Yakobo 5 - KITAABA WAAQA

¹ Ehayi, dureeyi, me, dubbi tiyya ch'aqasa! Boa, ooa, maro gaargala isaniti d'ufu!

² Duroomi keesani ya shame, woya teesani ya barbareeni nyaatte.

³ Worqifi qarsiini teesani ya dandoofte, dandi tanati hegeri isani himatte, aka ibida nafa keesani guba. D'io tana ya guddo duroomtani.

⁴ Isani worra oobru isanii hojatu hori imbaamne. Aka worri isani himatu ch'aqasa! Booti worra mid'aani keesani galchu, la gurra Waaqa Aabbo gudda geete!

⁵ Jireenni keesani lafa tana keesati ya ka gammadatiifi ka machi tahe. Ya guyya qalmaati ufi gabbiftani.

⁶ Isani ya nama woma iyakini ka ufi iraa isani d'owu indandeenne, wollaala iti murtani ijeeftani.

Obsafi kad'acha

⁷ Obsaa, oboleyaani tiyya, haga Aabbooni d'ufuuti. Aka abbaani oobru haga mid'aani isaa dansaani bahaniti eegatu, ilaala. Bokaya gannatiifi ka hagayale obse eegata.

⁸ Isanileeni obsu maltani! Garaa jabaad'a, guyyaani Aabbo ya d'iaate.

⁹ Woltingungumiina, oboleyaani, aka Waaqi isani inqorre. Abbaani qorsuma balbala dura eja.

¹⁰ Oboleyaani, raagoota maqa Aabbootiini odeesite, qaabad'a. Aka worri obse gaargale qaabad'a!

¹¹ Waan worri obseefi gammada qabani jenna. Isani ya obsa Ayubu d'ageetani, duuba aka Waaqi waan inni fed'u ch'ufa eege keenneefi imbeetani. Wonti akasitiifi Aabbooni guddo naasu qaba, guddo namaa naha.

¹² Ee, oboleyaani tiyya, waan ch'ufaani inkakhatiina, gubbafi lafafi waan tokoleeni inkakhatina. Eetiini teesani ha eeti taatuuti. Hiyyoni teesanileeni ha hiyyo taatuuti, aka qorsuma Waaqa keesa inseenne.

¹³ Nami gaargala qabu jiddu teesani keesa jira? Ha Waaqa kad'atuuti. Nami gammada qabu jira? Ha faaru d'ahatuuti.

¹⁴ Nama fayya inqamne jira? Ha jaarole gumi Waaqa yaame Waaqa kad'ataniifi, d'ad'a maqa Aabbootiini muudani.

¹⁵ Kad'achaani tunini, yo d'ugefachaani tolchani, nama suni imfayifti: Aabbooni isa imfayisa, daba inni tolchele inaraaramaniifi.

¹⁶ Tanaafi daba keesani wolti himad'a, Waaqa woli kad'ad'a, aka fayyitani. Kad'achaani nama d'ugaa waan jabdu, guddo wo baati.

¹⁷ Eliyaleeni duri namuma aka keennaati. Inni guddise Waaqa kad'ate, aka bokeeni imbuune, tanaafi ganna sadifi jia jaa bokeeni buu dide.

¹⁸ Inni ammalle kad'annaani bokeeni roobe, lafti mid'aani baafte.

¹⁹ Oboleyaani tiyya, yo nami tokoleeni isani keesa d'uga iraa bade, nami d'ibiini deebise,

²⁰ waan kana qaabad'a. Nami nama daba tolchu wollaala iraa deebise, lubbu nama suni duisa keesaa baase, daba heddu jalaa baasa.