Yeremia 13 - KITAABA WAAQA

¹ AABBO Waaqa waan nani jed'e, Beeni hid'a boofta bitad'i keeyad'i,

² ammo imich'ini. Duuba anini dubbi AABBO Waaqa gula bitad'e keeyad'e.

³ Jennaani AABBO Waaqi ammalle waan nani jed'e,

⁴ Galaana Frati d'aqi, hid'a suni goda d'akhaa keesati d'ossi.

⁵ Duuba anini kae deeme, d'aatu galaana Frati, akuma AABBO Waaqi nani jed'e d'osse.

⁶ Eegi bulti heddu, galaana Fratiti deebii, hid'a taani fud'ad'i.

⁷ Jennaani anini kae iti d'aabad'e, fulla anini iti d'osse taanini bahe, hid'a taani ta ch'ich'ite hobaate arge.

⁸ Jennaani AABBO Waaqi ammalle nani dubbate waan nani jed'e,

⁹ wonti AABBO Waaqi jed'u tana, Anini karuma kanaani kiyyiba worra Yudatifi kiyyiba gudda worra Yerusalemu iraa galcha.

¹⁰ Gumiini hamtuni tunini, mataa jabaatte dubbi tiyya ch'aqasu didde, waaqa d'ibi gula yaate hojate, aka hid'a ch'ich'ite badde tana taati.

¹¹ Akuma hid'aani nama qabdu, akasuma anini worra Israelitiifi ka Yuda ka jabeese na qabu fed'a. Wonti anini akasi tolcheefi, aka worri gumi tiyya tahe gurra dansaafi ulfinna natiini d'ufu; ammo worri na inch'aqamne.

Gorjo daad'i

¹² AABBO Waaqi waan nani jed'e, Yeremia, waan atini worra Israelitini jettu, gorjo daad'i ch'ufa daad'iini guuta jed'i. Yo worri nu imbeenna aka gorjo ch'ufa daad'iini guutu malani siini jed'e,

¹³ atini waan jettuuni, AABBO Waaqi waan jed'u: Anini nama lafa tanaa ch'ufa daad'i iti guure macheesa — hayyoota d'aloota Dauditifi qaaloleefi raagootafi gumi Yerusalemu ch'ufa.

¹⁴ Duuba anini worra woliini d'ae ch'ach'abse butucha abbaafi ilmale. Anini worraa ind'iigu, diqole innahufi, inuma balleesa.

Aka Yeremiani nama ufi guddisu gorsu

¹⁵ Ee gumi Israeli, AABBO Waaqi ya wo jed'e, kiyyiba lakisa, ch'aqasa.

¹⁶ AABBO Waaqa keesani guddisa, ato inni dukanaani d'ufe gaareeniti isani ingugufachiimne; ammalle ato inni ifsa isani abdatani dukana sipe intolchine.

¹⁷ Yo isani ch'aqasu diddani, anini maro kiyyiba keesanitifi d'ofad'e boha; anini aka male, ka imimaani ila tiyya keesaa yaani, boha waan gumi AABBO Waaqa boojianifi.

¹⁸ AABBO Waaqi waan nani jed'e, waan atini hayyichaafi haad'a isaatini jettu: Barch'uma keesani ka guddinna iraa bua. Wonti akanatiifi sureeni teesani mid'aaduni ta hayyuma ya mata keesani iraa buute.

¹⁹ Dira Yuda ch'ufa ka bitaa jiru ya marsani, nami tokoleeni dandae inseenu. Worra Yuda ch'ufa ya boojiani lafa d'ibi geesani.

²⁰ Ee Yerusalemu, laali! Nyaapi kanke mirgaa ga d'ufu jira! Worri harka keetiti kennani ka atini kiyyibdeeni meeti?

²¹ Hojja nami atini jaala kanke seete, si had'e si dabsate si mohate, atini maani jetta? Atini hojja suni aka nad'eeni ch'ininfatu d'ukubsatta.

²² Yo atini ufi gaafatte, Isi maafi akana na tolchani? jette — wonti akasi si tolchanifi waan dabi kanke heddatefi; tanaafi ubaara kanke tarsaasani si buufatani.

²³ Nami guraachi lafa Kushi dandae goga ufi garaingalcha? Yokhaani qeeramsileeni dandae barru ufira imballeesa? Yo worri dandae waan suni tolche isanileeni ka waan hamtu barattani, dandeetani waan dansaa tolchitani.

²⁴ AABBO Waaqi akuma bua buuyo, ta bubbeeni gamooji fuute, isani firfirsa.

²⁵ Inni waan jed'u, Tunini milki teesani, qooda waan anini isanii kennu fed'e, waan isani na deetani waaqa d'ara d'ugeefattanifi.

²⁶ Anumati ubaara keesani isani iraa baase, ch'eera keesani diidati mullisa.

²⁷ Anini waan hamtu isani taatani ch'ufa ya arge — aka isani waaqa d'ara gaara gubbati gula baddani, akuma nama niiti biyyaati d'arae gula badu, yokhaani farda korma ka d'ala gula badu. Worra Yerusalemu, isani ya baddani, yoomi t'uri keesaa baatani?