Uumama 48 - KITAABA WAAQA

¹ Eegi suni waan Yusufuuni jed'ani, Abbe fayyaniti, beekhi. Duuba inni ilmaani isaa lachu Manaseefi Efraimu fuud'e abba argu d'aqe.

² Waan Yakobooni jed'ani, Gurbaani kanke Yusufuuni ya si argu d'ufe. Jennaani inni haga irreeni isaa fuutufi oljed'e sire ufii gubbaa tae.

³ Yakobooni waan Yusufuuni jed'e, Waaqi Guddaani lafa Kanaani keesati fulla Luzuti nati mullate na eebise

⁴ waan naani jed'e, Anini si daraarse ilmaani tante heddu taati; lafa tanale sifi ilmaani teetii kenna, haga jiru jireennale teesani taati.

⁵ Ilmaani tante lamaani, ta lafa Misiri keesati ato anini ind'ufini si d'alate, tiyyuma; Efraimufi Manaseeni akuma ilmaani tiyya Reubenifi Simeoni tiyya.

⁶ Yo atini ilmaani d'ibile horatte, sunini tiyya intaatu; d'aalti isiini d'aaltu ta Efraimufi Manase ch'alla.

⁷ Wonti anini waan kana jed'eefi, gaafa anini Mesopotamia d'ufu jiru, Raheliini lafa Kanaani keesati karaati doote, ato Efrathi ingahiinu. Anini guddo iraa laalefad'e d'aatu kara Efrathi awaale. (Efrathi amma maqaani Bethlehemu.)

⁸ Israeliini ilmaani Yusufu suni arge waan jed'eeni, Ijoolleeni tunini tami?

⁹ Yusufuuni waan jed'eeni, Tunini ilmaani tiyya, ta Waaqi lafa Misiri tana keesati naa kenne. Inni waan jed'eeni, Natiini kooti, ineebisaafi.

¹⁰ Israeliini jaarumafi ilti isaa waaroofte aka dansaa wo argu dad'abe. Tanaafi Yusufuuni ilmaani isaa itiini d'ufe, inni iti mamarate d'ungate.

¹¹ Israeliini waan Yusufuuni jed'e, Anini taka waan fuula kanke deebie argu inseene, ammo amma Waaqi la ijoolle teetile na agarsiise.

¹² Jennaani Yusufuuni Yakobo ijoolle iraa guure d'aatu isati jilbifate mataani gajed'e.

¹³ Yusufuuni Efraimu harka bita ka Israeli d'aabe Manase harka mirga d'aabe.

¹⁴ Ammo Israeliini harka wolmurfate harka isaa mirgicha mata Efraimu ira keeyate, ato inni maand'a tahele, ammalle harka bitaacha mata Manase ka angafa ira keeyate.

¹⁵ Jennaani inni Yusufu eebise waan jed'e, Waaqi abbootini tiyya Abrahamufi Isaaqooni hojatteefi ijoolle tana eebisinna! Waaqi ka haga arra naani gahe isi eebisinna!

¹⁶ Malaikaani ta gaargala ch'ufa keesaa na baafte isi eebisinna! Maqa kiyyafi ka abbooti tiyya Abrahamufi Isaaqoleeni ijoolle tanaani imbadiini! Isiini ha daraarte ijoolle heddu d'altuti!

¹⁷ Yusufuuni aka abbaani isaa harka mirgicha mata Efraimu ira keeyate arginaani diqole ingammanne. Duuba harka abba isaa qabe mata Efraimu iraa fuud'e mata Manase ira kaye.

¹⁸ Inni waan abbaani jed'e, Aabbo, akasiniti, angafi kana, harka kanke mirgicha ira keeyad'i.

¹⁹ Ammo abbaani dide waan jed'e, Imbeekha, gurba, imbeekha. Ijoolleeni Manaseleeni gosa guddo taati. Ammo oboleesi isaa maand'ichi isa ira jabaata, ilmaani isaaleeni gosa heddu taati.

²⁰ Duuba guyya suni eebiseefi waan jed'e, Gochiti Israeli maqa keesaniini woleebifte waan jettu, Waaqi aka Efraimufi Manase si tolchinna. Akanaani Yakobooni Efraimu angafa Manase tolche.

²¹ Jennaani Israeliini waan Yusufuuni jed'e, Ingarta, anini ya duu gahe, ammo Waaqi si woliini tae lafa abbooti teetiti si deebisa.

²² Anini oboleyaani tanteeti inkennu, ammo sii, lafa Shekemu ta biyye dansa qabdu, ta anini gosa Amori sheeftifi guube tiyyaani iraa fud'ad'e, kenna.