Yeremia 5 - KITAABA WAAQA

¹ Worra Yerusalemu kara keesani gula oria! Ilaala, hubad'a! gabaya keesa barbaada! Nama tokole ka waan dansa tolche d'uga gula deemu ingartani? Yo isani agartani, AABBO Waaqi Yerusalemuu inaraarama.

² Ato isani, AABBO Waaqa kad'anna jettanile, dubbini sunini d'ara.

³ Ee AABBO Waaqa, ilti tante d'uga imbarbaadu? Atini worra d'oofte ammo worri ind'ukubsanne, atini worra ch'arasite ammo worri mata jabaate ch'ubbu iraa deebiu dide.

⁴ Jennaani anini herege waan jed'e, worri kunini hiyyeeyi woma imbeenne, worri waan daalluma taha, kara AABBO Waaqaa imbeekhu.

⁵ Anini worra gugurda d'aqe dubbad'aani. Worri suni kara AABBO Waaqa inuma beekha, waan Waaqi fed'ule inuma beekha. Ammo worri ch'ufti woligale dubbi AABBO Waaqa lakise isaa saalfachu dide.

⁶ Tanaafi nyeench'i badda keesaa yae, worra had'e, yayini lafa gamoojiti baate worra tatarsaafte, qeeramsileeni dira keesati nama gaada. Yo worri sunini mana ufitii gabahe, gargari worra tatarsaasani; wonti akanatiifi dabi worraa gudda, bara ch'ufa worri Waaqa lakise iraa gore.

⁷ AABBO Waaqi waan jed'e, Anini maafi ch'ubbu gumi tiyya araaramaafi? Worri na lakise waaqa waaqa intahini kad'ata. Anini worra quubse, ammo worri jaala d'ibi gula bade, maneeni sharmut'ati orie.

⁸ Worri korma farda ka quufe fakaata; namu nad'eeni biyyaati d'arae gula bada.

⁹ Anini maro waan kanatifi worra gaargalchu himmalle? Yokhaani gosa akana tana haalo baafachu himmalle?

¹⁰ Anini nyaapa oobru zabibu ta worra kiyya muru erga; ammo, ch'ufa imballeesina hambisa jed'aani. Ammalle dameele ch'ira, dameeleeni isani kutani sunini tiyyaaniti jed'aani.

¹¹ Worri Israelitiifi ka Yuda ya woli gale naraa gore. Nami dubbi tana jed'e ana, AABBO Waaqa.

Aka AABBO Waaqi worra Israeli dide

¹² Gumiini AABBO Waaqa isa didde waan jette, inni woma intolchu. Wonti hamtuni nuti ind'uftu, woraanafi beelale inagaru.

^13-14 Worri waan jed'e, Raagooti womaniti, qilleensuma, dubbi AABBO Waaqa indubbatu. AABBO Waaqi guddaani waan nani jed'e, Yeremia, waan gumiini tunini dubbi tana jetteefi, Anini dubbi tiyya afaani kanke keesati aka ibida tolcha. Gumiini tunini qoraani fakaati, ibidi gube worra balleesa.

¹⁵ Ee gumi Israeli, AABBO Waaqi gosa fago jirtu had'iisa isanitini d'ufa. Gochiti suni duru lafa jirti, ammalle guddo jabdu, afaani worraale nami keesani tokoleeni imbeekhu.

¹⁶ T'iyoleeni worraaleeni askarti jajabdu, ta naasu male nama ijeeftu.

¹⁷ Worri sunini sagale teesani nyaate fit'e, ilmaani teesani ta d'iiratifi ta dubrale hobaasa. Worri loonifi ree teesani qaqale nyaate, mukeeni teesani ta zabibutifi ta odale balleesa. Worri woraana ufiitini dira jabeesani jaarani, ka isani abdatani, balleesa.

¹⁸ AABBO Waaqi waan jed'u, Bara sunile anini gumi tiyya ch'ufa inhobaasu.

¹⁹ Hojja biyyiti si gaafate, AABBO Waaqi maafi akana nu tolche? jette, waan jettuuni, Akuma isani na lakiftani, lafa teesani keesati waaqa d'ibi hojatani, akasuma isani nama gosa teesani intahini, lafa d'ibi keesati hojatani.

Aka Waaqi gumi ufi gorsu

²⁰ AABBO Waaqi waan jed'u, Worra Yakobotiifi ka Yudati dubbi tana hima, waan jettaniini:

²¹ Me ch'aqasa, gumi daalle woma imbeenne, ta ila qabdu womaani ingarre, gurra qabdu womanu ind'ageenne.

²² Anini AABBO Waaqa; isani maafi na insodaanne? Maafi na durati inholanne? Anini seera baariini maansa tolche lafaani gargari baase seera jiru jireenna ka bisaani indabarre. D'awani ato baariini chochooftele bisaani dandaani seera suni intaakani. D'awani ato dibbiftele dandeete inch'absitu.

²³ Ammo gumi tana, mataani keesani jajaba, waan didani male waan d'ibi imbeetani; isani ya naraa gortani, kara d'ibi iti d'abatani.

²⁴ Ato anini hagayyafi gannale isani roobe bara isani mid'aani muratanile isani tolchele isani taka na sodaatani na inguddimne.

²⁵ Ammo fulla suni, ch'ubbuuni teesani waan dansa kana isani d'owarte.

²⁶ Nama ch'ubbu qabuti gumi tiyya keesa jira; worri aka waan nama simpirre t'ururaani qabu wo gaada, ammo t'urura suni namaa mid'aasa.

²⁷ Akuma nami adamo simpirre subba ufi guutatu, akasuma worri maneeni isaani waan saamanini guute.

²⁸ Tanaafi worri irre baase, guddinna argate wo horate, gabbate moora baase — ch'ubbuuni worraa haga inqabdu; hiyyeeyi d'uga d'owani, nama woma inqamnele dabsani.

²⁹ Ammo anini, AABBO Waaqi, maro waan kanatifi worra gaargalche gosa tana haalo baafad'a.

³⁰ Wonti daba hamtuni ya lafa keesati taate;

³¹ raagooti dubbi d'ara ch'alla fadde; qaaloleeni dubbi worraa gula yaate, gumiini tiyyaleeni waan suni iti quufte. Ammo guyya muumme maani tahani?