Yeremia 2 - KITAABA WAAQA

¹ AABBO Waaqi waan nani jed'e,

² Beeni, Yerusalemu d'aqi, waan nama isii ch'ufaani jettu, AABBO Waaqi waan jed'u, Anini imbeekha, aka atini gaafa kaima na d'ugeefatte, gaafa anini si fuud'e na jaalatte. Atini lafa gamooji keesa na gula deemte, lafa nami takaa infach'aasini.

³ Ee Israeli, atini gaafasi tiyyuma worra qulqullo anini qara d'ale. Anini gaargalafi badi nami siti game ch'ufatini d'ufa. Nami dubbi tana jed'e ana, AABBO Waaqa.

Daba ababooti Israeli duri tolchite

⁴ Dubbi AABBO Waaqa d'agaya, isani d'alooti Yakobo, ka gosa Israeli.

⁵ AABBO Waaqi waan jed'u, Ababooti teesani wollaala maani narati garteefi naraa fagaate waan woma intahini gula yaate ufile akasuma taate?

⁶ Worri, ato anini lafa Misiri keesaa baase lafa aloo ta gamooji lafa d'eebicha ta maansa qabdu, lafa goddu gaargala heddu qabdu, ta nami tokoleeni iti qubate yokhaani imaltule keesa indeemne, keesa worraani deemele, diqole na iyyaalle.

⁷ Anini lafa gabbo wo qabduni d'ufe, aka worri mid'aani isiitiifi waan dansa d'ibi isiini baaftu nyaate gammadu. Ammo fulla suni worri lafa tiyya balleese, lafa anini d'aalaa worraa kenne t'ureese.

⁸ Qaaloleeni, AABBO Waaqi me? Jette ingaafanne. Qaaloleeni tiyyaleeni na imbeenne. Jaaroleeni na didde, raagootileeni maqa Baalitini wo fadde, waan woma keesa injirre gula yaate kad'atte.

Aka AABBO Waaqi gumi ufi himatu

⁹ Tanaafi anini, AABBO Waaqi, gumi tiyya ammalle himad'a d'aloota worrale ch'ufa.

¹⁰ Lafa Kitimu jed'ani ta ila aduu d'aqaa, lafa Kedari ta ilaborule nama iti erga. Duuba inagartani, aka wonti akana kunini takaa lafa keesati intahini.

¹¹ Gochiti d'ibiini ta taka waaqa ufi jijirate injirti? (Ato inni waaqa woma keesa injirre tahele.) Ammo gumiini tiyya yayu naa jijiratte, ana, Waaqa gurra worraa kenne, lakifte, waaqa woma keesa injirre gula yaate,

¹² Tanaafi anini gubbaani, mudami holad'i, mami, maadefad'i jed'eeni.

¹³ Wonti akanatiifi gumiini tiyya yayu kara lamaani ch'ubbu tolchite: Worri yayu ana madda inch'inne lakise, qaba bisaani, ta babaqat'e bisaani keesa inteenne heddu qotate.

Aka worri Israeli Waaqa lakimnaani gaargala argate

¹⁴ Worri Israeli tisse? Tissooma keesa d'alate? Maafi nyaapi had'e balleesa re?

¹⁵ Nyaapi sunini aka nyeench'a worrati itane, lafa worraa balleese, diri worraleeni bade, ona tahe lafati hafa.

¹⁶ Ammalle, worri Nofutifi ka Tahapanesi ya d'ufe buqe mata worraa ch'abse.

¹⁷ Ee Israeli, waan kana isanumati ufitini d'ufeeniti? Ka AABBO Waaqa keesani, gaafa duri inni isaniini godaane lakiftani.

¹⁸ Mala keesaani, isani yo lafa Misiri d'at'ani, bisaani galaana isii d'uddani, waan woi keesaa argatani seetani? Mala keesaani, isani yo lafa Ashuru d'at'ani, bisaani galaana Frati d'uddani, waan woi keesaa argatani seetani?

¹⁹ Hameenni keesani isani gaargalche, badiini isani naraa baddani wollaala isaniti murti. Aka hojja isani na lakiftani na gula deemu diddani, wonti sunini hamtu, herega, arga. Nami dubbi suni jed'e ana, AABBO Waaqa gudda.

Aka worri Israeli AABBO Waaqa kad'achu dide

²⁰ AABBO Waaqi guddaani waan jed'u, Ee Israeli, isani duri dubbi tiyya lakiftani naa saalfachu diddani, waaqa d'ibi kad'atani kubilee d'ed'eertu ch'ufafi mukeeni gugurdo ch'ufa jalati waaqa d'araa kad'atani, huji sharmut'oma tolchitani.

²¹ Anini duri aka sanyi zabibu dansaa isani oobre, amma waan isani taatani laala. Isani mukha zabibu, ka shame woma imbaamne, fakaatani.

²² Ato isani sabuna beekhaanileeni ufi d'it'ani, t'urini ch'ubbu teesani isani iraa imbaatu, anini inuma arga.

²³ Isani akami, Anini t'uri inqabu, anini takaa waaqa Baali jed'ani inkad'anne jettani? Ch'ubbu isani bale keesati tolchitani, ilaala, hubad'a. Isani aka hala gaala ta ufuma badde,

²⁴ lafa gamooji keesa lafa martu fakaatani. Yo isiini daarimte korma feetu, eenuti d'owu dandaa? Kormi isii barbaadu gaargala womatu inqabu; isiini yo kormi yaabu ch'ufa kurfo jirti.

²⁵ Ee Israeli, ufumaa teetani miila keesani indad'absisina, yokhaani waaqa d'ibi gula deemtani lubbu teesani ingogosina. Ammo isani waan jettani, Hiyo, nu dandeenne illakimnu, nu yayu waaqa d'ibi jaalane, isuma gula baana.

Israeli gaargalchu malani

²⁶ AABBO Waaqi waan jed'u, Akuma hattuuni hojja qabani ch'eertu, isanileeni gumi Israeli akasuma ch'eertani — hayyootafi jaarole teesanifi qaaloleefi raagooti teesanileeni.

²⁷ Isani ch'ufa inch'eersani, ka mukhaani, Aabbo jettani, D'akhaani, siti na d'ale jettani. Wonti akasi isani tolchanifi waan isani dudda nati galtani, fuula naraa deefattaniifi. Ammo hojja gaargali isaniti d'ufu, nati d'uftani, kooti, nu baasi jettani.

²⁸ Waaqi isani mid'aafattani meeti? Yo isani gaargala qabaatani ha isani baasuti, yo dandae! Yuda, waaqi kanke akuma dira keeti heddu.

²⁹ Gungumsuni te maani? Maafi nati garagalte na didda?

³⁰ Ato anini isani gaargalchele, wonti sunini woma isanii imbaane. Isani wollaala keesani iraa deebiu diddani. Isani ya akuma nyeench'a dallane, raagoota teesani hobaaftani.

³¹ Worra Israeli, dubbi tiyya ch'aqasa. Anini yayu aka lafa aloo ta gamooji, yokhaani aka lafa dukanooftu soda qabdu, isaniti tahe? Isani duuba maanifi, Nu waan feenu taana deebine siti indeebinu nani jettani?

³² Niitiini d'io fuud'ani, faaya isii indeeti? Intalti fuud'a indeeti? Ammo gumiini tiyya yayu guyya heddu muumme inqamne na deete.

³³ Isani d'uguma jaala barbaadu beetani. Nad'eeni nad'eeni ch'ufa ira hamtuleeni dandeete isani iraa wo baratti!

³⁴ Woyaani teesanileeni d'iiga hiyyeesatiifi nama woma iyyakini qabdi, ammo d'iiga nama mana ch'abse nama saamu inqabdu. Ammo taatule,

³⁵ isani, Nu woma iyyakine; Waaqileeni deebie nuti indallanu jettani. Ammo anini, AABBO Waaqi, wollaala isaniti mura, waan isani, Nu daba intolcheni jettanifi.

³⁶ Isani maanifi akana finna keesani jijirtani, waaqa gosa d'ibi gula yaatani? Akuma worri Ashuruu isani sobe, worri Misirileeni isani soba.

³⁷ Isani ch'eertani, mata lafa buuftani, worra Misiri biraa yaatani. Anini, AABBO Waaqi, worra isani d'aabattani suni ya dide; isani worra suni woma iraa inargattani.