Yeremia 39 - KITAABA WAAQA

¹ Jia kud'anneeso, ka ganna sagaleeso ka Sedekiani lafa Yuda mohate hayyuuni Babiloni Nebukadrezani duula isaa ch'ufaani d'ufe, Yerusalemu had'e.

² Guyya sagaleeso, ka jia afreeso ka ganna kud'ani tokeeso, ka Sedekiani lafa mohate, naabo dira ch'ach'absani.

³ (Gaafa Yerusalemu dabsatani qabani, hojattuuni gugurdoni hayyu Babiloni ch'ufti d'ufte, Fullo jidu diraa keesa teteette. Jara hojattu suni haga toko maqaani worraa kana: Nergal-Shareza, Sangar-Nebo, Sarsekimu, ammalle Nergal-Shareza d'ibi.)

⁴ Hayyu Sedekiafi askartini isaa ch'ufti waan tahe kana arginaani halkaniini dira keesaa baqachaa kaani. Worri kara oobru hayyu yae, Fullo naabo lamaani jiddu jirtu keesa dabre, qajeela bale Yordani baqate.

⁵ Ammo duuli Babiloni worra reebe, d'aatu Yerikoti diida keesati Sedekia qabe. Duuba hayyu Nebukadreza, ka dira Ribla lafa Hamathi, keesa jiruti geesani, achiti Nebukadrezani, isa qore waan tolchuu malani iti mure.

⁶ Ribla keesati inni ilmaani Sedekia, ka Sedekiani tae ilaalu, fit'e, jaarole gugurdo Yudale ch'ufa hobaase.

⁷ Duuba eege Sedekia ila lachu keesa baase, sansalatani hid'e aka lafa Babiloni geesani.

⁸ Worri Babiloni mana hayyutifi maneeni biyya gube, naabo Yerusalemu ch'ach'abse.

⁹ Duuba eege Nebusaradanini, ka abba duula, nama dira keesati hafe ch'ufa boojie, Babiloni geese, worra booju isa kad'ate woliini.

¹⁰ Lafa Yuda keesa inni nama hiyyeeyi woma inqamne hambise, oobru zabibutifi oobru mid'aani d'ibi kenneefi.

Aka Yeremia gad'iisani

¹¹ Hayyu Nebukadrezani Nebusaradani abba duula yaame waan jed'eeni, Nama ergi,

¹² waan jettuuni Yeremia barbaada, jabeesa, qorqorad'a, woma intolchina, ammo waan inni fed'u ch'ufa tolchaafi.

¹³ Jennaani Nebusaradanifi jara gugurda, Nebushazabani jed'anifi, Nergal-Sharezafi, jari gugurdaani hojattu ka hayyu Babiloni ch'ufti

¹⁴ naabo mana hayyu keesaa na fuud'e. Duuba harka Gedalia, ilma Ahikamu, ka ilma Shafaniti na kennani, aka inni na jabeese na qorqorate worraani na gahu. Akanaani anini gosuma teenna keesa tae.

Aka Ebedmeleki lubbuu baasani

¹⁵ Ato anini ammalle naabo mana hayyu keesa fulla iti na hid'aani taani jiru, AABBO Waaqi waan nani jed'e,

¹⁶ Beeni, gara namicha gosa Kushi, ka Ebedmeleki jed'ani, d'aqi, waan jettuuni, AABBO Waaqi, guddaani Israeli, waan jed'u: Akuma anini duri jed'e anini dira kana eebaniti, badii itiini d'ufa. Gaafa wonti kunini taatu atini iluma teetiini garta.

¹⁷ Ammo anini, AABBO Waaqi, si qorqorad'a, harka worra atini sodaatuti, si inkennani.

¹⁸ Anini si baase woraanaani, duu si d'owa. Waan atini na d'ugeefateefi atini lubbu baata. Nami dubbi tana jed'e ana, AABBO Waaqa.