Yeremia 25 - KITAABA WAAQA

¹ Ganna afreeso ka Yehoiakimuni, ilmi Yosia, hayyu Yuda tahe, qonqooni waan worra Yuda dubbatu AABBO Waaqa iraa nati d'ufte. (Gaafasi ganna qara ka Nebukadrezani hayyu Babiloni tahe.)

² Jennaani anini waan worra Yerusalemutifi ka Yudatini jed'e.

³ Ganna diddami sadi haguma ganna kud'ani sadeeso ka Yosiani, ilmi Amoni, hayyu Yuda tahe asi haga arrale Waaqi nani dubbachu illakimne, aninileeni maro ch'ufa dubbi suni ya isaniti hime; ammo isani ch'aqasu diddani.

⁴ Ato AABBO Waaqi raagoota hojattu isaa isaniti bara ch'ufa ergele, isani inch'aqamne yokhaani dubbi suni womatu indarre.

⁵ Worri waan jed'e, Isani nami ch'ufti kara hama kanafi waan hamtu tahuti, jirtani kana iraa deebia, duuba akanaani lafa AABBO Waaqi isanifi ababoota teesani haga jiru jireenna d'aalaa kenne keesa teetani.

⁶ Waaqoota d'ibi gula yaatani hojattani inkad'atiina, waan harkaani boch'atani kad'attani AABBO Waaqa indallansisina. Yo isani akasi taatani Waaqi woma isani intolchu.

⁷ Ammo AABBO Waaqi waan jed'u, Isani na ch'aqasu diddani, waan harkaani boch'ani kad'attanini na dallansiiftani, duuba akanaani badi ufitini d'uftani.

⁸ Tanaafi AABBO Waaqi guddaani waan jed'u, Waan isani dubbi tiyya ch'aqasu diddanifi,

⁹ anini gosa mirga teetu ch'ufafi hojatu tiyya Nebukadreza hayyu Babiloni yaame, lafa tanaafi nama isi keesa taufi lafa d'aatu jirtu ch'ufa haasisa. Anini gosa Yuda tanaafi gosa worra d'aatu teetule balleese lafa worrale haga jiru jireenna onse waan nami hojja qaabatu ch'ufa iraa rifatu tolcha. Nami dubbi tana jed'e ana, AABBO Waaqa.

¹⁰ Anini qonqo gammadaatifi ta qilit'amatifi gammada guyya fuud'a, ch'allisise worri d'ad'a ifsaani bobeesani d'abe mid'aani d'akha irati daakhani d'aba.

¹¹ Lafti tunini ch'ufti badde ona taate, gochiti tunini ch'ufti ganna torbatama harka hayyu Babiloni jalati bulti.

¹² Ammo eegi ganni torbatama hobae, anini hayyu Babilonitifi lafa isaa ta Babiloni jed'ani maro ch'ubbu worraatifi balleese, haga jiru jireenna ona tolcha.

¹³ Anini lafa Babiloni badi anini qara waan isii hime, ta kitaaba kana keesati t'aafani Yeremiani fage gosa ch'ufati odeese, itiini d'ufa.

¹⁴ Anini worra Babiloni, waan worri tahe, gula, worra gaargalche, gosa heddufi hayyooti gugurdoni tisse worraa tolfatti.

Aka Waaqi gosa ch'ufati dallane

¹⁵ AABBO Waaqi Israeli waan nani jed'e, Muduunu daad'i, ta dallansuuni tiyya keesa jirtu tana, naraa fuud'i, gosa anini iti si erge tana ch'ufa obaasi.

¹⁶ Worri yo d'uge dadaaqe mamaraata, maro woraana anini worrati erguufi.

¹⁷ Duuba anini muduunu suni AABBO Waaqa iraa fuud'e, gosa inni iti na erge ch'ufa obaase.

¹⁸ Yerusalemufi dira Yuda ch'ufafi hayyoota isiitiifi jaarole isii ch'ufale inobaasani, duuba lafti worraa badde ona taate, hojja qaabatani ch'ufa nami waan isii iraa rifata, maqa isiitiini woli abaara — akuma arrale woli tolchani.

^19-26 Kunini maqa worra muduunu suni keesaa wo d'uge: Hayyu Misiritiifi jara hojattu isaa gugurdafi jaarole isaatifi nama lafa isaa ch'ufafi nama gosa d'ibi ka lafa isaani keesa godaanule; hayyoota lafa Uzi: Hayyoota dira Filisti, ka Ashkelonifi Gazafi Ekroni, ammalle dira Ashdodi gama hafele; worra gosa Edomufi Moabufi Amonile; hayyoota Tirotifi ta Sidonile; hayyoota lafa afaani baariini ch'ufa; dira Dedanitifi Temafi Buzi; worra mata gabaabse ch'iratu ch'ufa; hayyoota Arafti; hayyoota gosa lafa gamooji keesa teetu ch'ufa; hayyoota lafa Zimritifi ta Elamutifi ta Medi ch'ufa; hayyoota lafa mirga ta fago teetufi ta d'io teetule woluma gulaani; gosa lafa gubba jirtu ch'ufa haguma isiini geetunu inobaasani. Duuba eege qit'isu hayyu Babilonile obaasani.

²⁷ Jennaani AABBO Waaqi waan nani jed'e, Waan atini worraani jettu, AABBO Waaqi guddaani, Waaqi Israeli, waan jed'u: D'uga, machaa, diddifad'a, woraana anini isaniti erguuni hobaa, haguma jirtani inkaina.

²⁸ Ammo yo worri muduunu harka kanke iraa fuud'e d'ugu dide, waan jettuuni, wonti AABBO Waaqi guddaani jed'u, silaaftu kama d'uddani!

²⁹ Anini badi worra kana diruma maqa kiyya qabu kanaani iti keeyad'a. Isani waan gaargala kana jalaa baatani seetani? Hiyo jalaa imbaatani; wonti akanatiifi nama lafa keesa jiru ch'ufa anini woraana iti kaasa. Nami dubbi tana jed'e ana, AABBO Waaqa gudda.

³⁰ Yeremia, atini waan anini jed'e kana ch'ufa worrati himi, waan jettuuni: AABBO Waaqi gubbaa itane, gara inni tau ka gubbati mandia. Ammalle gumi isati itane, aka nama zabibu ch'ach'arasu iyya. Nami lafa keesa jiru ch'ufti isa d'agaye,

³¹ qonqo isaa suni, hogaani isii, haga muumme lafa gaha. AABBO Waaqi gosa ch'ufa dubbi iraa qaba. Inni nama ch'ufa qorsumatini d'ufe worra ch'ubbu woraanani fit'a. Nami waan kana jed'e ana, AABBO Waaqa.

³² AABBO Waaqi guddaani waan jed'e, Me ilaala, badiini gosa ch'ufa woluma gula qabachuuti jirti. Bubbeeni guddoleeni muumme lafati d'ufuu jirti.

³³ Guyya suni reefi nama AABBO Waaqi fit'u lafa haguma isiini geetunu fulla ch'ufa ch'iisa. Nami worraa bohe reefa suni wolti guure awaalu injiru, reefi worraa akuma huura lafa ch'iisa.

³⁴ Jaarole gumi tiyya tissitu, iyya, boha! Boha, biyye keesa gangalad'a. Guyyaani isani qaqalani ya gahe akuma Elemiye gagabbo isani qaqalani.

³⁵ Fullaani isani baqattani iti baatani injirtu.

^36-37 Isani bootani, gaargala keesa arrifattani, waan AABBO Waaqi dallansu ufi keesa gosa teesani balleese lafa teesani ta nagaya qabdu ona tolcheefi.

³⁸ AABBO Waaqi yayu gumi isa lakise akuma nyeench'i goda ufi lakisu. Maro woraana nyaapatifi dallansu hamtu AABBO Waaqale lafti yayu badde aloo taate.