Yeremia 27 - KITAABA WAAQA

¹ Akuma Yosiani, ilmi Sedekia, hayyu Yuda taheeni, AABBO Waaqi waan nani jed'e,

² Qaampara gogafi mukhaani mid'aafad'i, morma ira keeyad'i.

³ Duuba gara hayyu Edomutifi ka Moabutifi ka Amonitifi ka Tirotifi ka Sidoni, jara worri gara Sedekia hayyu Yuda ka Yerusalemu jiruti ergeeni qonqo ergi.

⁴ Qonqooni atini worraani, hayyoota keesaniti d'aama jettuuni tana: Wonti AABBO Waaqi guddaani, Waaqi Israeli, jed'u tana:

⁵ Irreefi jabeenna kiyya guddaani anini lafafi namaafi bineensa lafa keesa jiru ch'ufa uume, lafa suni nama anini jaalad'u kenna.

⁶ Nami gosa tana ch'ufa harka hojattu tiyya Nebukadreza hayyu Babiloniti kenne anuma, anini bineensa alalle ch'ufa isa jalati bulche.

⁷ Gochiti ch'ufti isaafi ilma isaatifi akhaakhu isale jalati bulti, haga guyyaani lafti isaa baddu gahuti. Duuba gaafasi gochiti isaa gosa jabduufi hayyoota gugurdo jalati bulti.

⁸ Ammo yo lafafi gochiti toko isa jalati bulu didde, anini gosa suni woraanafi beelafi d'ukubaani balleesa, haga Nebukadrezani jabeenna ufitini gosa suni balleesuti.

⁹ Tanaafi raagoota teesanifi nama wo himuufi nama oobju qabuufi nama ekhera wo gaafatufi falfatu, hayyu Babiloni jalati imbulina isaniini jettule inch'aqasina.

¹⁰ Worri isani sobe aka boojiani lafa teesani ira isani fageesani isani tolcha. Anini lafa teesani keesaa isani baase, duuba akasiini isani balleesani.

¹¹ Ammo yo gochiti tokoleeni ee jette hayyu Babiloni jalati bulte, Anini gosa suni lafa isaani keesati lakise, Worri oobru qotate achuma taa. Nami dubbi tana jed'e ana, AABBO Waaqa,

¹² Anini woma suni Sedekia hayyu Yudati hime waan jed'e. Ee jed'aa, hayyu Babilonitifi nama isa ch'ufa jalati bula, duuba injiraattani.

¹³ Siifi worri kanke maafi woraana yokhaani beela yokhaani d'ukubaani dootani? Wonti AABBO Waaqi gosa ee jette hayyu Babiloni jalati bulu diddu tolchu suni.

¹⁴ Raagoota, hayyu Babiloni jalati imbulina jettu, inch'aqasina. Worri isani sobuu jira.

¹⁵ AABBO Waaqumati, Anini raagoota suni inergine, worri maqa kiyyaani waan d'ara faguu jira jed'a. Tanaafi inni isani gusse, isanifi raagoota waan d'ara kana isaniti himtu tanale ijeesani.

¹⁶ Jennaani anini waan qaaloleefi gumi ch'ufaani jed'e, AABBO Waaqi waan jed'u, raagoota, miha Mana Waaqa ka boojiani lafa Babiloni geesani d'iotu indeebisani jettu, inch'aqasina. Worri isaniti kiyyibuu jira.

¹⁷ Worra inch'aqasina, hayyu Babiloni jalati bula, injiraattani! Diri kunini maafi bade ona taha?

¹⁸ Yo worri d'uguma raaga tahe dubbi AABBO Waaqatini dubbate, worri ha ana, AABBO Waaqa gudda gaafatuti, aka miha Mana Waaqa keesati hafufi miha d'ibi ka mana hayyu keesa jirule Babiloni ingeesine.

^19-20 (Gaafa hayyichi Nebukadrezani Yehoiakini, ilma Yehoiakimu hayyu Yudatifi jaarole Yudatifi ta Yerusalemu boojie lafa Babiloni geese, inni utuba Mana Waaqatifi haro sibiila diimatifi gaarifi miha Mana Waaqa d'ibile achumati hambise.)

²¹ Waan miha suni ka Mana Waaqatifi mana hayyu ka Yerusalemuti hafe ka anini, AABBO Waaqa guddaani Israeli jed'u, ch'aqasi:

²² Miha suni lafa Babiloni geesani, haga anini barbaada d'ufuti achumati lakisani. Duuba eegi suni anini guure, fulla tanati deebisa. Nami dubbi tana jed'e ana, AABBO Waaqa.