Yeremia 41 - KITAABA WAAQA

¹ Jia torbeeso ka ganna suni, Ishmaelini ka ilmi Elishama, ka worra hayyu keesaa d'alate, ka innileeni askarti hayyu keesa guddinna qabu, nama kud'ani woliini Gedalia, ka Mispa jiru, argu d'aqe. Ato worri ch'ufti tae sagale woliini sooratu,

² Ishmaelifi jari kud'annaani isa woliini jiru kaani goraade guuratani Gedalia ijeesani.

³ Ammalle Ishmaelini worra Yahudi ka Gedalia woliini Mispa jirufi askarti Babiloni ta achi jirtule hobaase.

⁴ Boriyyaate, ato nami tokoleeni aka Gedalia ijeesani ind'agayini,

⁵ nami saddeetama Shekemufi Shilofi Samariaa bahe Mispa d'ufe. Worri areeda haadate woya ufi tatarsaase, ufi mamadeese, mid'aanifi hit'aana fuud'e, mana Waaqa geesu jira.

⁶ Jennaani Ishmaeli ka bohaa deemu, Mispaa bahe, worra fuula keesa deeme. Worra fuula keesa d'ufe jennaani waan jed'eeni, D'iiro, koota olduuda Gedalia arga.

⁷ Akuma worri dira duudeeni, Ishmaelifi jari isaa worra hobaase reefa worraa eela guure.

⁸ Ammo worra suni keesa nami kud'ani waan Ishmaelini jed'e, Aabbo nu inhobaasini, nu dargayefi garbuufi d'ad'afi damma yayu oobru keesati d'ossine. Tanaafi inni worra, worra kaani woliini inhobaamne, lubbu baase.

⁹ Eeli Ishmaelini reefa worra hobaase suni iti guure eela gudda toko, ka duri hayyu Asani qot'e, gaafa hayyuuni Israeli, ka Baasha jed'ani, isa had'uu jiru. Ishmaelini eela suni reefa worra sunitini guute.

¹⁰ Duuba inni dubra hayyu ch'ufafi nama Mispa keesa jiru ch'ufa, ka Nebusaradanini, abbaani duula, harka Gedaliati lakise, boojie. Worra boojie jennaani Ishmaelini kae, gara lafa Amoni iti d'aabate.

¹¹ Yohananifi jari gugurda askarti ka isa woliini jiru ch'ufti ch'ubbu Ishmaelini tolche d'ageennaani,

¹² jara ufi fud'ate, faana iti d'aabate, haro Gibeoniti d'aqabe.

¹³ Worri Ishmaelini boojie kaani Yohananifi jara gugurda askarti, ka isa woliini jirule, arginaani gammade,

¹⁴ garagale fuula keesa orie.

¹⁵ Ammo Ishmaelifi jari isaa, nami saddeeti, Yohanaani duraa baqate lafa Amonitini bahe.

¹⁶ Jennaani Yohananifi jari gugurdaa askarti, ka isa woliini jiru, worra Ishmaelini Mispa keesaa boojie, eegi Gedalia ijeese, fuud'e itiini d'aabate — askartifa, nad'eenifa, ijoollefa, jara sasangisiisani mana hayyu keesa hojatu fa.

^17-18 Worri waan Ishmaelini, Gedalia ka hayyichi Babiloni gudda lafa suni tolche ijeesefi, worra Babiloni sodaate. Tanaafi kaani gara lafa Misiri iti d'aabatani, aka akasiini worra Babiloni duraa bahani. Duuba karati dira Kimhamu, ka d'aatu Bethlehemuti, miila d'aabatani.