Yeremia 37 - KITAABA WAAQA

¹ Nebukadrezani, hayyuuni Babiloni, Sedekia, ilma Yosia, fuud'e, fulla Yehoiakini, ilma Yehoiakimu, hayyu Yuda tolche.

² Ammo Sedekiafi hojattu isaatifi biyyiti d'ibileeni dubbi AABBO Waaqi nani jed'e inch'aqamne.

³ Hayyichi Sedekiani Yehukali ilma Shelemiatifi qaallicha Sefania, ilma Maaseya, nati erge waan nani jed'e, gosa teenna tana ch'ufaa jed'i, AABBO Waaqa keenna nuu kad'ad'i.

⁴ Angaafasi qara mana hid'aansa keesa na inkeenne, akuma fed'u biyya keesa deema.

⁵ Duuli Babiloni qara dira Yerusalemu marse achi taa; ammo aka duuli Farao Misiri bahe d'ageennaani kae biraa yae.

⁶ Jennaani AABBO Waaqi Israeli, waan nani jed'e:

⁷ Waan atini Sedekia ka gara kiyya si ergeeni jettu, Duuli Farao, ka si qarqaara karaa jiru, lafa ufiti dachaa.

⁸ Duuba worri Babiloni dachae dira kana had'e dabsate, gube balleesa.

⁹ Wonti AABBO Waaqi jed'e tana: Worri Babiloni ya nu biraa yae jettani ufi insobina worri inuma dachaa.

¹⁰ Ato isani duula Babiloni ch'ufa dabsatani nama madae ch'alla waaro keesati hambiftanile worruma suniti kakae dira kana gube balleesa.

Aka Yeremia qabani hid'ani

¹¹ Duula Farao ka gad'ufuu jiru d'ageennaani duuli Babiloni Yerusalemu biraa yae.

¹² Tanaafi anini Yerusalemu keesaa deemaa kae, aka lafa Benjamini d'aqe lafa worra keenna d'alaa kennani qooda kiyya fud'ad'u.

¹³ Anini Fullo Benjamini geennaani guddaani askarti, ka lafa eegu, ka Iriya, ilma Shelemia, ka ilma Hanania jed'ani, na qabe waan nani jed'e, Atini goli worra Babiloniti, tanaafi gara worra suni baqachuu jirta!

¹⁴ Anini waan jed'eeni, Askasiniti, anini gara worra Babiloni baqachuti injiru. Ammo Iriyaani na ch'aqasu dide, na qabe, gara jaarole na geese.

¹⁵ Worri aka male nati dallane, na d'aanani, mana Yonathani, ka tatabe t'aafu, ka mana isa mana hid'aansa tolchaniti na hid'ani.

¹⁶ Boola aka mana jirtuti na galchani, guyya heddu achi na bulchani.

¹⁷ Jennaani eegi suni hayyu Sedekiani na yaame, duuba mana hayyutini na d'ufani, hayyuuni kobati woi na gaafate waan jed'e, Dubbini gara Waaqati d'ufte jirti? Anini Ee injirti, harka hayyu Babiloniti si kennani jed'eeni.

¹⁸ Duuba, anini waan jed'eeni siifi jara hojattu teeti kanafi gumi tana durati mali yakeefi hid'aansa keesa na keeta?

¹⁹ Raagooti tante, ta, hayyuuni Babiloni siifi lafa tante inhad'u siini jette, meeti?

²⁰ Amma tana ee hayyicha, anini si kad'ad'a, na d'agayi, mana Yonathani, ka hid'aansa suniti na indeebisiini yo atini achiti na deebifte anini indua.

²¹ Jennaani hayyu Sedekiani, naabo mana hayyu keesati hid'a jed'e, achiti na hid'ani. Duuba anini achi tae, guyya ch'ufa qit'a toko fulla iti d'aabani fuud'ani naa kennani, haga qit'aani dira suni keesaa inhobaini.