Yeremia 4 - KITAABA WAAQA

¹ AABBO Waaqi waan jed'u, Isani, worri Israeli, yo deebiu feetani, nati deebia. Yo isani waaqa harkaani mid'aafatani, ka anini jibbu gadi gatani naraa goru diddani,

² d'uga qabdani aka maqa kiyyaani kad'attani. Duuba gochiti ch'ufti, Nuu eebisi nani jette na faarsiti.

³ AABBO Waaqi waan worra Yudatifi ka Yerusalemutini jed'u, Oobru teesani ta qoti inqamne qota; sanyi teesani qoraati keesati infach'asina.

⁴ Wold'aqisa keesani ka AABBO Waaqaani woliini tolfatani, jabeesa, garaa keesani AABBO Waaqati kennad'a, isani worri Yudatifi ka Yerusalemuleeni. Yo isani akasi tolchu diddani, maro isani waan hamtu tolchitanifi dallansuuni tiyya aka ibida isani gubdi nami tokoleeni ka dandae d'aamfu injiru.

Aka Yuda nyaapi mudamsiise

⁵ Lafa teesani ch'ufa keesa magalata d'aa, aka male iyya lalaba. Ammalle waan worra Yudatifi ka Yerusalemutini jettani, wolti baha, dira jabeesani jaaraniti nu yaasa.

⁶ Kara Sioni woli akheekha! Hurrisa, achiti baqad'a, lubbu teesani baasa! AABBO Waaqi hameennaafi badi gara mirgati d'ufuuni jira.

⁷ Akuma nyeench'i goda isaa keesaa bahu, akasuma nami gosa ch'ufa balleesu ya gabahe. Inni lafa Yuda balleesu d'ufe. Diri Yuda bade ona taha, nami iti galu injiru.

⁸ Tanaafi ch'arqi naqad'a, lalaba, boha; wonti akanatiifi dallansuuni AABBO Waaqaa hamtuni worra Yuda iraa ingalle.

⁹ AABBO Waaqi waan jed'u, Guyya suni hayyootafi jaaroleeni garaa laafte, qaaloleeni rifate, raagootileeni mamti.

¹⁰ Jennaani anini waan jed'e, Ee AABBO Waaqa gudda, atini yayu worra Yerusalemu aka male sobde balleesite! Atini lafti nagaya jette ka goraadeeni lubbu worraati ejitu.

¹¹ Guyyaani ind'ufa, ka worra Yerusalemu dubbi tana iti himani: bubbe owituti lafa aloo keesa isaniti gad'ufa. Bubbeeni sunini qilleensa laanuma woi afufuniti —

¹² bubbeeni AABBO Waaqi d'ufuuni hagasi ira jabdu! AABBO Waaqumati gumi isaa badiini iti d'ufuu jira.

Aka Yuda nyaapi marse

¹³ Me ilaala, nyaapi aka baaldo dumansaa d'aabate d'ufuu jira. Gaarini isaa ka fardi hirkisu bubbe fakaata, fardooleeni worraleeni risa ira barifti. Nu ya banne, badiini ya nu qabate!

¹⁴ Ee Yerusalemu, t'uri ch'ubbu garaa kanke keesaa d'iqi, aka baafamtu. Yomi herega daba kana heregu lakifta?

¹⁵ Qonqooni gara dira Danitifi gaareeni Efraimuti odu hamtuni d'ufte

¹⁶ waan jette, waan isani gosa ch'ufafi worra Yerusalemutileeni jettani, Nyaapi lafa fagooti isaniti d'ufuu jira, ka dira Yudati lalabe,

¹⁷ Yerusalemu aka nama oobru tissu marsu, waan gumiini isii AABBO Waaqa diddeefi. Nami dubbi tana jed'e AABBO Waaqa.

¹⁸ Yuda, adabuma keetifi woma atini taateti waan kana sitini d'ufe. Ch'ubbuma teetiti badii tana sitini d'ufe — isiini ya onne si d'oofte si ijeefte.

Aka Yeremiani gumi isaati nahe

¹⁹ Anini waan kana aka takaa inargini laalefad'e, dandae inoobsu! Onneeni tiyya teete na keesati buubdi, dandae afaani inqabad'u! Anini magalata d'aanifi iyyanna worra woli had'u d'agaya.

²⁰ Badiini woluma gula d'ufte, lafti ch'ufti badde ona taati, maro tokotu waaro teenna balleesani, golla isiile gargari tarsaasani.

²¹ Anini haga yomi duula wolti kau kana argu lakisa?

²² AABBO Waaqi waan jed'u, Gumiini tiyya raatu, nale imbeetu, worri ijoolle woma imbeenne, ta woma inhubanne, fakaata. Worri aka waan hamtu tolchu guddo iti qaro, ammo aka waan dansaa tolchu guddo iti daalle.

Badii d'uftu ta Yeremiani daayyani arge

²³ Anini lafa ilaale — isiini duwa, aka injirtu; gubbale millad'e — ifsa d'abe.

²⁴ Anini gaareeni ilaale — isiini chochou jirti, kubileleeni ufumaa teete hargufamti.

²⁵ Anini millad'e nama d'abe, simpirreleeni ch'ufti ya barifte iti d'aabatte.

²⁶ Ammalle anini millad'e, lafti gabboni duri wo baaftu gamooji taate; maro dallansu AABBO Waaqatifi diri isiileeni ya bade ona tahe.

²⁷ AABBO Waaqi waan jed'u, Lafti ch'ufti badde raasa taati, ammo taatule ch'ufa imballeesu.

²⁸ Lafti boote, gubbaleeni dukanoofti. AABBO Waaqi ya jed'e, dubbi ufi gara ingalchu; inni ya buufate, ufi ira indeebiu.

²⁹ Iyyanna worra farda yaabatutifi worra t'iyaani wo had'u, yo d'agayani nami dira keesa jiru ch'ufti imbaqata. Nami gari baddati baqate, ka gari d'akhaye kora. Dira ch'ufa duwa lakisani, nami deebie keesa intau.

³⁰ Ee Yerusalemu! Atini ya badde! Atini maafi woya diimtu uyifatte, faaya worqi naqatte, ila kuulatta? Atini ufumaa ufi ch'ota! Jaalani tante ya si jibbite si ijeesu feeti.

³¹ Anini iyyanna niiti ch'ininfatu d'agaye waacha niiti takaa ind'aalini. Iyyanti suni ta Yerusalemu, ta yo isiini hafuura baafachu dad'abde, harka olqabate, anini ya bade, nyaapi na ijeesu fed'a jettu!