Uumama 50 - KITAABA WAAQA

¹ Yusufuuni abbaati jige d'ungate iti bohe.

² Jennaani Yusufuuni nama ch'ireeyyi yaame, Reefa abba kiyya woyaani mamara, qayyaani urgeesa jed'e.

³ Hujiini suni guyya afurtama fud'atte, akuma aada huji suni. Duuba worri Misiri haga bulti torbatama isaa bohe.

⁴ Guyyaani bohaa dabre jennaani Yusufuuni waan worra Faraotiini jed'e, Yo dubbi tiyya d'ugeefattani, d'aamsa kana Faraoti na hima:

⁵ Aabbooni laafe duu gahe jennaani waan nati d'aamate, Yo anini due, awaala anini lafa Kanaani keesati qotad'eti na awaala jed'e. Duuba nati eebisi, aka anini deeme aabbo awaale gadi deebiu.

⁶ Faraoni waan jed'eeni, beeni, abbe awaali, akuma atini qara iti kakhatte.

⁷ Jennaani Yusufuuni abba ufii awaalu d'aqe. Duuba hojattu Faraotiifi jaarole worra isaatiifi jaaroleeni lafa Misiri ch'ufti Yusufu woliini yaate.

⁸ Ammalle worrafi oboleyaani Yusufutiifi worri abba isaa ch'ufti woliini yaani. Wonti lafa Gosheniti hafe ijoollefi loonifi ree ch'alla.

⁹ Gaari fardi hirkisufi worri farda yaabatuleeni woliyaani; gumiini suni gumi muumme inqamne.

¹⁰ Oobdi dira Atadi ta Yordanini ilaboru geennaani lalabani aka taka inargini bi bohani. Yusufuleeni haga guyya torba abba isaati bohe.

¹¹ Gochiti Kanaani, ta lafa suni keesa teetu, boha suni oobdi Ataditi d'ageennaani waan jette, Worri Misiri kunini boha guddo bohuu jira; tanaafi fulla suni maqa Abel-Misiri baasani, akasi jechaani Boha worra Misiri jecha.

¹² Jennaani ilmaani Yakobo akuma inni d'aamate tolchite;

¹³ reefa isaa lafa Kanaaniti geesite goda Makpela, ka Mamreeni ilaboru, oobru Abrahamuuni Efroni gosa Hiti iraa bitate, keesati awaalte.

¹⁴ Yusufuuni abba ufii awaale jennaani oboleyaani isaatiifi worra awaala d'aqe ch'ufa woliini lafa Misiriti galani.

Aka Yusufuuni oboleyaani isaa garaa jabeese

¹⁵ Eegi abbaani isaani due, oboleyaani Yusufu waan woliini jette, Yo Yusufuuni amma nu jibbe haalo duri taani nu baafate maani taana?

¹⁶ Qonqo Yusufuti ergani waan jed'ani, Aabbooni ato induiinu

¹⁷ waan nuuni jed'e, Waan Yusufuuni jettani, Ch'ubbu duri nuu oboleyaani tante siti ch'ubbamne biraa nu deemi nuuni jed'e. Ammatana nu si kad'anna, ch'ubbu nuni hojattuuni Waaqaa abba keeti, siti ch'ubbamne biraa nu deemi jed'ani. Yusufuuni qonqo tana d'ageennaani bohe.

¹⁸ Eegi suni oboleyaani isaa d'ufte miilati jidde waan jetteeni, Nu amma tisse tanteeti.

¹⁹ Ammo Yusufuuni waan jed'eeni, Insodaatina; nati Waaqa qara?

²⁰ Isani waan hamtu na tolchu feetani, ammo Waaqi waan hamtu suni garagalche dansaa tolche, aka nama heddu ka sila duu lubbu baasu.

²¹ Woma tokole insodaatina; isanifi ijoolle teesanile imfida. Akanaani inni worra kibe garaa jabeese.

Duisa Yusufu

²² Yusufuuni lafa Misiri keesa worra abba ufii woliini tae, ganni isaa d'ibbafi kud'ani geennaani due.

²³ Ato inni induiini, ilmaani Efraimutiifi akhakhowani isaale arge. Ammalle ijoolle Makiri ilma Manase arge.

²⁴ Yusufuuni waan oboleyaani isaatini jed'e, Anini la duu gahe; insodaatina, ammo Waaqi inuma isani qorqorate lafa tana keesaa lafa duri inni Abrahamufi Isaaqoti kakhateti isani galcha.

²⁵ Jennaani Yusufuuni worra isaani kakhachiise waan jed'e, Nati kakhad'a, aka yo Waaqi lafa suniti isani geese, lafe tiyya guurtani godaantaniini.

²⁶ Duuba Yusufuuni, ka ganni isaa d'ibbafi kud'ani, lafa Misiriti due. Reefa isaa fuud'ani, qayya iti naqani, woya iti mamarani sanduqa keesa kayani.