Yakobo 1 - KITAABA WAAQA

¹ Maqaani kiyya Yakobo, anini hojattu Waaqatiifi ka Aabbo Yeso Kristo. Anini isani gosa kud'ani lama ta gargari firfirfamtani nagaya fuud'a.

D'ugefachaafi qalbi

² Oboleyaani tiyya, yo gaargala aka heddu argattani, aka gammada heregad'a;

³ wonti akanatiifi isani imbeetani, aka hojja d'ugefacha teesani laalatani iti gamani obsafi jabeenna argattani.

⁴ Ammo qorqorad'a aka obsi suni aka dansa huji ufi guute, isani qit'ooftani woma imfitanne.

⁵ Yo nami tokoleeni isani keesa beekha d'abe, ha Waaqa kad'atu, duuba Waaqi naaso, hifacha male waan ch'ufa namaa kenna.

⁶ Yo kad'ate inni d'ugefachu male, diqole rinch'ich'u himmalle; wonti akanatiifi nami rinch'ich'u ch'ufti aka d'awa galaana ka bubbeeni d'ooftu jira.

⁷ Nami akana kunini waan Aabbo ira wo argatu insehiini,

⁸ waan garaani isaa lama tahe ejatta aka dansa imbeenneefi.

Hiyyuumafi durooma

⁹ Oboleesi hiyyeesi, yo Waaqi wo kenneefi, ha gammadu;

¹⁰ oboleesi dureesileeni ha akasuma tolchu, yo Waaqi wo d'owe. Wonti akanatiifi dureesi aka daraara buuyo goga.

¹¹ Aduuni balaliite buuyo gubde, daraaraani isii gogoge, mid'aagumti isii baddi. Akuma suni dureesa ch'ufa balleesani, ato inni tae huji ufi hojatu.

Ilaalacha

¹² Ayyaana nama gaargala obsuuti; eegi ilaalacha dabsate, eebafi jireenna argata, ta Waaqi nama isa jaalatu d'aamate.

¹³ Nami tokoleeni, yo ilaalatani, Waaqati na ilaalate injed'iini. Wonti akanatiifi hameenni dandae Waaqa inilaalatu, Waaqileeni nama tokole inilaalatu.

¹⁴ Ammo nama ch'ufa d'araa isaa hamtuti ilaalata, hojja hirkifte isa sobdu.

¹⁵ Duuba d'araani isaa hamtuuni taani garaachoofte daba d'alti; ammalle dabi, eegi guddate duisa d'ala.

¹⁶ Insobamiina bada, oboleyaani tiyya!

¹⁷ Galati dansaani ka namaa kennanifi ka namaa baasani ch'ufti gubba gadi d'ufa, fulla Waaqa, ka ifsa gubba uume. Inni injijiramu yokhaani garingalu.

¹⁸ Fed'i isatiini inni dubbi d'ugatiini nu uume, aka nu uumama isa ch'ufa keesa angafa taanu.

Dubbi Waaqa guuta

¹⁹ Waan kana qaabad'a, oboleyaani tiyya! Nami ch'ufti ha hure wo d'agaye, laanuma dubbate, miira guddatu.

²⁰ Wonti akanatiifi dalansuuni namaa fed'i Waaqa ta d'ugatiini ind'uftu.

²¹ Adaba t'uritiifi huji hamtu ch'ufa lagad'a. Dubbi garaa keesani keesati fach'aasani, ta dandeete lubbu teesani baaftu, kara laanatiini fud'ad'a.

²² Dubbi isaa ch'aqaftani ufi indaallesiina, ammo dubbi suni guuta.

²³ Wonti akanatiifi nami dubbi ch'aqase, ammo inguunne, nama dawiti keesa ufi ilaale, aka jiru ufi argu fakaata.

²⁴ Inni maro toko ufi ilaale, achii deeme, jennaani aka jiru ufi ded'a.

²⁵ Ammo nami seera qit'e ka nama balchoomsu jabeese, ilaale, ch'aqase, ded'u dide ammo guutu, nama suni Waaqi waan ch'ufa keesati ineebisaafi.

²⁶ Nami nama aada guutu ufi sehu eennu? Yo inni araba ufi intissine, inni ufi sobe, aadaani isaa woma imbaatu.

²⁷ Aadaani Aabbo Waaqi d'ugaafi qajeeltu jed'u tana: aka ijoolle abbaafi haad'a inqamneefi nad'eeni d'iirsi iraa due qorqoratani, ufile hameenna lafa iraa ufi d'owani.