Yeremia 16 - KITAABA WAAQA

¹ Ammalle AABBO Waaqi waan nani jed'e:

² Lafa akana tana keesa, nad'eeni fuute ilmaani ind'aliini.

³ Anini waan ilmaani lafa tanati d'alatufi waan abbootini isii taatu siti hima.

⁴ Worri d'ukuba hamaani hobaa, nami tokoleeni worraa bohe inawaalu. Reefi worraa akuma kosi wolirati tuulame lafa ch'iisa. Worri yokhaani woraanaani hobae yokhaani beelaani hobaa. Ammalle reefa worraale allaatifi bineensa alaati nyaata.

⁵ Atini mana bohaa inseeniini, nama duele imbohini. Anini deebie gumi tiyya nagaya inkennu, yokhaani jaalalafi naasu ingarsiisu.

⁶ Nami diqaafi guddaani lafuma tana keesati hobaa, ammo nami worra awaalu yokhaani ka worraa bohu injiru. Nami worraa jed'e ufi mure yokhaani mata haadatu injiru.

⁷ Nami tokoleeni ka deeme, nama nami iraa due d'aqe, sagale woliini nyaate lubbu iraa hambisu injiru. Nami tokoleeni ka woli nahu injiru, ato abbaafi haati namaa dootele.

⁸ Mana jila seente sagale nyaatte woma ind'ugini.

⁹ Waan anini AABBO Waaqi guddaani Israeli jed'u ch'aqasi. Anini qonqo gammadaatifi ta qilit'amatifi sirba guyya fuud'ale ch'allisisa. Nami arma tau kunini waan kana ka taha iluma ufitini arga.

¹⁰ Hojja atini dubbi tana worra kanati himte, worrileeni AABBO Waaqi maafi badi akana tana nutiini d'ufe? Yokhaani nu maal yakini. Yokhaani ch'ubbuuni nu AABBO Waaqa keennati tolchine tami? Jed'e si gaafate,

¹¹ atini waan jettuuni, AABBO Waaqi waan jed'u, waan abbootini teesani na lakifte waaqa d'ibi gula yaate hojateefi, ammalle na lakifte seera kiyya ch'absitefi. Isani akasi taatani.

¹² Ammo isani yayu abbooti teesanile ira waan hamtu tolchitani. Isani ch'ufti mata jabaatani, hameenna gula yaatani, naa saalfachu diddani.

¹³ Tanaafi anini amma lafa tana keesaa irreeni isani baase, lafa isanifi abbootini teesani imbeenneti isani galcha. Duuba achiti halkanifi guyya waaqa d'ibi hojatani, aninileeni diqole isanii innahu.

Aka worri boojiani galu

¹⁴ AABBO Waaqi waan jed'u, Guyyaani ind'ufa, ka nami deebie, Nu maqa AABBO Waaqa ka lafa Misiri keesa gumi Israeli baaseni kakhanna injenne.

¹⁵ Ammo fulla suni worri waan jed'u, Nu maqa AABBO Waaqa ka worra Israeli lafa mirgatifi lafa inni iti firfirse ch'ufa keesaa galcheeni kakhanna jed'u. Anini lafa duri ababoota worraati kenneti worra deebisa. Nami dubbi tana jed'e ana, AABBO Waaqa.

Gaargala d'ufu

¹⁶ AABBO Waaqi waan jed'u, Anini worra qurt'umi guuru heddu ga yaama, ka d'ufe worra kana guuru. Duuba eegi suni nama adamo ka gaareenifi kubileefi goda d'akha keesa ch'ufa worra barbaadu gadini d'ufa.

¹⁷ Anini waan worri tolchu ch'ufa inarga. Wonti na duraa d'okhata tokoleeni injirtu; ch'ubbuuni worraleeni na dura ind'okhatu.

¹⁸ Anini maro dabaafi ch'ubbu worraatifi gati waan suni maro lama iraa fuud'a, waan worri lafa tiyya, waan harkaani boch'ani ka lubbu inqamneeni t'ureese, waaqa d'ara sunini lafa tiyya guutefi.

Aka Yeremiani d'ugefachaani AABBO Waaqa kad'ate

¹⁹ Ee AABBO Waaqa, atini irre tiyyafi jabeenna kiyya; nami guyya gaargala na qarqaaru siuma. Gochiti muumme lafati d'ufte waan siini jettu, Ababooti teenna waaqa d'ara, ka harkaani boch'ani, ka woma nama imbaane ch'alla gula yaate.

²⁰ Nami dandae waaqa ufi imid'aafata? Ee, ato mid'aafatele wonti sunini waaqa intaatu.

²¹ Tanaafi AABBO Waaqi waan jed'u, Amma tana gosa ch'ufa irre tiyyafi jabeenna kiyya garsiisa. Duuba akasiini aka anini AABBO Waaqa deebiani iwollaalani.