Yeremia 33 - KITAABA WAAQA

¹ Ato anini ammalle hid'aansa naabo kaani keesa jiru, ammalle AABBO Waaqi naani dubbate.

² AABBO Waaqi ka lafa uume mid'aase jabeese, ka maqaani isaa AABBO Waaqa, waan nani jed'e,

³ Na yaami si, jalaa owaad'a, duuba waan mama dansa ka atini waan isii imbeenne siti hima.

^4-5 Anini, AABBO Waaqi Israeli, waan jed'u, maneeni Yerusalemutifi mana hayyu ka Yudale imballeesani. Yo nami bahe worra Babiloni ka biyye tuule dira kanaani marse had'ele hujiini sunini woma imbaatu. Ammo wonti isiini d'uftuni, reefuma nama anini dallansu tiyya keesa hobaase, ka dira kana keesa guute ch'alla. Anini yayu dira kana fuula iraa deefad'e, maro nami isa keesa tau waan hamtu tolcheefi.

⁶ Ammo anini dira kanafi nama isa keesa tau, d'ukuba iraa d'owe fayya kenneefi nagayafi hormaatale kennafi.

⁷ Anini worra Yudatifi ka Israeli eebise, finna duri worri keesa jiruti deebisa.

⁸ Anini ch'ubbu worri duri nati ch'ubbame ch'ufa iraa qulqulleese, wollaala worri na dide keesa seene ch'ufa araaramaafi.

⁹ Diri kunini gammadafi ulfinnaafi gurraani naa d'ufa; ammalle gochiti ch'ufti sodaate mudamti, hojja waan dansa anini worra Yerusalemuti tolcheefi hormaata anini dira sunitini d'ufu d'ageetu.

¹⁰ AABBO Waaqi waan jed'u, Biyyiti waan jettu, fullaani tunini lafa aloo ta namafi saa inqamne fakaati. Worri d'uga dubbate; diri Yudatifi karaani Yerusalemuleeni duwa, namaafi saaileeni keesa injiru. Ammo fulla tanati, ammalle

¹¹ qonqo gammadaatifi ta qilit'amatifi qonqo gammada ta guyya fuud'a, d'agayani. Qonqo nama waan galata baasani Mana kiyyaani d'ufe sirbule d'agayani. Worri waan jed'u, AABBO Waaqa gudda galata deebisa, inni dansa, jaalalti isaaleeni haga jiru jireenna teeti. Anini lafa tana eebise finna duri isiini qabdu kaani deebisaafi. Nami dubbi tana jed'e ana, AABBO Waaqa.

¹² AABBO Waaqi guddaani waan jed'u, lafa aloo fakaatu ta namaafi saa inqamne tana keesa takaa tana marri dansaani iti bahe, tissituuni achiti hori tissiti.

¹³ Diri lafa gaareenitifi ka lafa golbootifi ka lafa bitaa ta Yudatifi ka lafa Benjaminitifi ollowaani d'aatu Yerusalemutifi dira Yuda keesale, tissituuni akuma duri deebite ree tohati. Nami dubbi tana jed'e, ana AABBO Waaqa.

¹⁴ AABBO Waaqi waan jed'u guyyaani ind'ufa, ka anini kakhu duri worra Yerusalemutifi ka Yudati kakhad'e guutu.

¹⁵ Gaafasi anini d'aloota Daudi keesa nama d'ugaa toko fohad'e, hayyu tolcha. Inni waan d'ugaatifi ka qajeela lafa suni keesati tolcha.

¹⁶ Worra Yudatifi ka Yerusalemu lubbu baasani nagayaani teesisani. Dira sunile maqa iti baasani, AABBO Waaqi D'uga teenna jed'ani.

¹⁷ AABBO Waaqi waan jed'u, Nama d'aloota Daudi, ka hayyu Israeli tahu ind'abani,

¹⁸ ammalle qaalole gosa Lawi ta naa hojate, sorio gubanifi mid'aani Waaqa baasanifi sorio d'ibile baaftu ind'abani.

¹⁹ AABBO Waaqi waan nani jed'e,

²⁰ Anini yayu halkanifi guyyale wold'aqisa woliini tolfad'e, aka worri hojja ch'ufa hojuma malte gula d'ufu; wold'aqisa suni dandaani inch'absani.

²¹ Akasuma anini hojattu tiyya Daudi wold'aqisa woliini tolfad'e, aka d'aloota isaa keesaa nama hayyu tahu ind'amne. Ammalle anini qaalole gosa Lawi wold'aqisa woliini tolfad'e, aka isiini hojja ch'ufa; naa hojatu; wold'aqisa suni lachu dandaani inch'absani.

²² Anini d'aloota hojattu tiyya Dauditifi qaalole gosa Lawi daraarse lafa ira dabarsa duuba akanaani worri lafa ira dabre, akuma urji gubbatiifi maansa afaani galaanale dandaani inhenne worrale akasuma dandaani inhenne.

²³ AABBO Waaqi waan nani jed'e,

²⁴ Atini biyyiti teete, AABBO Waaqi Israelifi Yuda, worra lamaani inni fohate ya lakise jettu ind'ageenne? Tanaafi worri gumi tiyya tufate, gosati worra heregu dide.

²⁵ Ammo anini, AABBO Waaqi, yayu halkanifi guyyale wold'aqisa woliini tolfad'e seera lafafi gubbaani gula deemtule tolche.

²⁶ Duuba akuma anini waan kana tolche, akasuma anini wold'aqisa kiyya, ka anini d'aloota Yakobotiifi hojattu tiyya Daudi woliini tolfad'e jabeesa. Anini d'aloota Daudi keesaa nama toko, ka d'aloota Abrahamutifi Isaaqofi Yakobo fidu fohad'a. Anini gumi tiyyaa nahe, worrileeni deebie wo horata.