² Akasiini inni Yekonia dubbi dansa iti dubbatte, hayyoota isa woliini boojiani taani ch'ufa ira isa ulfeese.

³³ Tanaafi Yekoniani woya gaafa isa hid'aani taani keeyachiisani taani baafate, mana hayyu keesa hayyu woliini gololfate.

³⁴ Haga inni jiru ch'ufa guyya ch'ufa beese waan isaa male kennanifi.